HİLÂL-İ AHMER MECMÛʻALARI / CİLT 7

Türkiye Hilâl-i Ahmer Mecmû‘ası Sayı 61 2969 Muʻâvenet Komitesi Merkez veya şuʻbe tarafından bir muʻâvenet komitesi teşkîl olunacak ve bu mümkün olamadığı takdîrde bu komitenin vezâifi merkezce derʻuhde edilecekdir. Muâvenet komitesi kadın erkek zevât-ı mümtâze ve maʻrûfeden teşekkül edecekdir. Belediye ve vilâyet erkânından iki-üç zâtın bu komiteye iştirâki câizdir. Sıhhiye müfettişinin ve sıhhiye müfet- tişi bulunmayan yerlerde etıbbâ-yı sıhhiyeden bir zâtın, Ticâret Odası veya bir şirket-i ticâriye mü- messilinin ve müessesât-ı hayriyeye mensûb ashâb-ı vukûf ve tecrübenin, muʻâvenet işlerinde mes- bûku'l-hademe kimselerin mezkûr komiteye daʻvet ve iştirâk edilmelerinden fevâid-i azîme teʼmîn edilmiş olur. Muʻâvenet komitesi aʻzâsını, merkez veya şuʻbe intihâb edecekdir. Husûsî Komisyonların Teşkîlâtı İcrââta müteʻallik idâre-i umûmiye merkez veya şuʻbeye mevdûʻ olup ikinci derecede ehem- miyeti hâiz mesâʻî, husûsî komisyonlara verilecekdir. Her komisyonun intizâm-ı mesâʻîsini teʼmîn etmek maksadıyla komisyon reîsi muʻâvenet komitesine aʻzâ olacakdır. Komisyonların riyâset vazî- fesi kadın ve erkek memleketde en ziyâde nüfûz sâhibi ve teşebbüs kâbiliyeti olan kimselere tevdîʻ edilmelidir. Komisyonların aʻzâsı az ve fakat faʻâl olacakdır. Muʻâvenet komitesi mukarrerâtının tatbîk ve icrâsı komisyon reîslerine havâle edildiği için mukarrerâtın icrââtından reîsler mesʼûldür. Âfetzede havâlî ahâlîsinin ihtiyâcâtını tatmîne zîrde muharrer altı komisyon kâfidir: 1-Mevâdd-ı iʻâşe komisyonu 2-Elbise ve çamaşır komisyonu 3-Mesken komisyonu 4-Müdâvât-ı sıhhiye komisyonu Mesâib-dîdegânın dört türlü ihtiyâcât-ı esâsiyesine tekâbül eden bu komisyonlara ilâvesi îcâb eden: 5-Mâliye komisyonu 6-Nakliyât komisyonu Bu altı komisyonun vezâifine dâir ileride îzâhât verilecekdir. *** Muʻâvenet Menâbiʻ ve Vesâiti Hakkında Tahkîkât Evvelâ, lüzûmu hâlinde işe yarayabilecek vesâit ve menâbiʻ-i muʻâvenet taʻyîn edilmiş olacakdır. Bu bâbda icrâ edilecek tahkîkâtdan bakkâliye, et, konserveler, ekmek, süt, yatak, [8] şilte, yor- gan, matbah levâzımı, ocak gibi şeylerin vakit gâib edilmeksizin nereden tedârük edilebileceği anla- şılacakdır. Kezâlik bu tahkîkât netîcesinde âfetzedegâna muvakkat mesken ittihâz edilecek kışlalar, mekteb, câmiʻ ve kilise gibi emâkin-i umûmiyenin mahalleri ve adedleri maʻlûm olacakdır.