HİLÂL-İ AHMER MECMÛʻALARI / CİLT 7

Türkiye Hilâl-i Ahmer Mecmû‘ası Sayı 65 3224 Hilâl-i Ahmer… En muhtâc ve derdli zamânlarımızda bize dest-i imdâd ve muʻâvenetini uzatan, en müşkil gün- lerimizde aʻzamî bir rahm ü şefkatle kederlerimizi, elemlerimizi teşfiyeye koşan bu şefkat müessesesi insâniyet mefkûresinin başlı başına asîl ve yüksek bir timsâl-i tecellîsidir. İstihdâf etdiği mefkûre-i beşeriyenin hiçbir dîn ve milliyet farkı tanımadığı ve bütün insânları bir kardeş olarak kabûl etdiği bu necîb ve mütevâzıʻ müessese, Hilâl-i Ahmer teşkîlâtı zamân zamân sevk-i vukûʻât ve tabîʻatla husûle gelen birçok ıztırâblarımızı teskîn, harb zamânlarında duyduğumuz birçok elemli ihtiyâclarımızı teh- vîn ve tatmîn etmesi iʻtibârıyla en temiz, en nezîh ve en fazîletkâr bir insâniyet ocağıdır. Hilâl-i Ahmer'in gerek sulh zamânlarında ve gerek harb günlerinde vatandâşlarımıza ve birçok insânlara yapdığı iyilik ve büyük hizmetin kudsiyeti tasavvurumuzun çok fevkindedir. Bu müessese- nin derece-i ehemmiyet ve ulviyetini nâfiz ve dâhi nazarlarıyla bizden daha mükemmel sûretde gören azîz reîsicumhû[r]umuz, kıymetli nutuklarında bu mühim noktaya temâs etmiş, Hilâl-i Ahmer'in îfâ- sına muvaffak olduğu hidemât-ı ber-güzîdeye bilhâssa işâret buyurmuşdular. Bittabʻ Hilâl-i Ahmer, icrâsına muvaffak olduğu birçok mühim hizmetleri Türk milletinin kîse-i [194] hamiyetinden damlayan katarât-ı semâhatdan teʼmîn etmişdir. Cemʻiyetin başlı başına ve esâs olan vâridâtını pek nâdir zamânlarda vukûʻ bulan iʻânât ve teberruʻâtdan ziyâde aʻzâ-yı dâimenin muntazaman verecekleri taʻahhüdât-ı şehriyesi teşkîl etmekdedir. İʻâneler ve teberruʻâtın ekserîsi muhârebe, muhâceret, afât ve mesâib gibi fevkalâde ve cemʻiyetin, halkın hissiyât-ı insâniye ve va- taniyesi teheyyüc etdiği zamânlarda istihsâl edilen muvakkat vâridâtdan ibâretdir. Fakat sâlifü'z-zikr ahvâl-i fevkalâde geçip de memleketlere sükûn ve huzûr havâsı esmeğe başlayınca bu vâridâtın pek dûn bir mertebeye tenezzül etdiği, hattâ çok kere bir sıfıra münkalib olduğu maʻalesef görülmüşdür. Bu mühim ve zarûrî sebebden dolayıdır ki, Hilâl-i Ahmer'in asıl menbaʻ-ı vâridâtı kaydetdiği aʻzânın muntazaman verilen taʻahhüdât-ı şehriyesinden ibâretdir. İşte bunun içindir ki, bu gibi teş- kîlâtın bidâʻa ve kuvveti, kaydetdiği aʻzânın adedi ile münenâsibdir. Konya Hilâl-i Ahmer Şuʻbesi'nde mukayyed aʻzâ adedinin maʻalesef şehrimizin azamet ve ehemmiyetiyle mütenâsib olmadığını öğrendim. Bir hars ü irfân merkezi olan ve bugün feyyâz sî- nesinde binlerce münevver vatandâşı iftihârla taşıyan Konya'mızın Hilâl-i Ahmer'i bugün binlerce aʻzâya mâlik olmak şartıyla mübâhî bulunmalı idi. İşitdiğime göre aʻzâ adedi dört yüze bile bâliğ olmamış. Bunu bir hiss-i hicâb ve teessürle yazıyorum. Hilâl-i Ahmer, öyle necîb fakat öyle mütevâzıʻ bir müessesedir ki, vatandâşlarımızın kîse-i semâhatinden damlayacak en küçük bir zerre-i hamiyeti bile maʻa'l-memnûniye ve maʻa'l-iftihâr ka- bûl etmekdedir. Yapdığımız eğlencelerde bazen beş-on dakîkada sekiz-on lirayı gözümüzden çıkarı- yor, bir hiss-i nedâmet duymadan sarf ediyoruz. Lâkin bu gibi şefkat müesseselerine yardım etmeği unutuyoruz. Hâlbuki bu en vicdânî bir vazîfemizdir. Muhterem vatandâşlarımı Hilâl-i Ahmer bayra- ğının sâye-i fazîleti altına harâretle çağırıyorum. Azîz kardeşlerim! Orada hep toplanalım ve Hilâl-i Ahmer'in defter-i iftihârına ismimizi yazdıralım. Siʻamız yoksa az verelim, hâlimize göre verelim. Fakat her hâlde verelim. Mâhiye vereceğimiz üç-beş lira veya kuruş bizi hiçbir zamân sarsmaz. Fakat bunlar toplanarak ileride kendi yaramızı saracak büyük ve insânî çâreleri, devâları teʼmîn edecekdir. Muhterem vatandâşlarım! Haydi hamiyet, fedâkârlık ve fazîlet sâhasına!... Muzaffer Hâmid"