HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 51 2508 Nâhiye Heyʼetleri Yüz Beşinci Mâdde- Nâhiye meclis-i umûmîleri tarafından reʼy-i hafî ile müntehab beş aʻzâ kendi aralarından icrâ vazîfesiyle mükellef olmak üzere bir reîs, bir veznedâr ve bir kâtibden ibâret heyʼet-i idâriyesini intihâb ve berây-ı tasdîk merbût bulunduğu kazâ şuʻbe heyʼetine bildirir. Yüz Altıncı Mâdde- Nizâmnâmenin 59, 60'[ncı] mâddeleri nâhiye heyʼetleri hakkında dahi cârîdir. Yüz Yedinci Mâdde- Nâhiye heyʼetlerinin vazîfesi; 1-İdâresindeki şuʻabât teşkîlâtını tedkîk ve muʻâmelâtını tanzîm ve şuʻbe olmayan yerlerde yenilerini teʼsîs, 2-Cemʻiyete vâridât taharrî, aʻzâsını teksîr ve vâridâtını ahz u cibâyet, 3-Kongresi hitâmında bir senelik icrâât ve vâridât, masârıfâtı bâ-rapor kazâ şuʻbe heyʼetine arz etmekdir. Yüz Sekizinci Mâdde- Nâhiye heyʼetleri efʻâl, icrâât ve sarfiyâtından merbût bulundukları kazâ şuʻbe heyʼetlerine karşı mesʼûldürler. Köy (Mahalle) Şuʻbeleri Yüz Dokuzuncu Mâdde- Köylerde (mahalleler) şuʻbeler açılabilmek için lâ-ekal beş aʻzânın vücûdu lâzımdır. Köy (Mahalle) Meclis-i Umûmîleri Yüz Onuncu Mâdde- Köy (mahalle) meclis-i umûmîleri [235] dâhilinde mukayyed aʻzânın her sene Eylül bidâyetinde toplanmasıyla inʻikâd eder. İçlerinden bir reîs ve bir kâtib intihâb ederler ve müntehab reîs mecâlisi açar ve idâre eder ve müzâkerelerini bir günde ikmâl ederler. Yüz On Birinci Mâdde- Vazîfeleri; 1-Geçen sene yapılan masraf ile sene-i âtiyede yapılacak masrafı tedkîk, 2-Üç zâtdan ibâret heyʼetden kurʻa ile birini çıkarıp yerine diğerini reʼy-i hafî ile intihâb ve berây-ı tasdîk merbût bulunduğu nâhiye heyʼetine arz etmekdir. Köy (Mahalle) Heyʼetleri Yüz On İkinci Mâdde- Bir reîs, bir veznedâr ve bir kâtibden ibâret olan köy heyʼetinin vazifeleri; 1-Aʻzâ adedini teksîr ve âidâtını cibâyet etmek, 2-Her sene Eylül'de bir senelik vâridât ve masârıfât ve muʻâmelâtını merbût bulunduğu nâhiye heyʼetine bildirmekdir. Yüz On Üçüncü Mâdde- Köy heyʼetleri efʻâl ve icrââtından dolayı merbût bulundukları nâhiye heyʼetlerine karşı mesʼûldürler.