HİLÂL-İ AHMER MECMÛʻALARI / CİLT 7

Türkiye Hilâl-i Ahmer Mecmû‘ası Sayı 60 2925 İstanbul merkezi veremle mücâdele eden cemʻiyetlere daha esâslı bir tarzda yardım edebilmek için başka vâsıtalar da taharrî etmekdedir. _______________ Bir Sünnet Düğünü Üsküdar Hilâl-i Ahmer Şuʻbesi tarafından tertîb edilen büyük sünnet düğünü geçen hafta Per- şembe ve Cuma günleri Doğancılar'daki Jale Bahçesi'nde icrâ edilmişdir. Şuʻbe heyʼeti bu vesîle ile tertîb edilen müsâmerenin intizâm ve mükemmeliyetini teʼmîn için fevkalâde sarf-ı mesâʻî etmişdir. Ekserîsi şehîd evlâdı olan 170 çocuğun hitânı meccânen icrâ edilmişdir. _______________ Hastabakıcı Mektebi Merkez-i umûmînin pek büyük bir iʻtinâ ile idâre etdiği Hastabakıcı Mektebi'nin tevsîʻine kongrece karâr verildiğini ve mektebin Aksaray'da Yusufpaşa Câddesi'nde işgâl etdiği konak ile dört dönüm bâğçenin cemʻiyet nâmına mübâyaʻa edildiğini geçen nüshamızda yazmış idik. Bu sene mektebe yeniden kabûl edilecek elli tâlibe için mevcûd binânın gayr-ı müsâʻid olması- na mebnî şimdiden mekteb bâğçesinde bir dershâne [563] ile dört odayı hâvî kârgîr bir binânın inşâsı takarrür ederek 2 Ağustos 1926 târîhinde yapılan münâkasa-i aleniyede Mehmed Rüşdü Bey İnşâât Müessesesi 8.585 lira ile inşââtı derʻuhde etmişdir. _______________ Hayırlı Meslek Memleketimizin, mesleğin îcâb etdiği maʻlûmât ve tecrübe-i ameliye ile mücehhez hakîkî has- tabakıcılara ihtiyâcı pek şedîddir. Türkiye Hilâl-i Ahmer Cemʻiyeti Merkez-i Umûmîsi yüksek bir fikr-i insânî ile bu maksadın teʼmîni için İstanbul'da Aksaray'da Haseki Câddesi'nde bir Hastabakıcı Mektebi ve Yurdu teʼsîs etmişdir. Bu azîz mesleğe intisâb edenler hem memleketin en muhtâc ol- duğu sâhada fâideli ve şefkatle memlû bir hizmetde bulunmuş hem de ihtiyâcın vüsʻatine nazaran kendilerine hayâtlarını nâmûslu ve hayırlı bir saʻy ile kazanmak gibi şerefli bir istikbâl teʼmîn etmiş olurlar. Memleketin her tarafındaki hastahânelerden maʻlûmâtlı hastabakıcılar isteniliyor. Mektebi ikmâl eden hastabakıcı h emşîre hanımlar iʻâşe ve ibâtelerinden mâʻadâ şehrî en az dört bin kuruş bir para alacaklardır. Mektebe mülhak yurd bu hanımların âtîleriyle meşgûl olacak ve bunları hizmetleri müddetince kendi mâlı addedecekdir. Mektebin kabûl şerâiti ber-vech-i âtîdir: 1-Türkiye Cumhûriyeti tebaʻasından olmak 2-Yaşı on sekizden küçük ve otuzdan büyük olmamak 3-İlk tahsîl şehâdetnâmesini hâiz olmak veya o derece tahsîl görmüş bulunmak. (Şehâdetnâme- si olmayan imtihâna tâbiʻ tutulacakdır.)