HİLÂL-İ AHMER MECMÛʻALARI / CİLT 7

Türkiye Hilâl-i Ahmer Mecmû‘ası Sayı 67 3312 Burhaneddin, Tevfik Salim, Ömer Lütfi ve Nureddin Ali Beylere isâbet etmişdir. Bu beş zâtın Hilâl-i Ahmer'e kıymetli hizmetleri sebk etmesine mebnî ibkâen intihâbı makâm-ı riyâset tarafından teklîf edilerek ittifâk-ı ârâ ile kabûl olundu. Muahharan bu beş zâtdan Doktor Burhaneddin Bey istiʻfâ ve vâkiʻ olan ricâya rağmen bu karâ- rında ısrâr etmesine binâen yerine Doktor İbrahim Talîʻ Bey ittifâk-ı ârâ ile intihâb edildi. 6-Ankara'da inʻikâd edecek Hilâl-i Ahmer meclis-i umûmîsine gidecek murahhasların intihâbı için evvelce nâmzed gösterilmesi arzusu ızhâr olundu. Heyʼet-i merkeziye raporunda murahhas tazmînâtında tasarruf teʼmîni için yalnız iki zâtın buradan iʻzâmı ve diğer altı zâtın orada bulunan- lardan veya tazmînâtsız gidebilecek zevâtdan intihâbı hakkındaki teklîfi de kısmen nazar-ı dikkate alınarak nâmzed olmak üzere İbrahim Talîʻ, Burhaneddin, Tevfik Salim, Celâl Sâhir, Hakkı Tarık, Hâkim [358] Rıza, Şemseddin, Ziyaeddin Beyler gösterilerek intihâb ve Tevfik Salim Bey'in beyân-ı maʻzeret etmesi üzerine yerine Hamdi Suad Bey'in azîmeti tensîb edildi. Bu zâtlardan Burhaneddin, Celâl Sâhir, Hamdi Suad Beylere yüz ellişer lira yol ve ikâmet masârıfı teʼdiyesi kabûl ve bu karâra göre büdcede mâdde-i mahsûsasına yüz elli lira ilâvesi takrîr edildi. 7-Büdcenin heyʼet-i umûmiyesi masârıf kısmına yapılan ilâvelerle ve bunların tevzîni için vâ- ridât hânesinin teberruʻât mâddesine üç bin lira zammıyla ve mülhak Hanımlar Sanʻatevi büdcesini aynen ve sene-i sâbıka hesâbâtından dolayı heyʼet-i merkeziyenin zimmeti ibrâ edildi. 8-Merkez heyʼetinin Hilâl-i Ahmer'e 3.100 lira teberruʻ eden Sovyet Şûrâlar Cumhûriyeti An- kara Sefâreti Müsteşârı Yoldâş Potemkin'in takdîri hakkında merkez-i umûmîye mürâcaʻat karârı tas- vîb ve mûmâileyhimin gösterdiği ulüvv-i cenâb şükrânla telâkkî edilerek ızhâr-ı memnûniyet olundu. 9-İlk mekteblerdeki muhtâc talebeye verilen gıdâ hakkında müzâkerât cereyân ederek evvel emirde bu emr-i hayra maʻâş zamlarını terk eden Şehremâneti meʼmûrlarıyla on iki bin lira tahsîs eden Belediye Cemʻiyet-i Umûmiyesi'nin beş bin lira tahsîs eden vilâyet meclis-i umûmîsinin ve iki bin lira tahsîs eden İstanbul Ticâret ve Sanâyiʻ Odası'nın vesâir müteferrik muʻâvenetlerde bulunan zevâtın hayırhâhlıkları lisân-ı tebcîl ile yâd olunmuşdur. Baʻdehû bu iʻâşenin nevʻ ve şekli ve tarz-ı icrâsı hakkında muhtelif fikirler dermeyân edilmiş ve ez-cümle sıcak yemek tevzîʻi arzusu ızhâr olunmuş ise de Reîs Doktor Ali Paşa bu iʻâşe işinin târîhçesini yaparak derece derece tevsîʻ-i faʻâli- yet edildiğini ve bugünkü hâli îzâh ve daha fazlasına da imkân hâsıl olunca yapılacağını beyân etdi. Kâtib Celâl Sâhir Bey de İstanbul ve civârında mevcûd ilk mekteblerin adedine ve semt muhâlefetine nazaran sıcak yemek tevzîʻindeki müşkilâta nazar-ı dikkati celb etmekle berâber şuʻbelere yapılan taʻmîmleri hâtırlatarak istenilen menâtıkda bu sûretle sıcak yemek tevzîʻi salâhiyetinin şuʻbelere ve- rilmiş olduğunu ve heyʼet-i merkeziyenin üç bin lira tahsîsâtla ve dört yüz çocukla başladığı bu işi bugün iʻâşe olunan çocuk mikdârı beş bine varacak kadar tevsîʻ ve buna muktezî menâbiʻi bulmakla vazîfesini hüsn-i îfâ etdiğine kâil bulunduğunu söyledi. Bu işin takviye ve tevsîʻi hakkında Tevfik Salim ve Ömer Lütfi Beylerle diğer bazı aʻzâların mütâlaʻaları dinlenilerek tasvîb ve netîcede müzâ- kerenin kifayetine karâr verildi. Bu iş için nâhiyelerin iştirâkiyle bir komisyon teşkîli hakkındaki teklîf esâsen her mıntıkadaki çocukların iʻâşesi şuʻbelere terk edildiği ve kazâ şuʻbeleri isterlerse bu husûslarda nâhiyelerle teşrîk-i mesâʻî edebilecekleri için reddedildi. 10-Beyoğlu kazâ şuʻbesine merbût nâhiyelerde bazılarının şuʻbelere terk olunan vâridât hissesi nisbetinin tezyîdi hakkındaki talebi üzerine müzâkere cereyân ederek nâhiye şuʻbelerine terk olunan yüzde on beşle idâreye ve teʼmîn-i tahsîlâta imkân olmadığı ifâde edilmesi üzerine Kâtib Celâl Sâhir Bey merkezce doğrudan doğruya merkeze merbût nâhiye şuʻbelerine vâridâtlarının yüzde on beşine