HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 56 2730 Amerika Amerika'da tahlîsiye seferberliği muvaffakiyetle devâm ediyor. New York zâbıtasına yüzme ve tahlîsiye usûllerini taʻlîme resmen Salîb-i Ahmer meʼmûr olmuşdur. Yüzme bilmeyen nâmzedler zâbıta mesleğine kabûl edilmemekdedir. Nâmzedler yüzme usûlleri için tertîb edilen on kursa nevbet ile devâm ederek lâ-ekal sekiz ders almış bulunacaklardır. Tahlîsiye için de altı kurs açılmışdır. Geçen senenin Kânûn-ı Evvel'ine kadar 350 New York polis nâmzedi yüzme öğrenmiş ve sekiz yüz nâmzedin de tahlîsiye imtihânları Salîb-i Ahmerce icrâ kılınmışdır. *** 1900 senesinde kanser nisbet-i vefeyâtı yüz bin kişide 212 iken 1920 senesinde bu mikdâr 311 kişi'ye bâliğ olmuşdur. Nüfûs nazar-ı iʻtibâra alınırsa senevî kanserden vefeyât Amerika'da 300-400 bin kişi gibi korkunç bir yekûna bâliğ olmakdadır. *** Kamyonetler ile Sıhhî, Terbiyevî Hidemât Son zamânlarda Amerika'da Sıhhî Terbiye Dâiresi köy ve kurâ halkına hıfzıssıhhaya âid mesâili anlatmak için âdetâ sıhhî meşher tarzında kamyonetler istiʻmâl etmeğe başlamışdır. Bir tona yakın hacimde olan kamyonete takrîben 26 sıhhî mesâile âid 38 film tahmîl edilerek bir tabîb ve fil opera- töründen ibâret muʻâvininin emrine veriliyor. Bu heyʼet köy, kasa ve kurâya uğrayarak mevcûd sıhhî filmleri halka meccânen arz etmekde ve lâzım gelen îzâhâtı da vermekdedir. Bu heyʼetlerin memleket dâhilinde 3.500 mil mesâfe katʻ etdikleri nazar-ı iʻtibâra alınırsa halka yapdığı vezâif-i sıhhiyenin ehemmiyeti kolaylıkla anlaşılabilir. _______________ Avustralya Avustralya'da orman yangınları pek sık vukûʻa gelir. Geçenlerde Avustralya fundalıklarını tamâmen mahv etmiş olan büyük yangında 27 muhterik insân cesedi bulunmuşdur. [406] Daha birçok kişinin gâib bulunmasına nazaran nüfûs zâyiʻâtının çok mühim olduğuna hükmediliyor. Bu gibi yangınlarda şaşırıp kalarak hiçbir tarafa kaçamayanlar[ın] kendilerini nehirlere atdıkları da vâkiʻdir. Bu müdhiş yangında binlerce koyun ve bârgîr telef ve birçok vâsiʻ ormanlar mahv olmuşdur. Muhterik olan ormanların yeniden ihyâsı için lâ-ekal 30 ile 50 sene arasında bir zamân lâzımdır. Felâketin şüyûʻu üzerine Avustralya Salîb-i Ahmeri'nin telgrafla muʻâvenet teklîfinde bulunan Salîb-i Ahmer Cemʻiyetleri Heyʼet-i İttihâdiyesi'ne verilen cevâbda hasâr u zararın ehemmiyet-i azî- mesine rağmen tedâbîr-i mahalliyenin ihtiyâcâtı bertaraf etmeğe kâfi geleceği bildirilmişdir.