HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 58 2819 Remzi Bey: "-Müsâʻade buyurulursa beş kişi de kurʻa ile çıkarılacak. Onların yerine de intihâb edilecek". Hakkı Şinasi Paşa: "-O sonra". Remzi Bey: "-Çıkacaklar belli olursa belki bunların yerine tekrâr intihâb edilirler". Reîs: "-Bu intihâba başlamazdan evvel, rûznâmenin altıncı mâddesindeki nizâmnâme-i esâsînin elli ikinci mâddesi mûcebince kurʻa keşîdesiyle merkez-i umûmî aʻzâsından beşinin yerine yeniden intihâbât icrâsı vardır. Bunların evvelâ kurʻa ile çıkarılmasını teklîf ediyorlar. Bunda şu fâide vardır ki, belki kongre aʻzâsı hâricinde kalacak aʻzânın bir sene hizmeti[n]den memnûndurlar. On kişi in- tihâb edileceği zamân onları da yeniden intihâb ederler". Hakkı Şinasi Paşa: "-Efendim, zâten nizâmnâmede mündericdir. Kurʻa keşîdesiyle çıkacak beş kişinin tekrâr intihâbı câizdir". Kocaeli Mebʻûsu Safvet Bey: "-Efendim, zâten on kişi müstaʻfî addolunmuşlardır. Kurʻa ile çıkacak olanların tekrâr intihâbı câizdir". Reîs: "-Efendim, intihâbı yapalım. Kutuları gezdirecekler, reʼylerinizi istiʻmâl buyurunuz. Efendim, reʼylerini vermeyen var mıdır? (Hayır sesleri) İstihsâl-i ârâ hitâm bulmuşdur. Netîcesini arz ediyorum. Kütahya Mebʻûsu Nuri Bey, Eskişehir Mebʻûsu Emin Bey, Isparta Mebʻûsu Mükerrem Bey, Sivas Mebʻûsu Ömer Şevki Bey, Doktor Asım Bey, Doktor Ömer Vasfi Bey, Alemdârzâde Hasan Bey, İstanbul Eczâhânesi Sâhibi Hüseyin Hüsnü Bey, Ahmed Bey, Ziya Bey ihrâz-ı ekseriyet etmişlerdir. Bunlar merkez-i umûmîdeki münhal aʻzâlıklara intihâb olunmuşlardır. Nizâmnâmenin elli ikinci mâddesi mûcebince beş kişinin yerine yeniden intihâb olunacakdır. Evvelâ kurʻa çekilecekdir. (Kurʻa keşîdesine başlandı.) Dîvân-ı Muhâsebât Reîsi Fuad Bey, Sıhhiye Müsteşârı Ahmed Fikri Bey, Ertuğrul Mebʻûsu Fikret Bey, İstanbul Mebʻûsu Hakkı Şinasi Paşa, Si- vas Mebʻûsu Rahmi Bey. Kurʻa bu zevâta isâbet etmişdir". Hakkı Şinasi Paşa: "-Efendim, bendeniz reîs-i sânî sıfatıyla arz ediyorum. Bu arkadâşlar içinde bendenizden gayrısı en kıymetli arkadâşlarımızdır. Bunların tekrâr intihâbını teklîf ediyorum". Safvet Bey: "-Bu beş arkadâşın tekrâr intihâbını teklîf ediyorum". Reîs: "-Bu beş arkadâşın tekrâr intihâbını kabûl buyuranlar el kaldırsın. Kabûl etmeyenler el kaldırsın. Kabûl edilmişdir. Efendim, rûznâmenin birinci mâddesinde tedkîk komisyonu aʻzâsı in- tihâbı vardır. Nizâmnâmeye göre bu tedkîk komisyonu üç zâtdan ibâret bulunacakdır". Hakkı Şinasi Paşa: "-Üç asıl, iki de ihtiyât". Reîs: "-Bunlar raporu tedkîk edecekler. Heyʼet-i umûmiyeye bir rapor verecekler. Aynı zamân- da büdceyi de tedkîk edeceklerdir. Nizâmnâmeye [477] göre bu zevât merkez-i umûmî aʻzâsından olmayacakdır". Hakkı Şinasi Paşa: "-Geçen sene Niğde Mebʻûsu Galib Bey, Gaziayıntab Mebʻûsu Remzi Bey, Giresun Mebʻûsu Kâzım Bey idiler. Bendeniz üçünün yeniden intihâbını teklîf ediyorum". Faik Bey (Tekirdağı): "-Efendim, raporlarını okuyalım da ondan sonra". Safvet Bey: "-Bendeniz raporların okunarak müzâkeresine kadar celsenin taʻtîlini teklîf ediyorum".