HİLÂL-İ AHMER MECMÛʻALARI / CİLT 7

Türkiye Hilâl-i Ahmer Mecmû‘ası Sayı 62 3024 5-Mâliye Komisyonu Mâliye Komisyonu'nun vazîfesi imdâd ve muʻâvenetin icrâsına muktezî mebâliği cemʻ etmek için tedâbîr-i lâzımeye mürâcaʻatdan ibâret olup zarar u hasârın mâhiyet ve vüsʻati anlaşılır anla- şılmaz merkez veya şuʻbenin kasa mevcûdu her zamân için gayr-ı kâfi bir yekûn teşkîl etmesine binâen felâketin yevm-i vukûʻunda dahi mebâliğ-ı mukteziyenin taharrîsi çâreleri derpîş edilecekdir. Bu maksadın husûlü için gazetelerle beyânnâmeler neşredilecek ve âfetin vukûʻa geldiği mıntıka dâhilindeki halkın ve bilhâssa tüccârın ulüvv-i cenâb ve lüft-ı mürüvvetine mürâcaʻat olunacakdır. Toplanılan mebâliğ Hilâl veya Salîb-i Ahmer Merkezi veznedârına veya bu vazîfeyi îfâya meʼmûr edilecek zâta tevdîʻ kılınacak ve teʼdiyât yalnız bu vâsıta ile icrâ olunacakdır. 6-Nakliyât Komisyonu Bu komisyon tarafından istiʻmâl edilebilecek bi'l-cümle vesâit-i nakliyeye vazʻ-ı yed edilecek- dir. Komisyon riyâsetine nakliyât umûrundan anlar zevâtdan biri intihâb olunacakdır. *** Matbûʻât ile Temâs ve Münâsebât Âfet ve felâketin vukûʻuna dâir keşîde edilecek ilk telgrafnâmelerde Hilâl ve Salîb-i Ahmer muʻâvenet faʻâliyetinin zikrolunmasına fazla ehemmiyet atfedilmelidir. İʻtâ olunacak maʻlûmâtın her hâlde felâket sahnesine âid olması ve sürʻat-i teblîği şartdır. Binâenaleyh imdâd ve faʻâliyetini idâreye meʼmûr olan zâtın gazetecilerle ve matbûʻât muhâbir- leriyle hemen teʼsîs-i münâsebât ederek Salîb-i Ahmer icrââtına dâir mufassal maʻlûmât vermelidir. Bir âfet ve felâketi taʻkîb eden ilk günlerde müheyyic ve ekseriyâ yanlış haberler işâʻa edilece- ğinden imdâd ve muʻâvenet komitesinin vereceği maʻlûmât-ı sahîha ve sarîhadan gazeteciler müte- şekkir ve memnûn edilmiş ve icrâât hakkında yazılacak makâlât ile de Hilâl ve Salîb-i Ahmer'in hâiz olduğu mevkiʻ-i bülend enzâr-ı umûmiyede bir kat daha taʻayyün ve tebârüz etmiş olacakdır. İmdâd ve muʻâvenet faʻâliyetine meʼmûr olan müdür fotoğraf ve sinema operatörleri ile teʼsîs-i münâsebât ederek alacağı klişeleri gazetelere verilecek makâlâta ilâve etdirmelidir. *** Meʼmûrîn-i Mülkiye ve Askeriye ile Münâsebât Hilâl veya Salîb-i Ahmer merkez veya şuʻbe reîsi imkân müsâʻid olur olmaz, bulunduğu ma- hallin en yüksek meʼmûr-ı mülkîsine mürâcaʻat ederek imdâd [51] ve muʻâvenet teşkîlâtının resmen tanınması ve bunun halka bir beyânnâme ile taʻmîmini teʼmîn edecekdir. Mebânî-i husûsiye ve emâkin-i umûmiyenin yeniden inşâsı için mebâliğ-ı mukteziyeye taʻalluk eden mesâil hakkında dahi merkez veya şuʻbe reîsi hükûmet-i mahalliye ile anlaşacakdır. Felâketin vukûʻ bulduğu havâlide idâre-i örfiye iʻlân edilmiş olursa Hilâl veya Salîb-i Ahmer meʼmûrîninin menâtık-ı askeriye ve memnûʻa dâhilinde serbestçe geşt ü güzâr edebilmesi için eskerî kumandanının müsâʻadesi istihsâl olunacak ve bu meʼmûrların her birine garnizon kumandanıyla Salîb-i Ahmer reîsinin müşterek imzâlarını hâvî birer lesepase verilecekdir.