HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 53 2581 On İkinci Konferans, Beynelmilel Salîb-i Ahmer Komitesi faʻâliyetinin umûmî raporunun te- dkîkinden tezâhür etdiği üzere gitgide tezâyüd ve tevessüʻ etmesini kemâl-i takdîr ile zikreyler. Beynelmilel Salîb-i Ahmer Komitesi, reîs-i muhteremi Mösyö Ador ile aʻzâlarına derîn minnet- dârlığını arz eder. Komite, insâniyet için yapdığı parlak hidemâtın şerefli ve müsmir temâdîsine istinâden bütün millî cemʻiyetlerin tâm iʻtimâdını ve hükûmetlerin muhabbetine nâil olarak cümle tarafından tanılan hukûkunun îcâb etdirdiği müteʻaddid ve muğlak mesâil ile meşgûl olabilir. [284] Konferans, Beynelmilel Salîb-i Ahmer Komitesi'ne evvelki konferansların tevdîʻ etmiş olduğu vezâifi tecdîd etmekle bahtiyârdır. Bu karâr celse-i umûmiyede kırâatında ittifâk-ı ârâ ile kabûl olunmuşdur. Bu komisyon bu karârı iʻtâdan sonra iki şuʻbeye ayrılmışdır: 1) Beynelmilel Salîb-i Ahmer Komitesi tarafından kongreye tevdîʻ kılınan raporun mâlî kısı- mını, 2) Bu raporda münderic bulunan ve düşman eline geçen arâzîde kalan gayr-ı muhârib ahâlînin vazʻiyetleri hakkındaki mevâddı tedkîk eylemişdir. 1-Mâliye şuʻbesi, Beynelmilel Salîb-i Ahmer Komitesi'nin masârıfını tenkîs için gayret etmiş olduğunu ve hattâ evvelce tanzîm olunan büdceye nisbetle daha az sarfiyâtda bulunduğunu görmüş- dür. Fi'l-hakîka 1923 târîhinde 363.422 İsviçre frangı sarf etdiği hâlde 1924 senesinde 217.263 İsviçre frangı sarf eylemişdir. Salîb-i Ahmer Cemʻiyetleri tarafından komitenin masârıfına muʻâvenet olmak üzere 1923 senesinde 50.117 frank gönderilmiş ve 1924 senesinde ise bu mikdâr 70.053 franga çık- mışdır. Vâridât ile masârıfât arasındaki farkı Beynelmilel Komite, kendi sermâyesinden sarf ederek tevâzun etdirmişdir. Beynelmilel Salîb-i Ahmer Komitesi'nin ehemmiyeti altmış senelik bir tecrübenin meydâna koyduğu bir hakîkat olduğundan ve komitenin müzâyaka-i mâliyede bırakılması doğru olamayaca- ğından komisyon konferansa millî Salîb-i Ahmer Cemʻiyetlerine komiteye karşı olan taʻahhüdâtlarını tutmak mecbûriyetini ihtâr etmeği teklîf etmiş ve diğer tarafdan dahi komiteye masârıfını teʼmîne kâfi bir sermâye teʼsîs etmek için Hilâl ve Salîb-i Ahmer Cemʻiyetlerinin teşebbüsât-ı lâzımede bulunma- ğı taht-ı karâra almışdır. Zâten bir İsviçreli yüz bin frank kadar bir meblağı bu maksad için Beynelmi- lel Salîb-i Ahmer Komitesi'ne tevdîʻ etmişdir. Bu ciheti nazar-ı dikkate alan konferans aʻzâsı mühim bazı teklîfâtda bulunmuşdur. Bu meyân- da Peru Salîb-i Ahmer murahhası olan Mösyö Paulet'nin teklîfi şâyân-ı ehemmiyetdir. Bu zâtın teklîfi her memleketde senenin bir haftasını Beynelmilel Salîb-i Ahmer Komitesi'ne iʻâne cemʻine tahsîsi- ne ve en ziyâde iʻâne cemʻ etmeğe muvaffak olan cemʻiyetin birinci addedilmesine dâirdir. İtalyan murahhası aʻzâlar âidâtına yüzde beş nisbetinde, Beynelmilel Komite nâmına bir zam yapılmasını teklîf etmişdir. Nihâyet her cemʻiyete yapabileceği muʻâvenet şeklini bizzât taʻyîn etmesi esâsı kabûl edilmişdir. Sene nihâyetinde her cemʻiyet bu husûsdaki faʻâliyet ve netâyici komiteye bildirecekdir. Netâyic komitenin neşretmekde olduğu mecmûʻaya derc olunarak âleme iʻlân edilecekdir. 2-Komisyonun ikinci şuʻbesi konferansa âtîdeki karârın ahzını teklîf etmişdir: Konferans, Beynelmilel Komite'nin âtîdeki esâsâtı münâsib bir zamânda hükûmetlerin müsâʻid bir fikirle mütâlaʻa ve tedkîk etmeleri için teblîğe karâr vermişdir. Muhârib bir hükûmete tâbiʻ olup düşman eline düşmüş bulunanlardan gerek yaş ve cinsiyet iʻ-