HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 53 2586 3-Sûret-i umûmiyede Beynelmilel Salîb-i Ahmer Cemʻiyetlerinin harbde kullanılan mevâdd-ı kimyeviye ve bakteriyolojiye-i semmiyeye karşı ahlâkî mücâdelede bulunmasını ve mevâdd-ı mezkû- reye karşı en iyi ve müsmir vesâit-i tahaffuziye ve tedâvîyi hâzırlamasını akdem vezâfinden addeyler. _______________ Altıncı Komisyon Harbde gâib addolunanların adedlerinin tenkîsı Harb-i Umûmî'de kullanılan tahrîb vesâiti yalnız muhâribleri değil, kabirleri bile herc [ü] merc ederek tanılmaz bir hâle getirmiş idi. Harbde bu sûretle izleri gâib olanların ne olduklarını bilmek mâddeten gayr-ı kâbildir. Lâkin bu gibi ahvâl-i mücbire hâricinde kalan ve sırf muhâriblerin kullan- dıkları vesâit-i taharriye ve teşkîlât-ı lâzımenin noksânından ileri gelen birçok gâibler daha vardır. Bunların adedlerini azaltmak maksadıyla 1921 târîhinde toplanan Onuncu Beynelmilel Salîb-i Ahmer Konferansı, Cenevre Ahidnâmesi'nin taʻdîl projesine birkaç mâdde ilâve etmişdir. Mevâdd-ı mezkûre muhâriblere harbin başlangıcında meydân-ı harbde kalan ölülerin teşhîsiyle iştigâl edecek bir heyʼet, mevtâların gömülmesini ve mezârlarının taʻyîn-i mevkiʻini teʼmîn edecek diğer bir heyʼet teşkîlini ve bir de gerek yaralıların ve gerek sâir üserâ ve mevtâların listesini ihzâr ederek muhâsım devlete göndermek mecbûriyetini tahmîl etmekdedir. Bu mâddelerin kabûlünü müteʻâkib müfîd bir sûretde mevkiʻ-i tatbîke konabilmeleri için tâlî bazı nukâtın şimdiden taʻyîn ve tesbîti lâzım gelmekdedir. Meselâ askerlere verilen hüviyetlerini müşʻir levhanın iʻmâl olunduğu mâdde çabuk harâb olacak evsâfda ise mevtânın taʻyîn-i hüviyetini gayr-ı kâbil bir hâle getirebilir. Bunun gibi daha birçok mesâil-i mühimme vardır. Her hükûmetin bu mesâil ile iştigâl ederek beynelmilel bir konferansda yapılacak bir nizâmnâme için şimdiden hâzırlan- ması îcâb ve iktizâ eder. Bu nizâmnâmede: a-Meydân-ı muhârebede bulunan yaralı ve ölülerin taʻyîn-i hüviyetleriyle iştigâl edecek bir heyʼetin resmen teşkîli b-Kezalik yaralı, üserâ ve ölülerin isim ve ahvâl-i sıhhiyeleri hakkında maʻlûmât verecek bir heyʼet teşkîli c-Ya doğrudan doğruya veyâhûd Beynelmilel Salîb-i Ahmer Komitesi vâsıtasıyla üserâ, mec- rûh ve vefeyât esâmîsinin muhâsım orduya gönderilmesi husûsâtı tesbît edilmesi. 2-Kabirlerin heyʼet-i sıhhiye gibi teʼmîn-i masûniyeti 3-Askere mevdûʻ künye levhalarının beynelmilel bir şekl-i mahsûsda yapılması gibi mesâil dâhil olacakdır. Bu maksadı teʼmîn için On İkinci Beynelmilel Salîb-i Ahmer Komitesi âtîdeki mukarrerâtı ittihâz eylemişdir: 1-Beynelmilel Salîb-i Ahmer Komitesi lâzım gelen mürâcaʻatlarda bulunarak kendisi tarafın- dan On İkinci Konferans'a vâkiʻ olan tekâlifin teʼmîn-i husûlüne çalışmasına, 2-On Üçüncü Konferans'a bu mesâʻînin netîcesini hâvî bir rapor iʻtâ eylemesine, [290] 3-Konferans, komitenin bu husûsda istihsâl edeceği netâyicin bilâhare yapılacak yeni Ce- nevre Ahidnâmesi'nin esnâ-yı müzâkeresinde vesîka gibi istiʻmâl kılınmak üzere İsviçre Hükûmeti'ne tevdîʻ etmesine karâr verir. Bu tekâlîf konferans tarafından ittifâk-ı ârâ ile kabûl olunmuşdur. _______________