HİLÂL-İ AHMER MECMÛʻALARI / CİLT 7

Türkiye Hilâl-i Ahmer Mecmû‘ası Sayı 63 3109 Romanya Gençlik Salîb-i Ahmer aʻzâsının adedi 50.000'e bâliğ olmuşdur. Gençlik Salîb-i Ahmeri Bükreş'de olduğu kadar vilâyetlerde de âsâr-ı terakkî göstermekdedir. Gençlik Salîb-i Ahmeri Mecmûʻası , 10 bin nüsha tabʻ etmekdedir. Bu senenin bidâyetinde 102 Romanya Mektebi Amerika, İngiltere, Kanada, İtalya ve Çekoslovakya Gençlik Salîb-i Ahmeri grup- ları ile muhâberâta başlamış idi. *** Transilvanya'da geçen senenin Kânûn-ı Evvel'inde vukûʻa gelen feyezânlar köprüleri, yolları, evleri tahrîb ve mahsûlâtı mahv etmiş idi. Romanya Salîb-i Ahmeri elbise, yatak, yorgan tevzîʻ etmiş ve yüzlerce mültecîlere muvakkat melceʼler teʼsîs ve bunların iʻâşelerini teʼmîn etmiş olduğundan hükûmet tarafından tahsîsât olarak verilen 10 milyon leyi sarf ederek vazʻiyet-i mâliyece çok müşkil bir mevkiʻe düşmüşdür. _______________ Japonya Feyezânları Geçen Temmuz'da Niigata havâlîsini tahrîb eden feyezânlarda Japon Salîb-i Ahmeri'nin îfâ et- diği muʻâvenet cidden şâyân-ı takdîr bir derecededir. Bu felâketde ölenlerle gâiblerin mikdârı 400 tahmîn edilmiş ve 8.000 hâne kısmen ve 800 hâne tamâmen harâb olmuşdur. Elli hektar pirinç tarlası mahv olmuş ve 45 köprüyü sular götürmüşdür. Zâyiʻât-ı mâddiye beş milyon dolardan fazla tahmîn edilmekdedir. Şimendifer münâkalâtı tamâmen mün[ka]tıʻ olduğundan imdâd faʻâliyeti pek ziyâde müşkilâa uğramışdır. Müdür-i Mesʼûl: Arif Süleyman Hilâl-i Ahmer Sanʻatevi Piyangosu Bir Ay Teʼhîr Edilmişdir. Çekileceği Târîhi 1 Kânûn-ı Evvel 1926 Piyango biletleri Hilâl-i Ahmer Merkezi'nde ve şuʻbelerinde, İstanbul'da Tülbendci Muhyiddin, Ertuğrul, İsmail Fuad Mahdûmları Mağazalarıyla Yeni Şark perukâr dükkânında, Beyoğlu'nda Pera Palas ve Tokatlıyan Otellerinde, Union Mağazası'nda satılmakdadır. Piyangoya konulan eşyâ-yı nefîseden bir kısmı Beyoğlu'nda Union Mağazası'nda teşhîr edilmekdedir.