HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 51 2496 Bu gibi memleketlerde şehir teşkîlâtında, şehir planlarında spor meydânı mesʼelesi ehemmi- yetli bir şekil almakdadır. Yeni dünyâda meydânlar o kadar mütenevviʻ ve cesîmdir ki, hattâ bazı şe- hirlerde halkın bi'l-hesâb onda birini alacak derecede müteʻaddid mahaller teʼsîs edilmişdir. Bunların içinde 50-75 bin nüfûsu ferîh fahûr istîʻâb edecek derecede büyükleri olduğu gibi kesâfet-i nüfûsa mâlik şehirlerin senelik maçlarını idâre edecek kâbiliyetde 100-200 bin kişilik stadyumların inşâsına bile lüzûm görülmüşdür. Kara, deniz ve havâda olmak üzere sporun pek mütenevviʻ eşkâli mevcûd olup günden güne terakkî ve tekâmüle mazhar olmakdadır. Karada olan sporlardan dağcılık, ormanlar, kırlarda gezin- tiler, tenis maçları gibi olanları sıhhat ve hayâta pek nâfiʻdirler. Denizcilikde bilhâssa kürek çekme, muʻtedil yüzmeler terbiye-i cismâniye için şâyân-ı tavsiyedir. Tayyâreler, sefîne-i havâiye ve balon- lardaki seyr u hareketler son zamânlarda terakkiyâta mazhar olmakdadır. Maʻamâfîh sporların içinde en hoş ve zarîf olanları güzellik müsâbakalarıdır. Bu müsâbakalar halkda ve bilhâssa kadınlar ve genç kızlarda bünyenin ne sûretle terbiye ve tasfiye edileceğine dâir bir rekâbet-i ictimâʻiye ve sıhhiye uyandırmakdadır. Birkaç bin genç kızın içinde güzellik ve zarâfet-i bedeniyede birinciliği kazanan bir gencin hayâtında duyacağı lezzetin kıymet ve iʻtibârı aceb ölçülebilir mi? Memleketimizde spor, gençliğin atdığı ilk adımın semeresi olarak on beş seneden beri devâm etmekde ve gitdikçe terakkî etmekdedir. Muhtelif şehir ve kasabâtda mütenevviʻ nâm ve unvânlar tahtında birçok spor kulüb ve cemʻiyetleri teessüs etmişdir. Maʻamâfîh bunların aʻzâ adedinin mah- dûd olduğundan başka fennî hiçbir usûl ve nizâma tâbiʻ olmayanları da maʻatteessüf mevcûddur. Hükûmet ve millet el birliğiyle hıfzıssıhhanın pek mühim bir şuʻbesi olan sporlara lüzûmu derecesinde kıymet ve ehemmiyet vererek bütün memlekete intişârına çalışmalı ve bu husûsda lâzım gelen neşriyât ve istatistikler ile teʼsîsât ve idâme tahsîsâtı büdceye girmelidir. En küçük kasaba ve köylerimizde hiç olmazsa gençliğe basît beden ve jimnastik harekâtı yapdırılmalı ve yeni nesle spo- run lezzeti behemehâl tatdırılmalıdır. Senelerden beri gûnâgûn esbâb tahtında zaʻîf ve fakre düşen milletimize ve bilhâssa gençliğe [224] bugünkü fennî şekilde spor merâkı telkîh edilirse ecdâdımızın târîhe kaydetdirdikleri "Türk gibi kuvvetli" neslin pek az zamânda tekrâr çoğalacağına şübhe yokdur. TÜRKİYE HİLÂL-İ AHMER CEMʻİYETİ MUʻADDEL NİZÂMNÂME-İ ESÂSÎSİ Ahkâm-ı Umûmiye Birinci Mâdde- Türkiye Hilâl-i Ahmer Cemʻiyeti 1864 târîhinde Osmanlı Devleti tarafından kabûl edilen Cenevre Mukâvelesi ahkâmına tevfîkan 14 Nisan 1293 (1877) târîhinde Osmanlı Hilâl-i Ahmer Cemʻiyeti unvânıyla teʼsîs ve 20 Nisan 1327 (1911) târîhinde ihyâ olunmuş ve bu unvân 1339 [1923] târîhinde münʻakid meclis-i umûmî karârıyla Türkiye Hilâl-i Ahmer Cemʻiyeti'ne tahvîl edil- mişdir. İkinci Mâdde- Türkiye Hilâl-i Ahmer Cemʻiyeti bütün muʻâmelâtında 22 Ağustos 1865 ve 6 Temmuz 1906 târîhlerinde Cenevre'de münʻakid konferanslarda ittihâz edilen esâslara ve taʻdîllere ve 18 Teşrîn-i Evvel 1907 târîhinde Lahey'de münʻakid konferansın muhârebât-ı bahriye hakkındaki karârlarına tevfîk-i hareket eyler.