HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 55 2673 Hilâl-i Ahmer Cemʻiyeti İzmir Merkezi'nin 13 Kânûn-ı Evvel [1]341 [Aralık 1925] târîhinde inʻikâd eden senelik ictimâʻ-ı umûmîsinde kırâat olunan heyʼet-i merkeziye raporu Muhterem Beyler! Cemʻiyetimiz nizâmnâme-i esâsîsinin kongrece taʻdîl edilerek ahîren heyʼet-i vekîlenin tasdî- kine iktirân etmiş olduğu maʻlûm-ı âlînizdir. Muʻaddel nizâmnâmenin 83'üncü mâddesi mûcebince vilâyet meclis-i umûmîsinin her sene Teşrîn-i Evvel on beşinde ictimâʻa daʻveti muktezî ise de nizâm- nâmenin tasdîk ve teblîği bu müddetin mürûrundan sonra vukûʻ bulduğu cihetle bu seneki ictimâʻın bu ay zarfında icrâsı merkez-i umûmîden işʻâr buyurulmuş olduğundan heyʼet-i muhteremelerini ictimâʻa daʻvet eyledik. Meclis-i umûmînin vazîfesi nizâmnâme-i esâsînin 84'üncü mâddesinde gös- terildiği vechile: 1-Sene-i âtiye büdcesinin tedkîk ve kabûlü 2-Aʻzâ-yı mevcûdenin sülüsünün bâ-kurʻa ihrâc ile yerlerine yenilerinin intihâbı 3-Hilâl-i Ahmer menâfiʻine âid teklîfâtın müzâkeresi 4-Hilâl-i Ahmer'e fevkalâde hizmet edenlerin taltîf ve takdîri için esbâb-ı mûcibesinin taʻyîni 5-Meclis-i umûmîye murahhas intihâbı gibi husûsâtdan ibâretdir. Heyʼet-i merkeziyemiz bu bâbdaki müzâkerâta mübâşeretden evvel merkezimizin vazʻiyet-i umûmiyesi hakkında heyʼet-i muhteremelerini tenvîr etmeği bir vazîfe telâkkî eylediğinden îzâhât-ı âtiyenin iʻtâsını mûcib-i fâide görmüşdür. Merkezimizin vazʻiyeti: Sene-i hâzıra bidâyetinde vukûʻ bulan ictimâʻ-ı umûmîde mazhar-ı iʻtimâdınız olarak temâdî-i vazîfeleri müttefikan tasvîb olunan bizler, mazhar olduğumuz iʻtimâd-ı umûmîyi teʼyîd edebilmek için mürûr eden şu on bir ay zarfında sinîn-i sâbıkaya kıyâsen fevkalâde ibrâz-ı mesâʻî ile büdcemiz- le kabûl olunan vâridâtı teʼmîn ederek masârıfât-ı mütehakkıkayı teʼdiye edebilmiş ve bu meyânda umûr-ı hayriyeyede bir hayli muʻâvenetde bulunmuşdur. Binâenaleyh imkân dâiresinde nâil-i muvaf- fakiyet olduğundan mutmain bulunan heyʼet-i merkeziyemiz ızhâr buyurulan iʻtimâdınıza ve vesîle ile de takdîm-i teʼyîd-i teşekkürât eylemeği vecîbeden addeylemişdir. Muhterem Beyler! Merkezimizin îfâsını derʻuhde eylediği hidemât-ı hayriye ve insâniyenin istilzâm eylediği masârıfâtın belli başlı ve dâimî bir karşılığı olmamakla berâber merkezimiz sene-i hâzıranın mürûr eden on bir ayı zarfında altmış üç bin küsûr lira vâridât teʼmînine muvaffak olmuş ve bununla masâ- rıf-ı [360] idâresini ve dispanserler masrafıyla lüzûmu olan yardımları îfâ edebilmişdir. Vâridât yekûnunu dolduran erkâm arasında nazar-ı dikkate çarpan ve masârıfâtımızın kısm-ı aʻzamını teʼmîn eden iki kalem vâridât vardır ki, bunlar da biri müsâmereler hâsılâtı, diğeri de kurbân derileri bedelâtıdır. Birincisini heyʼet-i merkeziyemiz günlerce fedâkârâne ibrâz-ı mesâʻîyle ve bü- yük yorgunluklar mukâbilinde elde edebilmiş, diğeri ise müteʻaddid cemʻiyât-ı hayriye ile anlaşmak sûretiyle kısmen teʼmîn olunabilmişdir. Aksâm-ı sâire-i vâridâtımız merkezin ve dispanserlerin ancak masârıfât-ı müteferrikasını teʼmîn edebilecek bir mikdârdan yukarı çıkarılamamış ve çıkarılmasına