HİLÂL-İ AHMER MECMÛʻALARI / CİLT 6

2494 Beşinci Sene 27Rebîʻulâhir sene 1344 / 15Teşrîn-i Sânî sene 1341 (1925) Numara 51 Makâlât ve İʻlânât, Mecmûʻa Müdüriyeti'ne Gönderilmelidir. TÜRKİYE HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Her Ayın On Beşinde Neşrolunur. Senelik abonesi bir liradır. Merciʻi: Yerebatan Câddesi'nde Hilâl-i Ahmer Merkezi. Telefon: İstanbul 2653 Mündericât: İctimâʻî Hıfzıssıhha – Muʻaddel Nizâmnâme-i Esâsînin Metni – Toksinler[de]n Vücûdu Tathîr – Hilâl-i Ahmer Havâdisi – Salîb-i Ahmerler Havâdisi – Fransızca Kısmı – İngilizce Kısmı İCTİMÂʻÎ HIFZISSIHHA -24- Spor Beşeriyet kadîmden beri boş zamânlarını gûnâgûn zevk ve eğlencelere hasretmiş ve bu meyân- da bedeni bazı harekât ile muttasıf oyunlara kıymet vermişdir. İctimâʻiyât teessüs edinceye kadar bu kabîl oyunlarda hiçbir nizâm u intizâm aranılmaz ve vücûda olan menâfiʻ ve mazarrâtı düşünülmez idi. Maʻamâfîh bunların ekserîsi geniş meydânlarda, temiz çayır ve kırlarda oynanıldığı için açık ve sâf havânın teʼsîrâtı ziyâdesiyle hissolunuyor ve bedenin neşv ü nemâsı, sıhhat ü âfiyeti nesilden nesle tekâmül ediyordu. Nitekim ecdâdımız henüz fennin bu sâhalardaki tecelliyâtı tebellür etmeden çok evvel ibtidâî addedilen bu oyunlar sâyesinde çok kuvvetli ve gürbüz bedenlere mâlik olmuşlardır. Medeniyet teessüs etdikden, fen terakkiyâta mazhar oldukdan sonra harekât-ı bedeniye ile mut- tasıf eğlencelerin kıymeti artmış ve hayât ve sıhhat ile olan alâkası ehemmiyet kesb etmişdir. Bu oyunların bedenî ve rûhî hıfzıssıhha ile olan alâkaları o kadar samîmî ve müşterekdir ki, sıhhat ü âfiyetini niʻmet addeden ve onun muhâfazasını umde ittihâz eden câmiʻalar bu husûsdaki kavâʻid ve nizâmâtı hiçbir zamân istihfâf edemezler. Bugün gerek açık havâda ve gerekse kapalı mahallerde cereyân eden bütün mütenevviʻ oyunlar spor nâmı tahtında devâm ediyor. Muhtelif harekât-ı bedeniye vücûddaki muʻayyen vezâif-i fizyo- lojiye için ne kadar lâzım ve nâfiʻ ise, bunların hiçbir kâʻide ve nizâma tâbiʻ olmayarak sûistiʻmâl edilmesi de o derece muzır ve şâyân-ı tedkîk ve taʻkîbdir. Herhangi bir spora başlamadan evvel şahsın mütehassıslar tarafından bir muʻâyene-i tabîʻiye- den geçmesi ve hâl-i hâzır bünyenin spora elverişli olup olmadığı veyâhûd hangi nevʻ spora devâmı fâideli olacağı anlaşılmak iktizâ eder. Binâenaleyh bu husûsda sin, cins ve bilhâssa şahsın [222] te- şekkülât-ı bedeniye ve naturasına göre sporun eşkâli taʻyîn edilmek en mühim kısmı teşkîl eder. Harekât-ı bedeniyede yevmî müddet-i devâm mesʼelesi de ehemmiyetlidir. Her gün muʻay- yen sâʻatlerde spora devâm edebilecek kudretde eşhâs olduğu gibi haftanın ancak muʻayyen gün ve