HİLÂL-İ AHMER MECMÛʻALARI / CİLT 7

Türkiye Hilâl-i Ahmer Mecmû‘ası Sayı 60 2917 taht-ı karâra alındı. Bu sûretle hastabakıcı ordusunun nüvesi kurularak Hilâl-i Ahmer'in meşkûr ve pâyidâr bir eser-i muʻazzamı meydâna getirildi. Bu mesleğe âşık olup şehâdetnâme almağa muvaffak olanları hükûmet ve müessesât-ı ictimâʻi- ye himâye etmeli, sûret-i idâre terfih ve terfîʻleri husûsu nizâmât ile teʼmîn edilmelidir. Hastabakıcılar tıbkı meʼmûrîn ve müstahdemîn misillü hakk-ı terfih ve tekâʻüde mazhar olmalı ve aralarında ayrıca bir de husûsî teşkîlât tanzîm edilmelidir. Meslek mensûbîni hastabakıcılığa gâyet ulvî ve mukaddes bir sanʻat nazarıyla bakacaklar ve bununla iftihâr edeceklerdir. Hastabakıcılar rahm ü şefkat hislerinin en ince ve en hassâs kısımlarıyla mütehassis olacaklardır. Bir de melâhat ve tenâsüb-i endâma mâlik olmaları, temiz âilelerden ve mebâdî-i ulûm ve fünûna vâkıf bulunmaları, vücûdca ilel ü eskâm gibi şeylerden münezzeh olup yaşları 18-25 arasında olması da îcâb eder. Bu meslek mensûbîninin bütün memleketlerde renkli olmamaları kaydı mevcûd olduğu gibi âile teşkîl ve terk-i meslek gibi hâlâtı da tecvîz olunamamakdadır. El-hâsıl bir hastabakıcı ömrünün hitâmına kadar bu meslek âşığı kalacak ve intisâb etdiği bu serbest sanʻat ile iftihâr ederek beşerî ve vicdânî vezâif-i ictimâʻiyesini îfâ edecekdir. Son senelerde hastabacıkılığa memâlik-i medeniyede daha nâfiʻ hidemâtda bulunmak üzere başka başka istikâmetler verilmişdir. Bu teceddüdât, hastabacıkılığa müessesât-ı sıhhiyenin kadrosu hâricinde de bazı vezâif tahmîl etmiş ve ez-ân cümle şehir dâhilinden kasaba, köylere kadar hemen her hânenin harîmine sokmuşdur. Bundan mâʻadâ Amerika'da sıhhat-i umûmiye hidemâtında ayrıca bir hastabacıkılık teşkîlâtı ihdâs edilerek bütün sıhhî-ictimâʻî kadrolarda tabîb gibi bir vazîfe almışdır. Hükûmet etıbbâsının refâkatinde hemen tabîb muhassesâtına karîb bir ücret ile çalışan bu sıh- hat-i umûmiye mensûblarından hükûmet ve müessesât pek büyük istifâdeler etmişdir. Bu nevʻ hastabacıkılığın tahsîli, husûsî mekteb ve kolejlerde bir seneden beş seneye kadar muh- telif ulûm ve fünûna vâkıf olmak ve ayrıca amelî kurslara devâm etmek sûretiyle olmakdadır. Okunan muhtelif dersler arasında hayâtiyât, iktisâdiyât, ictimâʻiyât ve bilhâssa taşra ve köylere âid olan aksâmı, rûhiyât gibi dersler pek esâslı ve şümûllü bir tarzda tedrîs olunagelmekdedir. Halka karşı söylenecek nutuklara, bilhâssa köy halkına yapılacak nesâyih ve telkînâta, ale'l- umûm sıhhate ve iğtidâya âid maʻlûmâta ayrıca kıymet verilmekdedir. Hastabacıkılığın son senelerde vâsıl olduğu tekâmül şuʻbeleri, ayrıca husûsî kurslara devâm sûretiyle elde edilmekdedir. Bunlar da verem, ihsâiyât, çocuk hıfzıssıhhası, mekteb, taşra, gebelikde ve lohusalıkdaki çocuk hıfzıssıhhası, belde ve ve vilâdethâne teşkîlâtına âid hastabacılıklardır. Bu gibi husûsî teşkîlât mensûbîni her tarafda [556] müstesnâ birer mevkiʻ sâhibi olmakda ve el üstünde tutulmakdadırlar. Âtîleri müemmen olduğu kadar sıhhî-ictimâʻî vezâife olan hizmet ve gayretleri de pek ziyâdedir. Biz şu senelerde memleketimizin sâdece müessesât-ı sıhhiye ve ictimâʻiyesindeki kadrolara kâfi mikdârda hastabakıcı yetiştirir isek, kendimizi bahtiyâr addetmeliyiz. Bu sınıf mensûbîninin kit-