HİLÂL-İ AHMER MECMÛʻALARI / CİLT 7

Türkiye Hilâl-i Ahmer Mecmû‘ası Sayı 67 3313 ve kazâ şuʻbelerine kendilerine merbût nâhiye şuʻbeleri masârıfıyla birlikde yüzde yirmi beşine kadar sarfiyât icrâsı [259] meʼzûniyeti verildiğini ve imdâd sarfiyâtıyla berâber masârıfât-ı idâre için mer- keze bırakılan yüzde kırkdan ibâret olduğuna nazaran bu nisbetlerin tezyîdi gayr-ı mümkin ve umûr-ı hayriye için halkdan alınan paraların masârıfa boğulmaması lâzım olduğunu beyân etdi ve netîcede nisbet-i hâzıranın idâmesine karâr verildi. 11-Hilâl-i Ahmer İstanbul Merkezi muʻâmelâtını câlib-i memnûniyet ve muvaffakiyetle tedvîr eden merkez heyʼetine beyân-ı teşekkür edilmesi hakkında aʻzâdan bazıları tarafından vâkiʻ olan teklîf ittifâk-ı ârâ ile kabûl ve tasvîb ve heyʼet-i mezkûreye alenen ızhâr-ı teşekkür edilerek meclis-i umûmî ictimâʻına nihâyet verildi. _______________ Reîs Ali Paşa'nın Nutku Bugün şu feyzkâr ve hayır-nisâr mecmaʻı teşrîf eden heyʼet-i müşfikanızı kemâl-i hürmet ve taʻzîm ile selâmlar ve bu şefkat müessese[si]nin müessisîn-i muhteremesini hayır ile yâd ederken tilkâ-i nefsimden gelen bir hiss-i hürmeti îfâ etmeden söze başlayamayacağım. O da selâmet ve men- faʻat-i vataniyeye âid kâffe-i umûrun nâzım ve murâkıbı olan çok azîz rehberimiz reîsicumhûrumuz Gâzî Paşa hazretlerinin Meclis-i Millî'nin bu seneki küşâd-ı nutkunda ulüvv-i şânına çespân ve cid- den mûciz ve belîğ bir tarz-ı beyân ile Hilâl-i Ahmer aʻzâsı adedinin rüşd-i ictimâʻîsiyle mütenâsib bir mertebeye ısʻâdını ihtâr buyurmaları husûsunun vatanı düşman pençesinden kurtarırken verdikleri işâret-i celâdet ve necât kadar ulvî ve efkâr-ı umûmiyece intibâh-âver olduğunu ve bu yüksek işârete iktifâ edildikçe hilâlimizin bedir olmağa yüz tutacağını tebşîrdir. Bugün gayûr ve hayırkâr arkadâşlarımın mahsûl-i mesâʻîsini muʻâmelât-ı seneviyemizi icmâl eden raporumuzda görerek herkes kendi hisse-i mefharetini alacak ve bu güzel işe emeğe sebk eden- lerin hepsi de en samîmî ve en derîn şükrânımızı kazanacakdır. _______________ İstanbul merkezi tarafından 1927 senesi meclis-i umûmîsine takdîm olunan rapor Muhterem heyʼetinizin maʻlûmudur ki, 15 Kânûn-ı Evvel 1926 târîhinde inʻikâd eden Hilâl-i Ahmer İstanbul Merkezi alelâde kongresinin intihâb etdiği heyʼet-i merkeziye Haziran sonlarına ka- dar îfâ-yı vazîfe etmiş ve o sırada Beyoğlu, Üsküdar ve Çatalca vilâyetlerinin kazâya ifrâğıyla İs- tanbul vilâyetine rabtına binâen bu mıntıkalardaki Hilâl-i Ahmer teşkîlâtının da İstanbul merkezine rabtı merkez-i umûmîden bildirilmesi üzerine yeniden intihâbât icrâsına lüzûm görülerek 29 Haziran 1926 târîhinde inʻikâd eden fevkalâde kongrede heyʼetimiz intihâb edilmek şerefine nâil olmuşdur. Teveccüh ve iʻtimâdınızla mücehhez olarak iş başına gelen heyʼet-i merkeziyenizin sene sonuna ka- dar yalnız altı aylık faʻâliyet hayâtı bulunmakla berâber fevkalâde kongrede senenin ilk yarısına âid muʻamelat mevzûʻ-ı bahis olmayıp yalnız intihâbât icrâsıyla iktifâ edildiğinden bütün bir senelik icrâât ve muʻâmelâta dâir telhîsen arz-ı maʻlûmât etmeği zarûrî addediyoruz.