HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 56 2726 Sâlifü'z-zikr 1923-1924 seneleri zarfında Lehistan Salîb-i Ahmeri'nin aʻzâsında 13.500'den fazla bir tezâyüd görülmüş ve 1923'de idâresinde bulunan müessesâtın mikdârı 40 iken 1924 senesi nihâyetinde 86'ya bâliğ olmuşdur. Hastalara ve müessesât-ı hayriyeye muʻâvenet Lehistan Salîb-i Ahmeri'nin hastalara muʻâvenet teşkîlâtı memleketin kuvâ-yı sıhhiyesinin mü- him bir kısmını şâmildir. Salîb-i Ahmer Merkez-i Umûmîsi'nin biri Varşova'da 120, diğeri Brezg'de 100 yataklı iki hastahânesi vardır. Bu iki hastahâneden başka iklîminin letâfetiyle, menâzır-ı hayâti- yet-bahşâsıyla bî-nazîr bir mevkiʻde kâin ciğer veremlilerine mahsûs 175 yataklı bir sanatoryum da taht-ı idâresindedir. Bu üç hastahâneye ilâveten veremlilere mahsûs 150 yataklı bir hastahânenin ve veremli çocuk- lara mahsûs 200 yataklı bir sanatoryumun ve bir cerrâhî sanatoryumun idâresi de merkez-i umûmîye âiddir. Lehistan'ın muhtelif şehirlerinde Salîb-i Ahmer'e âid olan mevcûd dispanser ve muʻâyenehâne- ler şunlardır: Umûmî muʻâyenehâne 10 Diş muʻâyene ve tedâvîhânesi 4 Poliklinik 1 Veremlilere mahsûs dispanser 1 Ültraviyole tedâvî merkezi 2 Vâlidelerle yeni doğan çocuklar için muʻâyene merkezi 8 Kreş 3 Dârüleytâm 9 Mekteb matbahı 8 Ayrıca Silezya Salîb-i Ahmer Merkezi'nin idâre etdiği taʻtîl kolonilerinden senede 2.000 mek- teb çocuğu istifâde etmekdedir. Hastabakıcılar Lehistan Salîb-i Ahmer Merkez-i Umûmîsi'nin bulunduğu binâ dâhilinde bir hastabakıcılık şuʻ- besi vardır. Bu şuʻbenin faʻâliyeti sâyesinde hastabakıcıların mesleği taʻlîm ve terbiyeleri sâhasında büyük bir eser-i terakkî görülmüş ve iki hastabakıcı mektebi teʼsîs ve küşâd edilmişdir. Mesleklerinde tekâmül etmeği arzu eden hastabakıcılar bu şuʻbeye mukayyeddir. Vilâyetde bulunan hastabakıcıların gerek mesâʻî ve gerek ahvâl ü harekât-ı husûsiyeleri müfettişler tarafından murâkabe edilir. Tebdîl-i mekân eden veya muvakkaten işsiz kalan hastabakıcılara mahsûs üç ana evinin idâresi ve masârıfı Salîb-i Ahmer'e âiddir. Gençlik Salîb-i Ahmeri 1924 senesi nihâyetinde Gençlik Salîb-i Ahmer aʻzâsının mikdârı 120.000'[e] bâliğ olmuşdur. Bu aʻzâ 28 merkezde 530 mekteb zümrelerini cemʻ eden 146 mevâkiʻ-i muhtelifeye tevzîʻ olunmuşdur.