HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 54 2631 Beyoğlu Vilâyeti Hilâl-i Ahmer Heyʼet-i Merkeziyesi şimdilik küçük mikyâsda bir ana-yavru müessesesi teşkîli hakkında Reîs Muhyiddin Bey tarafından vâkiʻ olan teklîf üzerine bu teşkîlâta mütedâir projenin ihzârını makâm-ı riyâsete havâle etmişdir. Büdceye mevzûʻ imdâd ve muʻâvenet faslı, tahakkuk ve merkez-i umûmînin tasvîbine iktirân etdiği takdîrde vilâyetin en ziyâde fakîr hal- kının kesâfetle bulunduğu mahalde teʼsîs edilecek olan işbu müesseselerde fakîr süt anaları çocukla- rıyla berâber alınarak irzâʻ müddeti hitâm buluncaya kadar kendisi ve çocuğu iʻâşe edilecek ve aynı zamânda müessesede bulundurulacak küçük tezgâhlar vâsıtasıyla analara bazı el işleri öğretilecekdir. Müessesenin civârındaki fakîr kızlar da gündüzleri müesseseye devâm ile hem sanʻat hem de vâlide oldukları zamân fennî çocuk bakımının neden ibâret olduğunu öğreneceklerdir. Memleketimizdeki vefeyât-ı etfâl için pek iyi netâyic vereceği derkâr olan işbu müessesâtın taʻammümü arzu olunur. *** Mekteblerde gıdâdan mahrûm kalan çocuklar içinde Himâye-i Etfâl ile müştereken Kasımpaşa ve Beşiktaş'da birer aşhâne teʼsîsi de kuvve-i karîbeye gelmişdir. *** Seyr-i Sefâin İdâresi'nin muhterem meʼmûrîn ve müstahdemîninden iki yüz elli zâtın senevî taʻahhüdât ile cemʻiyetimiz aʻzâlığına kaydedilmelerinden [326] Petrol Etoil Roumen Şirketi tarafın- dan teberruʻan gönderilen elli liradan ve Mısırlı vatandâşlarımızdan Makbule Ragıb Hanımefendi'nin senevî on lira taʻahhüdle cemʻiyetimiz aʻzâlığını kabûl buyurmalarından dolayı cümlesine arz-ı te- şekkür olunur. _______________ İstanbul Hilâl-i Ahmer Merkezi İstanbul Vilâyeti Hilâl-i Ahmer Merkezi şuʻabâtında teksîr-i aʻzâ husûsunda fazla bir mesâʻî mahsûs olmakdadır. _______________ İzmir Hilâl-i Ahmer Balosu Geçen Kânûn-ı Sânî'nin yirmi sekizinci günü akşâmı İzmir'de Hilâl-i Ahmer menfaʻatine veri- len balo, İzmir halkına müstesnâ bir gece yaşatmış ve pek mühim vâridât teʼmîn etmişdir. _______________ Ahâlî Gazetesi Samsun'da münteşir Ahâlî refîkimiz 3 Şubat'a musâdif Çarşamba günkü nüshasını beş kuruş fiyâtla Hilâl-i Ahmer menfaʻatine terk etmişdir. Refîkimize arz-ı şükrân eyleriz. _______________