HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 54 2630 Bütün cihân Hilâl ve Salîb-i Ahmer âilelerinin pek yüksek ve müstesnâ bir şahsiyeti olan bu pîr-i heşt-âd-ı sâl, dâimâ riyâset etdiği Beynelmilel Salîb-i Ahmer konferanslarında beşeriyet-i müş- fikanın istihdâf etdiği gâyelere vusûlünü teʼmîn için sarf-ı mesâʻî etmiş gavâmız-ı âşinâyân-ı siyâset- den ve ecille-i insâniyet-perverândandır. Mösyö Ador'a bu vesîleden bi'l-istifâde daha uzun seneler sıhhat ü âfiyet temennî ve hürmet-i amîkamızı takdîm eyleriz. _______________ Beyoğlu Merkezi Faʻâliyeti Beyoğlu Vilâyeti Hilâl-i Ahmer Meclis-i Umûmîsi [1]926 senesi Kânûn-ı Sânîsi'nin on beşin- ci Cuma günü Beyoğlu'ndaki merkezinde bi'l-ictimâʻ muvakkat riyâsete Taksim şuʻbesi reîsi Zafir, riyâset-i sâniyeye Hikmet Paşa ve kitâbete Adil Bey intihâb edilmiş ve kurʻa ile heyʼet-i merkeziye aʻzâlığından çıkan Reîs-i Sânî Abdürrezzak Şükrü, Haydar İbrahim, Doktor Refik, Doktor Neşet Os- man ve Muhâmî Cemal Fazıl Beylerin yerine reʼy-i hafî ile icrâ edilen intihâbâtda yeni mûmâileyhim ekseriyetle intihâb olunmuşlardır. Baʻdehû Ankara'da inʻikâd edecek umûmî kongreye vilâyet nâmına murahhas olarak gidecek zevâtın intihâbı icrâ edilerek Hekîmbaşızâde Doktor Muhyiddin, Refik İsmail, Muhâmî Salahaddin Neşet, Muhâmî Ramiz, Ankara Şehremini Haydar, Muhâmî Kuddusi, Abdürrezzak Şükrü, Ankara Şehremâneti İhsâiyât Müdürü Osman, Doktor Neşet [325] Osman ve Abdullah Zafir Beyler intihâb edilerek ictimâʻa nihâyet verilmişdir. *** Hilâl-i Ahmer Cemʻiyeti Beyoğlu Merkezi şehrimizde ekseriyâ vukûʻa gelen kazâlar yüzünden yaralanan vatandâşların serîʻan tedâvî veyâhûd vakt ü zamânıyla hastahânelere sevk edilememelerin- den dolayı pek çoğunun telef veyâhûd mâdâmü'l-ömr maʻlûl kaldıklarını nazar-ı dikkate alarak ekser memâlik-i mütemeddinede olduğu gibi bütün asrî techîzâtı ve en serîʻ vesâiti hâvî (kazâzedelere mah- sûs imdâd-ı âcil merkezleri) teʼsîsini tasmîm ve bu husûsdaki projelerin ihzârını Reîs Hekîmbaşızâde Muhyiddin Bey'e havâle etmişlerdir. Bu fâideli teʼsîsâtın şehrimizde pek çok kıymetli hizmetler îfâ edeceği meʼmûldür. *** Hilâl-i Ahmer'in Beyoğlu merkezi nizâmnâme-i esâsî mûcebince teşkîli mukarrer olan Gençlik Hilâl-i Ahmeri teşkîlâtı için şimdiden istihzârâta başlamış ve Beyoğlu vilâyeti dâhilindeki mekâtib müdîrân ve muʻallimleriyle temâs ederek talebe arasında şefkat pulları ve küçük kıymetli makbûzlar tevzîʻiyle Hilâl-i Ahmer'e karşı bir alâka tevlîdine çalışmakda bulunmuşdur. Maʻârif Müdüriyeti'nin müsâʻade-i lütufkârâneleriyle memleketin pek münevver ve fedâkâr bir zümresi olan mekâtib heyʼet-i taʻlîmiye ve idâreleri bu teşebbüsü şâyân-ı teşekkür bir harâret ve alâka ile karşılamışlar ve bu sûretle Gençlik Hilâl-i Ahmeri'nin nüvesi atılmışdır. Talebe arasında hiss-i tesânüd ve teʻâvün uyandırmak sûretiyle rûhî ve terbiyevî bir gâye de teʼmîn edecek olan bu teşebbüsün memleketimizdeki bütün mekteblere teşmîli şâyân-ı arzudur. ***