HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 54 2628 kimselerin serbestçe girip çıkdıkları tiyatro, sinema, tramvay vesâir bu gibi umûmî mahallere devâm etmemek sûretiyle diğer birçok emrâz-ı intâniyeden de kurtulmuş oluruz. Ebnâ-yı beşer bittabʻ âlem-i inzivâda yaşayamaz. Fakat büyük bir tehlikeye maʻrûz kalmaksı- zın halk ile temâs edebilmek için vücûdun sıhhat ü âfiyetine dikkat ü ihtimâm etmek mecbûriyetinde bulunduğumuzu da unutmamalıyız. Zîrâ nezle tercîhen zaʻîf ve kuvvetsizlere karşı pusu kurar. Nezlenin tehlike-i sirâyetine maʻrûz kalmamak için birçok kimseler her dakîka ağızlarını gar- gara ederler, antiseptik şeyleri koklarlar, pastiller emerler, odalarını dezenfekte etdirirler. Hâlbuki bu efendiler mikrobları öldürecek derecede kuvvetli ve müessir olan bu mevâddın ağız, burun ve boğaz cidârlarında hâsıl edeceği tahrîbâtın vücûd-ı beşere vereceği mazarratı bir türlü hâtırlarına getirmezler. Sıhhate îrâs-ı mazarrat etmeksizin vücûdu dezenfekte etmek ve aynı zamânda mikrobları öl- dürmek fikri zamânımız bakteriyoloji mütehassıslarının henüz vücûd veremedikleri hayâliyât-ı ilmi- yeden biridir. Diğer cihetden, milyonlarca ölmüş mikroblar iʻânesiyle tertîb edilen aşıların gerek nezleden ta- haffuzda ve gerek hastalığın tedâvîsinde netâyic-i müfîde verdiği de iddiʻâ edilmekdedir. Biz, burada zikir ve kaydına cesâret edilemeyecek gâyet basît ve fakat son derece müessir diğer bir ilâc tavsiye edeceğiz: Odadan dışarı çıkmak ilâcı. Bu sâyede nezle daha çabuk şifâyâb olacak ve bu hakîkî hastalık birçok kimselere ve dolayısıy- la yüzlerce şahıslara sirâyet ve intikâl etmeyecekdir. Büyük grip salgınlarında herkes bu kâʻideye yani odadan dışarı çıkmamağa hürmet etse emîn olabiliriz ki, vefeyât mikdârı çok, hem de pek çok azalmış olur. Bir leylî kız mektebi tabîbin nezleye tutulan her tâlibeyi bi'l-iltizâm yatağa yatırdığını gören müdüre doktorun bu hâlini evvelâ ifrâtkârlığına haml etmiş iken sene nihâyetinde ekserîsi nezlenin tevlîd etdiği ihtilâlâtdan neşʼet eden eyyâm-ı tedâvî yekûnunun o sene çok azaldığını görmüş ve nihâî bilançoda derslere daha muntazam çalışıldığı ve mektebin sıhhat-i umûmiyesi daha parlak gitdiği sâbit olmuşdur. Son söz olarak nezleyi bir hastalık gibi tedâvî ediniz ve ona vehâmet-i âkıbetiyle mütenâsib diğer bir isim vererek bir an evvel şifâyâb olmağa gayret ediniz diyeceğiz. _______________ NIGHTINGALE MADALYASI Kadın hastabakıcılık fedâkârlığının bir âbide-i bî-misâli olan Florence Nightingale'in nâmına vazîfesinde fevkalâde fedâkârlık gösteren hastabakıcılara verilmek üzere Beynelmilel Salîb-i Ahmer Komitesi'[nin] "Nightingale Madalyası" nâmıyla bir madalya ihdâs etdiği maʻlûmdur. Florence Nightingale Madalyası'nın tevcîh ve iʻtâsına mütedâir evvelce tanzîm edilmiş olan nizâmnâmede mezkûr madalyaya kesb-i istihkâk ve îzâhâtın adem-i mevcûdiyetine binâen Beynel- milel On İkinci Salîb-i Ahmer Konferansı bu noksânı ikmâl etmişdir. Şöyle ki: 1-Nâmzed evvel emirde ve tercîhen şehâdetnâmeli bir Salîb-i Ahmer kadın hastabakıcısı ola- cakdır.