HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 55 2672 Hilâl-i Ahmer Cemʻiyeti İzmir Merkezi İctimâʻ-ı Umûmîsi Riyâseti'nden merkez-i umûmîye yazılan tahrîrât sûretidir. Cemʻiyetin nizâmnâme-i esâsîsi ve 3 Teşrîn-i Sânî sene [1]341 [1925] târîhli tahrîrât-ı umûmi- yeleri ahkâmına [358] tevfîkan İzmir merkezinin ictimâʻ-ı umûmîsi 13 Kânûn-ı Evvel sene [1]341 [Aralık 1925] târîhine musâdif Pazar günü baʻde'z-zevâl sâʻat iki buçukda inʻikâd ederek mukar- rerât-ı âtiyenin ittihâz kılındığı arz olunur. 1-Heyʼet-i merkeziyenin on bir ay zarfındaki mesâʻî ve icrââtını mübeyyin olup kırâat olunan rapora ve tedkîk olunan hulâsa-i hesâbiyeye göre heyʼet-i merkeziyenin muʻâmelât ve icrâât-ı umû- miyesinin her türlü tenkîd ve müzâkereden âzâde olduğu anlaşılmış ve heyʼet-i merkeziyeyi teşkîl eden ve şehrimizin bi-hakkın mûcib-i iftihârı olan zevât-ı muhteremenin ve bilhâssa Reîs-i Sânî Hüs- nü Beyefendi'nin mesâʻî ve ikdâmları şâyân-ı takdîr ve teşekkür görülmüşdür. 2-Merkez [1]342 [1926] senesi büdcesiyle vâridât 94.890 lira tahmîn edilmiş ve masraf kırk bin lira olarak tesbît olunmuşdur. Masrafın şuʻabât da dâhil olduğu hâlde vâridâtın yüzde kırkını tecâvüz etdirilmeyeceği hakkında nizâmnâmedeki sarâhat nazar-ı dikkate alınmış ve tanzîm olunan büdce yalnız şehrimize âid bulunmuş olduğundan şuʻabâtın fazla-i vâridâtı dâhil-i hesâb edildiği takdîrde kabûl olunan masrâfın yüzde kırkdan da dûn bir derecede kalacağı derkâr bulunmuşdur. 3-Nizâmnâmenin seksen dördüncü mâddesi mûcebince aʻzâ-yı mevcûdenin sülüsünün tebdîli için keşîde olunan kurʻa aʻzâdan Eczâcı Ferid, Hacı Yavaşzâde Mehmed Şükrü Beylerle Sâbire Yu- nus, Fakiye Hacı Halil [ve] Saadet Esad Hanımlara isâbet etmiş ve reʼy-i hafî ile yapılan intihâbda meşgûliyet-i şahsiyesinin kesreti hasebiyle istiʻfâ etmiş olan Mehmed Şükrü Efendi'den mâʻadâsı ibkâen Doktor Muʻallim Hulusi Bey müceddeden intihâb edilmişdir. 4-Cemʻiyete menâbiʻ-i vâridât teʼmîni husûsunda cereyân eden müzâkerede heyʼet-i merkezi- yenin teklîf etdiği piyango ve maʻden suları mesʼelesi müttefikan tasvîb edilmiş ve bilhâssa aʻzâ-yı âmilenin teksîri husûsunun ehemmiyetle taʻkîbini takarrür etmiş olmakla berâber şefkat pullarının da cemʻiyetin belli başlı vâridâtı meyânına dâhil olacak bir sûretde sarfı husûsunun teʼmînine çalışıla- cakdır. 5-Cemʻiyetin şehrimiz merkezinin bidâyet-i küşâdından beri intizâm-ı idâresiyle aʻzamî menâ- fiʻi istihsâl ve milletimize en vâsiʻ yardımlarını îfâ husûsunda gösterdiği muvaffakiyetin ve bilhâssa işgâl senelerine tesâdüf eden en fecîʻ zamânlarda bile envâʻ-ı taʻkîbâta rağmen vazîfe-i insâniye ve milliyelerini îfâdan fâriğ olmayan ve cemʻiyetin alâmet-i fârikasına hürmeti kabûl etdirmeğe muvaf- fak olan ve istirdâd-ı mesʻûdu taʻkîb eden senelerde bî-misâl olan hidemât-ı hayriye ve milliyeleriyle temâyüz ederek umûmun mazhar-ı takdîr ve hürmeti olan heyʼet-i merkeziye aʻzâ-yı muhteremesinin zabıtnâmede mezkûr olduğu vechile cemʻiyet menâfiʻini taʻkîb ve îfâ husûsundaki ihtisâs ve kâbili- yetleri, bu husûsda beyân-ı mütâlaʻa ve müzâkereyi îcâb etdirmeyecek bir derecede görüldüğünden heyʼet-i merkeziyenin cemʻiyet menâfiʻine muvâfık göreceği husûsâtda vukûʻ bulacak işʻârâtının heyʼet-i umûmiyenin dâire-i kabûlü dâhilinde telâkkî edilmesi esâs kabûl edilmişdir. Binâenaleyh heyʼet-i merkeziyenin vazîfe-i insâniye ve milliyelerini azimkârane îfâ husûsundaki muvaffakiyet ve fedâkârîsinin şehrimizle muhîtinde hâsıl etmiş olduğu teʼsîrât-ı maʻneviye hakîkaten numûne-i imtisâl olacak bir şekilde olduğundan sene-i âtiyede en kıymetdâr semeresinin iktitâf edileceğine umûmen müttefik olduğumuzu ve muhâsebe-i husûsiye büdcesinden [359] iki bin lira tahsîs etdiril- miş olduğunu arz eder ve sene-i âtiye büdcesiyle meclis-i umûmîde kırâat olunan heyʼet-i merkeziye raporunun ve meclis-i umûmî zabıtnâmesinin birer sûretlerinin leffen takdîm kılındığı arzıyla tak- dîm-i ihtirâmât eyleriz, efendim. _______________