HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 57 2770 İtfâiye heyʼetinin altmışıncı sene-i devriyesi şerefine tertîb edilmiş olan bu sergiyi 5.486 kişi ziyâret etmiş idi. Verilen konferanslara mevzûʻ teşkîl eden mesâil şunlardır: * Büyük şehirlerde yangınlar için tedâbîr * Fabrikalarda yangınlara karşı tedâbîr-i ihtiyâtiye * Yangınlara mâniʻ olacak vesâit-i asriye ve tedâbîr-i fenniye * İtfâ-yı harîkde eczâ-yı kimyeviye istiʻmâli * Yangın muhbirleri * Feyezânlar, feyezânlara karşı tedâbîr-i mâniʻa ve muʻâvenet teşkîlâtı * Fen ve itfâ-yı harîk * Mekteblerde itfâ-yı harîk âletleri * Kazâ ve felâketlerin önüne nasıl geçilir? * Samaritenler teşkîlâtının târîh ve inkişâfı _______________ Belçika Belçika'da vukûʻ bulan feyezânlarda, Belçika Salîb-i Ahmeri'nin mesbûk olan iki buçuk aylık icrâât ve mesâʻîsine dâir Mart ibtidâlarında bir rapor neşredilmiş idi. Bu rapora nazaran cemʻ olunan 11.789.000 frank iʻânâtdan Mart'a kadar sekiz milyon frank sarf edilmiş ve Liège şehrinde 45.000 ve Namur'da 11.385 kişi Salîb-i Ahmer tarafından muʻâvenet görmüşdür. İhtiyâcât-ı zarûriyeye müteʻallik mevâd için [439] Salîb-i Ahmer merkezlerinde teʼsîs edilen anbârlardan büyük mikdârda meʼkûlât, mahrûkât ve yatak tevzîʻ olunmuşdur. Masârıf büdcesine yalnız mahrûkât için iki milyon frank vazʻ edilmişdir. Tevzîʻ olunan diğer eşyâ şunlardır: 4.300 yatak, 3.800 şilte, 14.000 yorgan, 8.252 fistân ve manto, 10.200 iç çamaşırı, 23.000 ço- rab, mendil vesâire, 2.000 çift ayakkabı. Yarı çıplak tahlîs olunan birkaç bin çocuğa Salîb-i Ahmer elbise ve çamaşır vermişdir. Feyezân- lardan dolayı taʻtîl-i mesâʻîye mecbûr olan amelelerin hâl ve vazʻiyetleri hakkında tahkîkât-ı ciddiye icrâ edildikden sonra bunların zevce ve çocuklarına ve küçük ticâret ashâbıyla esnâfa tahsîsât iʻtâ edilmişdir. Bu muʻâvenetlerden mâʻadâ ayrıca 1.200 kişi Salîb-i Ahmer tarafından iskân edilmişdir. _______________ Kanada'da Orman Yangınları Avustralya fundalıklarının müdhiş yangınlarla mahv u harâb olduğunu geçen nüshamızda haber vermiş idik. Ontorio eyâletinde zuhûr eden yangınlara dâir âtîdeki maʻlûmâta destres olduk: