HİLÂL-İ AHMER MECMÛʻALARI / CİLT 7

Türkiye Hilâl-i Ahmer Mecmû‘ası Sayı 67 3311 Mardin'den telgraf, 16 Şubat [1]927 Ankara Hilâl-i Ahmer Merkez-i Umûmîsi Riyâset-i Celîlesi'ne, Nizâmnâmeye tevfikan senelik ictimâʻı akdeden vilâyet meclis-i umûmîsinin müttefikan ittihâz etdiği karâra tevfikan merkez ve mülhakât aʻzâlarının ihtirâmât ve şükrânlarını arz ile kesb-i şeref eylerim, efendim. Vilâyet Hilâl-i Ahmer Meclis-i Umûmîsi Reîsi Vâlî Tevfik Hadi *** Edirne'den telgraf, 20 Şubat [1]927 Ankara Hilâl-i Ahmer Merkez-i Umûmîsi Riyâseti'ne, Bugün inʻikâd eden meclis-i umûmînin hürmetlerini takdîm ederim. Hilâl-i Ahmer Edirne Meclis-i Umûmîsi Reîsi Vâlî Behçet _______________ [257] Hilâl-i Ahmer İstanbul Vilâyeti Merkezi 1927 Senesi Meclis-i Umûmîsi 25 Şubat [1]927 Cuma günü sâʻat on dörtde Dârülfünûn Konferans Salonu'nda akdolunan ictimâʻın zabtıdır. 1-Merkez Reîsi Ali Paşa'nın Hilâl-i Ahmer'in ehemmiyet ve hizmetinden bâhis âtîdeki nutkuyla celse açılarak intihâbâta başlandı. Diyarbekir Mebʻûsu İbrahim Talîʻ Bey riyâsete, Feyziye Mektebi Müdürü Nakiye Hanım ikinci riyâsete, Doktor Hikmet Bey kâtibliğe müttefikan intihâb edildiler. 2-Hilâl-i Ahmer'in hâmîsi reîsicumhûrumuz Gâzî Paşa hazretlerine telgrafla taʻzîmât arzına dâir pek çok imzâlarla verilen takrîr reʼye konularak müttefikan kabûl edildi. Başvekâlete, Büyük Millet Meclisi Riyâseti'ne ve Hilâl-i Ahmer Merkez-i Umûmîsi Riyâseti'ne de aynı sûretle telgraf çekilmek hakkında verilen takrîrler reʼye konularak müttefikan kabûl edildi. 3-Heyʼet-i merkeziye raporu okundu. 4-Heyʼet-i merkeziye raporunda münderic teklîflerden merkez meʼmûrlarının hayâtları sigor- taya konularak sigorta bedelinin yüzde altmışının merkezce tesviyesi ve bu meʼmûrların ikrâmiye ile taltîfleri reʼye konularak kabûl edildi. Merkez meʼmûrlarına iʻtâsı kabûl olunan ikrâmiyenin Beyoğlu kazâ şuʻbesinin muvazzaf üç meʼmûruna da teşmîline dâir mezkûr şuʻbe aʻzâları tarafından verilen takrîr de kabûl olundu. Bu maksad için büdcenin masârıf faslına heyʼet-i merkeziyece tasvîb oluna- cak nisbetde tevzîʻâtda bulunulmak üzere bin lira vazʻına karâr verildi. 5-Heyʼet-i merkeziyeden çıkacak beş zâtın taʻyîni için nizâmnâme-i esâsî mûcebince kurʻa tertîb olunarak Lütfiye Celâl Sâhir Hanım tarafından çekilmiş ve Sadiye Halil Hanım ile Doktor