HİLÂL-İ AHMER MECMÛʻALARI / CİLT 7

Türkiye Hilâl-i Ahmer Mecmû‘ası Sayı 62 3023 - Tedkîk, Müşâhedât ve Malâhazât - Târîh Komisyonların Tarz-ı Faʻâliyeti Âfetzede havâlî ahâlîsinin ihtiyâcâtını tatmîn maksadıyla iʻâşe, ilbâs, ibâte, müdâvât-ı sıhhiye, mâliye ve nakliyât nâmıyla teşekkül edecek altı komisyon vezâifine dâir îzâhât vereceğimizi geçen nüshamızda vaʻd etmişdik. 1-Mevâdd-ı İʻâşe Komisyonu Bu komisyon mesâib-dîdegânın nafaka ve kifâf-ı nefsi için lüzûmu olacak meʼkûlât ve zehâiri cemʻ ve tevzîʻe meʼmûr olup âfet ve felâket netîcesinde birçok hânelerin harâb ve bir kısım halkın hayât-ı maʻîşeti münkesir olmasına binâen mevâdd-ı iʻâşe tevzîʻi için muvakkat bir merkez-i iʻâşe teşkîline ekseriyâ lüzûm hissolunmakdadır. Teşekkül edecek bu komisyon Hilâl ve Salîb-i Ahmer meʼmûrîninin muʻâvenetini teʼmîn ede- cekdir. 2-İlbâs Komisyonu Bu komisyon mübâyaʻa veya teberruʻ sûretiyle gelen elbiseleri cemʻ ve sûret-i münâsibede tasnîf ve tevzîʻ etmeğe meʼmûr olup mesâʻîsi bu işden anlar bir zâtın kontrolüne tevdîʻ olunacakdır. Eğer Hilâl veya Salîb-i Ahmer Merkezi âdî (normal) zamânlarda bir dârüssınâʻaya mâlik bulunuyorsa bu müessesenin aʻzâsı işbu komisyona iştirâk edeceklerdir. 3-Mesken Komisyonu Bu komisyon meskenleri harâb olan kimseler için câmiʻ, kilise, mekteb, kışla vesâire ile husûsî evlerde, otellerde, barakalarda birer melce teʼsîs edecekdir. Mültecîlerin mikdârı fazla bulunduğu takdîrde hakîkî kamplar teʼsîsine ihtiyâc hâsıl olacağı şübhesizdir. 4-Müdâvât-ı Sıhhiye Komisyonu Felâketin akab-i vukûʻunda bu komisyon mecrû [50] hînin müdâvât-ı ibtidâiyesini icrâ etdikden sonra herhangi bir mahalde bulunurlarsa bulunsunlar, hastalarla mecrûhların tedâvîsi zımnında hasta- bakıcıları ve etıbbâyı teʼmîn edecek tedâbîri ittihâz eyleyecekdir. En ağır mecrûhlarla hastalar mev- cûd hastahânelere nakledilecek ve hastahâne bulunmadığı veya mevcûdu istîʻâba gayr-ı kâfi geldiği takdîrde muvakkat hastahâneler teʼsîs olunacakdır. Bir felâketin sebebiyet verdiği sadmenin ve her türlü ıztırâbâtın âfetzedelerin kuvve-i mukâvi- mesini zaʻfa uğratacağı ve bilhâssa bunları hastalığa müstaʻid kılacağı ve dimâğ ve aʻsâblarını ihlâl edeceği aslâ unutulmamalıdır.