HİLÂL-İ AHMER MECMÛʻALARI / CİLT 7

Türkiye Hilâl-i Ahmer Mecmû‘ası Sayı 63 3078 Sâlisen, en nihâye vakʻa mühim ise nakil keyfiyeti mümkün mertebe iyi şerâit dâhilinde icrâ edildikden sonra kazâzede için lüzûm görülecek muʻâvenet-i cerrâhiye veya tıbbiye teʼmîn edilebil- melidir. *** İkinci, yani bu ihtiyâcâtı teʼmîn edecek hangi teşkîlâtdır mesʼelesine gelince; bu husûsda evvelâ etıbbâ, imdâd ve muʻâvenet mevkiʻleri, âlât ve levâzım-ı imdâdiye depoları, dispanserler vesâire ile teʼsîs-i münâsebât edilebilecek telefon mevkiʻleri intihâb olunmalıdır. Sâniyen, zâbıta meʼmûrları doğrudan doğruya bununla alâkadâr olduklarından her polis merke- zinde maʻlûmât-ı mukteziyeyi ve husûsî adresleri muhtevî listeler bulundurulmalıdır. Sâlisen, etıbbânın müdâhalesine intizâren bazı muʻâvenetlerin îfâsı mümkün olabileceğinden her mahallenin muʻayyen noktalarında imdâd ve muʻâvenet kutuları bulundurmak lâzımdır. Râbiʻan, birçok ahvâlde vukûʻa gelen kazâlar müdâhalât-ı mühimmeyi istilzâm eder ki, gündüz ve gece mecrûh ve hastaları kabûl ve tedâvî edebilecek bir heyʼet-i tıbbiye ve cerrâhiyeyi her zamân için hizmete âmâde bulunduracak tekmîl âlât ü edevâtıyla mücehhez imdâd mevkiʻlerinin ihzâr ve tertîbinde pek büyük fâide vardır. Birçok memleketlerde olduğu gibi bizde de henüz böyle bir teşkîlât mevcûd olmamakla berâber tarîk-ı âmda tesâdüf etdiğimiz mecrûh, hasta ve muhtellü'ş-şuʻûr kimseler hakkında şimdiki hâlde ittihâz olunan tedâbîr ya telefonla belediye etıbbâsına mürâcaʻata veyâhûd yakın hastahânelerden birine nakil ve sevkine münhasır kalıyor. Burada Hilâl ve Salîb-i Ahmerlere teveccüh eden vazîfe gâyet mühimdir. Şimdiye kadar tevârîh-i muhtelifede akd-i ictimâʻ eden Salîb-i Ahmer konferanslarında muʻâ- venet-i müstaʻceleye esâs olmak üzere kabûl olunan üç mühim prensibi aşağıya derc ediyoruz: 1-Muʻâvenet-ı müstaʻcelenin teknik yani ilmî kısmını etıbbâ vücûda getirecek ve etıbbâ idâre edecekdir. 2-Müdâvât ya kazânın vukûʻ bulduğu mahalde veya imdâd mevkiʻinde yapılacakdır. 3-İmdâd ve muʻâvenet, müdâvât-ı evveliyeye inhisâr ederek tekerrür etmeyecekdir. *** Bir şehrin huzûr u âsâyişini o şehrin zâbıtası teʼmîne meʼmûr olduğu ve bir yangın zuhûrunda itfâsını belediyesi teʼmîn etdiği hâlde muʻâvenet-i serîʻa ve ilk imdâd için yapılacak teşkîlâtın birçok esbâb dolayısıyla muhtâr bir idâreye tevdîʻi iktizâ eder. Masârıfın kısm-ı aʻzamı tesviye edilmek şartıyla bu teşkîlâtı ancak Hilâl-i Ahmer ve Salîb-i Ahmer Cemʻiyetleri derʻuhde edebilirler. *** Hâl-i hâzırdaki vesâit-i mevcûde ile idâre-i mükemmele ne sûretle teʼsîs edilecekdir mesʼelesi- ne gelince; evvelâ telefonlardan istifâde edilecekdir. [88] Sâniyen, imdâd kutuları ve ilk imdâd mer-