HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 55 2674 imkân görülememişdir. Bu meyânda teessürle zikretmeden geçemeyeceğimiz bir kısım da vilâyeti- miz dâhilindeki yirmi dört şuʻbenin matlûb vechile muzâheret ve muʻâvenetine mazhar olamamak- lığımızdır. On bir ay zarfında bu kadar şuʻbeden ancak beş bin lira derecesinde irsâlâtda bulunulmuş olması bu bâbdaki kanâʻatimize sarîh bir delîldir. Maʻlûm-ı âlîleridir ki, bu gibi cemʻiyât-ı hayriyeyi yaşatacak en kuvvetli vesâit herkesin cüzʼî ve küllî muzâheret ve muʻâvenetidir. Bunu teʼmîn edebil- mek için heyʼet-i merkeziyemiz evvelki sene şehrimizin her semtinde "mahallât cemʻ-i iʻânât" heyʼet- leri nâmıyla bir teşkîlât vücûda getirmişdi. Bu heyʼetler mıntıkaları dâhilinde mütemekkin efrâd-ı ahâlîden senevî asgarî yirmi ve aʻzamî yüz kuruş verebilecek olanlar cemʻiyete aʻzâ kaydedecek ve bu sûretle cemʻiyetin dâimî menâbiʻ-i vâridâtı taʻyîn ve tesbît edilmiş olacakdı. Hâl şu ki, iki seneden beri ismen mevcûd olan bu heyʼetlerden Karşıyaka'dan mâʻadâsı bir eser-i mevcûdiyet göstermemiş ve müteʻaddid teşvîkât ve tergîbâta rağmen ızhâr-ı muʻâvenet eylememiş olduklarından matlûb olan netîceye destres olunamamışdır. Yüz binlerce nüfûsa mâlik olan vilâyetimizde cemʻiyetimiz aʻzâ-yı muʻâvine ve âmilesi mikdârının iki bini tecâvüz edememiş olması, her birerlerimiz için mûcib-i hicâb olmakla berâber cemʻiyet için de fecîʻ bir vazʻiyetdir. Buna çâresâz olmak ve cemʻiyetimizin esbâb-ı teʻâlîsini ihzâr eylemek için aʻzâ-yı muʻâvine ve âmilenin teksîr u tezyîdine çalışmak hepimiz için mukaddes bir vazîfe ve millî bir borç olmalıdır. Yardımlarımız: Heyʼet-i merkeziyemiz, teşebbüsât-ı husûsiye ve hidemât-ı fiʻliyesiyle toplatabildiği para ile fukarâ-yı halka en vâsiʻ yardımlarını dispanserleri vâsıtasıyla yapmakdadır. Merkezimiz idâresinde bulunan üç dispanserden birincisi Harb-i Umûmî senelerinde teʼsîs edilmiş olan İkiçeşmelik'de[ki] dispanserimizdir ki, bu dispanserde her gün yüzü mütecâviz hasta muʻâyene ve tedâvî edilmekde ve muvaffakiyeti hasebiyle umûmun mazhar-ı takdîr ve hürmeti olmakdadır. İkincisi iki sene evvel Torbalı-Tepeköy Çiftliği'nde müceddeden inşâ ve küşâd olunan dispan- serdir. Sıtma ile en ziyâde maʻlûl olan ve bu yüzden binlerce nüfûsu hâk-i helâke serilen Torbalı muhîtine bu dispanserin yapdığı yardım pek büyükdür. Üçüncüsü bu sene ibtidâlarında Karşıyaka'da küşâd olunan dispanserden Karşıyaka ile civâr kurâda mukîm muhâcirîn ve muhtâcînin teʼmîn-i sıhhatlerine âmil-i yegâne olan bu dispanser de pek kısa bir zamân zarfında büyük muvaffakiyetler göstermişdir. Dispanserlerimizde on bir ay zarfında 38.841 hastanın muʻâyenesi icrâ edilmiş ve muʻâleceleri de meccânen verilmişdir. [361] Rumeli'den gelen mübâdil halkın tedâvîlerine mahsûs olarak evvelce Kemer'de muhâ- cirîn barakalarında teʼsîs etmiş olduğumuz hastahâne ile dispanser, mübâdilînin arkası alınmış olma- sına mebnî ahîren lağv edilmişdir. Bu sene zarfında mülhakâtda muhâsebe-i husûsiyece teʼsîs olunan memleket hastahânelerine cemʻiyetimizce yatak, yorgan, battâniye, karyola vesâire gibi mübrem olan eşyâ teberruʻ edilmek sûretiyle muʻâve[ne]timiz teşmîl edilmişdir. İzmir'in kurtuluş günü şerefine evlâd-ı şühedâ ile bîkes ve muhtâc çocukların sünnet etdirilmesi karârlaştırıldığından Öksüzler Yurdu'nda sünnetsiz oldukları anlaşılan 116 ve mahallâtdan mürâcaʻat eden 47 ki, cemʻan 163 çocuğun emr-i mesnûn-ı hitânları icrâ edilmişdir. Fukarâ-yı halkın sıhhatlerini vikâyeten mahallât heyʼet-i ihtiyâriyelerinin delâletiyle bir heyʼet-i