HİLÂL-İ AHMER MECMÛʻALARI / CİLT 7

Türkiye Hilâl-i Ahmer Mecmû‘ası Sayı 64 3138 Mâdde 5- Mültezim icrâ edeceği teʼsîsât-ı ibtidâiye ameliyât masârıfını kaydetmek üzere bir hesâb-ı mahsûs küşâd edecekdir. Mültezim her sene Mart ibtidâsından evvel ertesi sene içinde masâ- rıfı hesâb-ı mahsûsa geçirilmek üzere icrâsını tasavvur etdiği teʼsîsât-ı ibtidâiye ameliyâtını masârıf-ı melhûza-i muhammenesiyle mübeyyin bir projeyi hükûmet maʻden mühendisine verecekdir. Proje Mart ibtidâsına kadar yetiştirilemediği takdîrde hükûmet maʻden mühendisi mültezime bir mühlet iʻtâ edebilir. Hükûmet maʻden mühendisi, ameliyât-ı mutasavverenin ne dereceye kadar teʼsîsât-ı ibtidâi- yeden addedilebileceğini ve maʻdenin iʻmâlât-ı müstakbelesine nâfiʻ olup olmayacağı hakkındaki mütâlaʻanâmesini, projenin iʻtâsı târîhinden iʻtibâren üç ay zarfında evrâk-ı âidesiyle berâber Maʻâ- din İdâresi'ne gönderecek ve Maʻâdin İdâresi dahi ameliyât-ı mutasavvere masârıfının kısmen veya tamâmen hesâb-ı mahsûsa geçirilmesi hakkında ittihâz-ı karâr ile netîcesini evrâkın vürûdu târîhin- den iʻtibâren iki ay zarfında mültezime bildirecekdir. Maʻâdin İdâresi'nin karârı projenin hükûmet maʻden mühendisine iʻtâsı târîhinden dokuz ay zarfında mültezime teblîğ edilmediği takdîrde mültezimin teklîf etdiği masârıfın tamâmen hesâb-ı mahsûsa geçirilmesi tasvîb edilmiş add ü iʻtibâr olunacakdır. Her sene Mart ayı zarfında bir sene evvelki hesâb-ı mahsûsu hükûmet maʻden mühendisine iʻtâ olunacak ve hükûmet mühendisi masârıfın sıhhatini tedkîke, hesâb-ı mahsûsa geçirilmesi kabûl olunan ameliyâta âid olduğunu tahkîke ve lede'l-îcâb tashîhât-ı lâzımenin icrâsını emre salâhiyetdâr olacakdır. Bu sûretle kabûl olunan masârıf ameliyâtın icrâsını taʻkîb eden senenin Kânûn-ı Sânîsi ibti- dâsında hesâb-ı mahsûsa geçirilmiş add ü iʻtibâr olunacakdır. Müddet-i ihâlenin inkızâsında henüz bu sûretle imhâ edilmemiş olan mebâliğ yekûnu on yedinci mâddede beyân olunan hesâbın tesviyesinde nazar-ı iʻtibâra alınmak üzere hükûmete zimmet kaydedilecekdir. İşbu hesâb mültezimin matlûbâtıyla netîcelendiği takdîrde hükûmetin medyûn olduğu mebâliğ ihâle müddetinin inkızâsından iʻtibâren on iki ay zarfında mültezime teʼdiye olunacakdır. İşbu hesâb-ı katʻîden sonra güzerân olan müddet için fâiz-i nizâmî yürütülecekdir. İşbu mâdde ahkâmının tatbîkinden dolayı Maʻâdin İdâresi ile mültezim beyninde ihtilâf zuhû- runda yirmi beşinci mâdde mûcebince hareket olunacakdır. Mâdde 6- Mültezim bu ameliyâtın icrâsı için pazarlık sûretiyle akdedeceği mübâyaʻât ve bedel-i maktûʻ mukâbilinde iʻmâlât mukâvelenâmeleri müsveddelerini hükûmet maʻden mühendisine tevdîʻ edecek ve işbu müsveddeler mühendis tarafından tasdîk edilmedikçe akd-i mukâvele etmeyecekdir. Mültezim icrâ edeceği ameliyâtdan dolayı dahi maʻâdin kavânîn ve nizâmâtına riʻâyet husûsun- da mesʼûl olacakdır. İşbu mâdde ahkâmının tatbîkinden dolayı Maʻâdin İdâresiyle mültezim beyninde ihtilâf zuhû- runda yirmi beşinci mâdde mûcebince hareket olunacakdır. Mâdde 7- Her ne sebebe mebnî olursa olsun, imtiyâzı istirdâd etdikden sonra satıhda zuhûr edecek zararların tazmîn veya taʻmîrinden eşhâs-ı sâliseye karşı hükûmet mesʼûldür. Şu kadar ki, is- tirdâddan iʻtibâren beş sene zarfında hükûmet mezkûr zararların tazmînini sâbık mültezimden daʻvâ edebilir. Mâdde 8- Maʻâdin Nizâmnâmesi 'nin seksen ikinci mâddesi mûcebince ihâle müddetinin in- kızâsında meccânen hükûmete râciʻ olması lâzım gelen arâzî, ebniye, inşâât, makine, âlât ü edevât ber-vech-i âtîdir: