HİLÂL-İ AHMER MECMÛʻALARI / CİLT 7

Türkiye Hilâl-i Ahmer Mecmû‘ası Sayı 63 3068 [78] İCTİMÂʻÎ HIFZISSIHHA -36- Bebek-Çocuk Meşher ve Müsâbakaları Son seneler zarfında ırkın tekâmülü ve neslin tezâyüdü husûsunda pek mühim bir âmil olan ço- cuk meşherlerinin teʼsîrâtı nazar-ı dikkati câlib bir hadde bâliğ olmuşdur. Bugün bütün medenî millet ve devletlerde oldukça mühim bir yekûna bâliğ olan annelerin kalbi senenin muʻayyen günlerinde açılacak çocuk sergilerinde mükâfât kazanacak yavrunun ihzârı ile çarpmakdadır. Fi'l-hakîka yüzler, binlerce çocuk arasında kendi yetiştirdiği yavrusunun derece alarak mükâfât kazanması kadar bir anneyi tesrîr ve teşvîk edecek başka ne olabilir? Bundan mâʻadâ ekseriyâ ve bilhâssa zengin şehir ve kasabalarda tevzîʻ edilen mükâfât-ı nakdiyenin mikdârı da hiçbir sûretle is- tiğnâ gösterilmeyecek derecededir. Bunun bazı mütevâzıʻ büdcelere yapacağı teʼsîr ile âile refâhının teessüs edebilmesi de pek mümkündür. Çocuk meşherleri muʻayyen senelerde veya senenin muʻayyen gününde idâre-i sıhhiyelerin nezâreti tahtında küşâd edilerek îcâb eden merâsimle mükâfâtlar tevzîʻ olunmakdadır. Birçok şehir- lerde sıhhî meşherlerin küşâdı, anında teşhîr olunur. Bu gibi sergilerde tevzîʻ edilen 3 veya 5 dereceli mükâfât ekseriyâ kıymet-i maʻneviyesi pek yüksek olan gümüş kupa gibi şeylerden ibâret ise de ba- zen de hayr u hasenâtı seven ve bilhâssa nesl-i âtînin tekâmülünü teşvîk eden zengin hayır-perverlerin oldukça mühim şahsî nakdî mükâfâtını muhtevîdirler. Bilhâssa sınâʻî şehirlerde derece-i servetleri hâl-i hâzır mikyâsâtı ile ölçülemeyecek dereceye gelen ticârî müessesâtın bu meşherlerin muvaffa- kiyâtı husûsunda yapageldikleri teşvîkât ve teʼsîrât şâyân-ı dikkatdir. Çocuk meşherleri yaşa göre teşhîr olunabilir. 1-2 yaşına kadar binler, 3-6 yaşına kadar oyun ço- cukları ve hattâ mekteb çocukları bile teşhîr olunurlar. Fakat ber-muʻtâd ve ekseriyâ 1-3 yaşına kadar olan çocuklardan mü[te]şekkildir. Bebek yaşda olanlarda daha ziyâde sıhhat ü âfiyet, annenin çocuk bakımı usûlleri, intizâm-ı hayât gibi mesâil hattâ bebeğin muʻayyen zamânda uykuda kalması bile tedkîk ve taʻkîb olunur. Küçük çocuklarda âfiyet ile birlikde güzellik, zekâ, serbest, iyi giyinmek ve yakıştırmak cihetleri de aranılmakdadır. Bu gibilerinde müsâbakayı hâd bir şekle îsâl için mükâfât kazanan birincilere kral ve kraliçe sıfatları bile izâfe olunur. Gazeteler, Resimli Mecmûʻa ve musavverler günlerce bahseder, anne ve çocuğun fotoğrafîlerini en kıskanç bir iʻtinâ ile tabʻ ederler. Bilhâssa resm-i geçidde halk ve binlerce çocuk, kral ve kraliçe çocuğun etrâfında nümâyiş yaparlar. Müsâbaka gününün eşkâli günler, haftalarca annelerin, kulüp ve meclislerin dedikodusu şeklinde devâm ederek hassâsiyetini hâlet-i mebnâda kalan vâlideleri bile tenbîh etmeğe başlar. Bir çocuk meşherinde mükâfât kazanmak zannolunduğu kadar basît değildir. Âtîye derc edilen meşher şehâdetnâmesinden de anlaşılacağı vechile mükâfât ve derecât tevzîʻi müsâbakaya iştirâk eden bebeklerin o günkü sıhhat ü âfiyet ve zindegîsi üzerine mübtenî değildir. Vâlidenin gebelik zamânından [78] başlayarak lohusalık devresi esnâsında gerek anne ve gerekse bebeğin tarz-ı hayât ve menâkıb-ı ictimâʻiyesi nazar-ı iʻtibâra alınarak ona göre tanzîm olunmakdadır. Fi'l-hakîka bin dereceli bir şehâdetnâme usûlünde vâlidenin gebelik anındaki tarz-ı hayât ve menâkıbı 250, lohusalık anındaki ahvâli 100 numara kazanmakdadır. Bebeğin bakılması ve tekâmülü 400 numara kazanması îcâb ederken müsâbakaya iştirâki anındaki âfiyeti ve hâl-i hâzırı ancak 250 derece alabilmekdedir.