HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 55 2690 Kanada Kanada Gençlik Salîb-i Ahmeri hıfzıssıhha tedrîsâtının mekteb programlarına idhâlini teşvîk için mekteblerle teşrîk-i mesâʻîye âmâde bulunduğunu iʻlân etmişdir. _______________ Amerika 1924-1925 senesi zarfında Amerika Gençlik Salîb-i Ahmeri 5.596.663'den 7.738.648'[e] vâsıl olarak yeniden 142.000 aʻzâ kazanmışdır. Aʻzâ mikdârında görülen bu tezâyüdden mâʻadâ, sûret-i umûmiyede gençlik zümrelerinde daha bâriz bir faʻâliyet de müşâhede edilmekdedir. Mekâtib-i tâliye şâkirdânına mahsûs olarak 1925 senesi Kânûn-ı Sânî'sinden iʻtibâren intişâra başlayan mecmûʻa ile Gençlik Salîb-i Ahmeri, gençliği tamâmen kendisine rabt etmeğe muvaffak olmuşdur. Yine aynı sene içinde Tahlîsiye İdâresi'yle müştereken yüzme lehinde bir mücâdele-i milliye tehyiʼe etmişdir. En iyi yüzme bilenlere ve denize düşenleri kurtaranlara mükâfât iʻtâ etmek sûretiyle vâsiʻ bir program tanzîm edilmişdir. Yüzme müsâbakalarında en yüksek numaraya mâlik olan mek- teblere bir şeref bayrağı verilmekdedir. Bu müsâbakaların her sene icrâsı ve Gençlik Salîb-i Ahmer programına idhâli tasavvur edilmekdedir. Gençlik Salîb-i Ahmeri'nin teşekkül etdiği târîhden beri ilk defa olarak aʻzâdan bir genç çocuklara yapılan muʻâvenete iştirâk etmek üzere âfetzede mahallere murahhas olarak iʻzâm kılınmışdır. Bu murahhas Missouri, İllinois, İndiana'da kasırganın tahrîb etdiği havâlînin başlıca merâkizini geşt ü güzâr ederek çocukların şerâit-i mâddiye ve rûhiyelerini ıslâh için oyun ve eğlence mahalleri, teneffüshâneler teʼsîs etmişdir. Münferid ve ücrâ havâlîdeki mekteblere Gençlik Salîb-i Ahmeri'nin teşkîlâtını idhâl için tanzîm edilen proje, kısmen mevkiʻ-i tatbîke vazʻ olunmuşdur. Amerika sekene-i asliyesine mahsûs mekâtib vâsiʻ mikyâsda Gençlik Salîb-i Ahmer harekâtın- dan müstefîd olmakdadır. Gençlik Salîb-i Ahmeri mümessillerinin mesâʻîsiyle bu havâlîde taʻkîb edilen usûl-i tedrîsde mahsûs bir salâh görülmekdedir. 1924 senesi sonbahârında Alaska yarımadası mektebleri gençlik harekâtına iştirâk etdikle- rinden birçok Eskimo çocukları Gençlik Salîb-i Ahmeri programını ve bilhâssa mektebler arasında muhâberâtı tatbîk ve ücrâya mübâderet etmişlerdir. El-yevm Amerika çocukları 34 memleketle muhâbere etmekde olup Amerika Salîb-i Ahmeri vâsıta ve delâletiyle Avrupa'daki arkadaşlarına 100.000 kutu Noel hediyesi göndermişlerdir. Amerika Gençlik Salîb-i Ahmeri, memâlik-i ecnebiyeye taʻalluk eden program aksâmının idâ- resini Salîb-i Ahmer Cemʻiyetleri Heyʼet-i İttihâdiyesi'ne tevdîʻ etmişdir. Programa idhâl edilmiş olan memleketler şunlardır: Litvanya, Letonya, Estonya, Lehistan, [375] Çekoslovakya, Avusturya, Macaristan, Yugoslav- ya, Romanya, Bulgaristan, Yunan, Fransa, İtalya. İşbu memâlik-i muhtelife Gençlik Salîb-i Ahmerlerinin derece-i faʻâliyetlerini tezyîd etmek için ekserîsine Amerika Salîb-i Ahmeri tarafından tahsîsât iʻtâ edilmekdedir. Verilen tahsîsâta mahall-i sarf olmak üzere mekteb bâğçeleri, mekteb hammâmları, oyun ma- halleri teʼsîsini, meʼmûrîn teşkîlâtını, Gençlik Salîb-i Ahmer Mecmûʻaları neşrini, hıfzıssıhhadan bâ-