HİLÂL-İ AHMER MECMÛʻALARI / CİLT 6

2657 Beşinci Sene 1 Ramazân sene 1344 / 15 Mart 1926 Numara 55 Makâlât ve İʻlânât, Mecmûʻa Müdüriyeti'ne Gönderilmelidir. TÜRKİYE HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Her Ayın On Beşinde Neşrolunur. Senelik abonesi bir liradır. Merciʻi: Yerebatan Câddesi'nde Hilâl-i Ahmer Merkezi. Telefon: İstanbul 2653 Mündericât: Hilâl-i Ahmer'in Câmiʻ ve Bayram Günleri – İctimâʻî Hıfzıssıhha – Hazım Mesʼelesi – Amerika'da Etıbbâ Vefeyâtı – Trahom – Tokyo Konferansı – İspirto Zehir midir? – Hilâl-i Ahmer Havâdisi – Salîb-i Ahmerler Havâdisi – Gençlik Salîb-i Ahmeri – Muktebesât – Fransızca Kısmı – İngilizce Kısmı HİLÂL-İ AHMER'İN CÂMİʻ VE BAYRAM GÜNLERİ Hilâl-i Ahmer, Salîb-i Ahmerler ve diğer bütün müessesât-ı hayriye gibi erbâb-ı hayrât ve ha- senâtın muʻâvenât-ı mâddiye ve maʻneviyeleriyle yaşar ve inkişâf eder. Harb-i Umûmî esnâsında teʻâvün kuvvetlerini pek ziyâde yükselten Salîb-i Ahmerler, vâridât-ı menâbiʻi bulmak için muhtelif vâsıtalara mürâcaʻat etmişlerdi. Bu vâsıtalardan biri de Cemâhîr-i Müttefika-i Amerika'da ve İngiltere'de "Church Day", yani "Kilise Günü" taʻbîr olunandır. Bu iki memleketin Salîb-i Ahmer Cemʻiyetleri senenin birkaç muʻayyen gününde bütün kiliselerde para toplamak usûlünü tatbîk eylemek sûretiyle pek parlak muvaffakiyetler elde etmişlerdir. Amerika ve İngiliz Salîb-i Ahmerlerinin vâridât fasıllarından en mühimmini teşkîl eden "Kilise Günü" bu iki cemʻiyete mühim vâridât teʼmîn ediyor. Hilâl-i Ahmer de "Câmiʻ ve Bayram Günleri"ni ihdâs etmişdir. Maʻlûmdur ki, İstanbul'da Ra- mazân Bayramı'nın ilk günü, Hilâl-i Ahmer'in çiçek günüdür. Bu âdet bâkî kalmakla berâber Ramazan ve Kurbân Bayramlarının ilk günleri Câmiʻ Günleri ittihâz ediliyor. Bu iki mübârek günde bayram namâzına giden her müslümân, câmiʻ-i şerîfe konacak bir kutu veya tepsiye gönlünden ne koparsa atar. Bu âdet, Türkiye Cumhûriyeti'nin en küçük köylerindeki câmiʻlere kadar teşmîl edilebilir. Bu sûretle Ramazân ve Kurbân Bayramlarının ilk günlerinde, bayram namâzının edâsından sonra bütün millet, Hilâl-i Ahmer'i yani bütün eytâm, erâmil ve fukarâyı, muhâcirleri düşünmek fır- satını elde etmiş olur. Bütün memâlik-i İslâmiye'deki câmiʻlerden de aynı himmet ve mürüvvetin ibzâline intizâr olunur. Câmiʻ ve Bayram Günleri'nin hâsılâtı, ber-muʻtâd mecmûʻamızda neşredilecekdir. Bir Ricâ: Türkçe gazetelerin ve muhtelif lisânlarda neşrolunan cerâid-i İslâmiye'nin bu küçük beyânnâmeyi sütûnlarına derc eylemelerini hakkımızdaki dâimî lütuf ve teveccühlerinden ricâ ve niyâz eyler. Hilâl-i Ahmer Mecmûʻası