HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 59 2891 [539] SALÎB-İ AHMERLER HAVÂDİSİ Arnavud Salîb-i Ahmer Cemʻiyetleri Heyʼet-i İttihâdiyesi'nin muʻâvenet ve müşâreketi ile Arnavud Salîb-i Ahmeri Tiran'da bir hastabakıcı mektebi teʼsîsine ve tâlibâtdan en muktedirlerini bilâhare ikmâl-i tahsîl etmek üzere memâlik-i ecnebiyeye iʻzâma karâr vermiş idi. Fransa Mecrûhîn-i Askeriye Muʻâvenet Cemʻiyeti nâmını taşıyan Fransız Salîb-i Ahmeri'nden hastabakıcı şehâdetnâmesini hâiz Matmazel Laveran el-yevm bu mektebin küşâdı hazırlıklarıyla meşgul bulunmakdadır. Şimdiki hâlde mektebe gâyet mahdûd mikdârda tâlibât kabûl ve bu vesîle ile tahsîl ve terbiyelerini ilerletmek isteyen kibâr ve necîb âile kızları arasında bir hareket-i fikriye hâsıl edilecek ve nâmzedlere meslekî terbiyelerinden ihzârî dersler verilecekdir. Merâhil-i tekâmülünü taʻkîb edenArnavud Salîb-i Ahmeri el-yevm kendi merkez-i umûmîsinde bir dispanser ile bir eczâhâne ve Amerika Salîb-i Ahmeri'nin muʻâveneti ile bir de dârüleytâm küşâd etmişdir. İdâresi tamamen Arnavud Salîb-i Ahmeri'ne intikâl etmiş olan bu dârüleytâmda 16 kız ve 72 erkek çocuk bulunmakdadır. Sinleri altı ile on altı arasında bulunan etfâl-i mezkûreye tedrîsât-ı nazariyeden mâʻadâ kunduracılık, marangozluk, dikiş işleri vesâire de gösterilmekdedir. İkmâl-i tahsîl eden kız çocuklarından biri ebelik tahsili için İtalya'ya gönderilmiş ve diğer iki kız hastabakıcılık mektebine tefrîk olunmuşdur. Şimdiye kadar Elbasan, Ayasaranda ve Avlonya'da birer Salîb-i Ahmer merkezi teʼsîs edilmiş ve merâkiz-i mevcûde ile küşâd edilecek diğer merkezlerle Arnavud kadın komiteleri tarafından birer sanʻatevi açılacakdır. Âsâr-ı milliyesinin tabʻ ve neşri için bile pek mahdûd vesâite mâlik olan ve pek az gazete intişâr eden bir memleketde Arnavud Salîb-i Ahmeri Mecmûʻası 'nın muntazaman neşrinde gösterilen gayret ve muvaffakiyet şâyân-ı takdîrdir. _______________ Yunan Malarya, verem ve emrâz-ı zühreviyeye karşı Yunan Salîb-i Ahmeri'nin mücâdele programına konferanslar vererek halkı irşâd etmeğe idhâl edilmişdir. İbtidâ, Atina'da verilmesi taht-ı karâra alınan bu konferanslar silsilesine bilâhare diğer şehirlerde de devâmolunacak veYunan Salîb-iAhmeri nâmına lig tarafındanmübâyaʻa edilen filmlerle konferans mevzûʻları tasvîr ve teşhir edilecekdir. *** Yunanistan'da Larium? şehrinde trahoma karşı bir dispanser küşâd edildiğini evvelce haber vermiş idik. Ahiren, trahomalılar hakkında icrâ kılınan tedkîkât ve taharriyât neticesinde illet-i mezkûreye musâb olanların mikdârı 700'e bâliğ olduğu anlaşılmışdır. Bunların Larium? Dispanseri'ne mürâcaʻat ederek muntazaman tedâvîlerini taʻkîb etmeleri hükûmet tarafından taht-ı mecburiyete alınmışdır. _______________ Norveç Norveç Salîb-i Ahmeri tarafından balıkçılara mahsus olarak teʼsîs ve küşâd edilen hasta [540] hâne masârıf-ı inşâiyesi 60 bin krona yani takrîben 450.000 franga bâliğ olmuşdur.