HİLÂL-İ AHMER MECMÛʻALARI / CİLT 8

Türkiye Hilâl-i Ahmer Mecmû‘ası Sayı 69 3438 Ahmer'in ısrârıyla üzerinde işlemeğe mecbûr bulunduğu envâʻ-ı vâridât meyânında iʻânât ve âidât gibi cemʻiyetin esâs-ı teşekkülüne mevzûʻ ve sâha olan vâridâta tehâlükle sarılması, halkın hamiyet ve şefkatinin bu vâridât üzerinde tahrîk ve tesbîti ve vilâyât şuʻabât ve teşkîlâtının Hilâl-i Ahmer'in fevkalâde zamânlarda derʻuhde edeceği vezâifinin şümûl ve şefkati dâiresinde tensîk ve ihyâsı husûs- larına ziyâdesiyle ehemmiyet verilmesini çok şâyân-ı temennî görmekdeyiz. Kongreler heyʼet-i muh- teremesinin teveccüh ve iʻtimâdına istinâd iki seneden beri Hilâl-i Ahmer hesâbât ve muʻâmelâtını teftîş ile meşgûl bulunan komisyonumuz, heyʼet-i merkeziyeyi teşkîl eden zevâtın fevkalâde hamiyet ve hüsn-i idâresine ve muhâsebe dâiresinin en dürüst usûl ve kâʻide-i hesâbiye dâiresinde hareketine rağmen vilâyât merâkiz ve şuʻabâtında dâimâ atâlet müşâhede etmiş ve vâridâtının noksân tahakkuk ve irsâlinden bi-hakkın endîşe duymuşdur. *** [1]927-[1]928 Büdcesi Hilâl-i Ahmer'in 1 Temmuz [1]927 – 30 Haziran [1]928 târîhine kadar bir senelik büdce lâ- yihasının envâʻ-ı vâridâtını teşkîl eden fasıllara mevzûʻ erkâm ile bunların cemʻan yekûn-ı bâliği olan 821.004 liranın cemʻiyetin bir senelik vâridât-ı muhammenesi mecmûʻu bulunduğu bi't-tedkîk kabûl edilmişdir. Masârıfâta gelince; tablosunun tedkîkinden anlaşılacağı üzere tahsîsât ve maʻâşât, masârıf-ı idâre, masârıf-ı müştereke ve Hilâl-i Ahmer'e taʻalluk eden masârıf-ı umûmiye nâmı altında dört kısımda tasnîf edilerek tahsîsât ve maʻâşât kısmı, geçen seneye nisbetle bazı ihdâsât ve zamm-ı maʻâşât dolayısıyla ez-cümle tahrîrât ve sicil müdürünün maʻâşının kırk lira zammıyla iki yüz liraya ve Eskişehir anbârı eczâ şuʻbesi meʼmûrunun otuz lira zammıyla yüz elli liraya kezâlik anbâr kâtibi- nin on lira zammıyla yüz liraya ve Hilâl-i Ahmer Mecmûʻası müdürünün maʻâşı elli sekiz lira iken yüz elli ve mütercimin maʻâşı on beş iken kırk liraya iblâğından ve yüz yetmiş beş lira maʻâşlı âlât-ı tıbbiye ve cerrâhiye meʼmûrluğu ve yüz elli lira maʻâşlı âlât-ı tıbbiye fen meʼmûrluğu ihdâsı münâ- sebetiyle geçen seneye nisbetle mahsûs bir tezâyüd ile tesbît olunduğu görülmüşdür. Masârıf-ı idâre, masârıf-ı müştereke ve Hilâl-i Ahmer'e taʻalluk eden masârıf-ı umûmiye mik- dârları geçen senenin aynı olup maʻâşâtın, bir sene zarfında îfâ edilecek hidemâta ve masârıfâtın kezâ bir sene zarfında vâkiʻ olacak sarfiyâta tekâbül edebilecek mikdârda 757.946 lira olarak tesbît edilmiş olduğu bi't-tedkîk anlaşılmışdır. Büdceye âid olup on beş mâdde hâlinde teklîf [364] olunan büdce mevâdd-ı nizâmiyesi muhâ- sebece verilen îzâhât üzerine aynen şâyân-ı kabûl görülmüşdür. Komisyonumuz büdce üzerindeki mütâlaʻât ve tedkîkâtını arz ederken Hilâl-i Ahmer meʼmûrîni hakkında geçen sene raporumuzda dermeyân etmiş olduğumuz 6'ncı mâddedeki temennîmizin bu sene raporuyla da aynen ve tekrâren temennisini muvâfık görmekdeyiz. Hilâl-i Ahmer'in mukadderâtına rabt-ı hayât ve istikbâl eden ve mesâʻîlerinde muvaffakiyetle hareket eden cemʻiyet müstahdemîninin temennîmizin maʻtûf bulunduğu hiss-i takdîr ve sahâbete lâyık bulundukları kanâʻatindeyiz. Her sene olduğu gibi bu sene de meclis-i âlîlerince fevkalâde olarak idâre-i merkeziye, müfettişler ve Eskişehir meʼmûrînine birer maʻâş nisbetinde ikrâmiye iʻtâsıyla tahakkukâtının [1]926-[1]927 büdcesine tah- sîsât-ı fevkalâde olarak ilâvesini teklîf eyleriz. 31 Haziran [1]926 târîhine kadar olan devre-i hesâbiyeye âid bilanço, malzeme ve büdce hesâb-ı katʻîlerinin defâtir-i esâsiye ve vesâik-i hesâbiye muhteviyât ve mündericâtına mutâbık ve muvâfık bulunduğu bi't-tedkîk anlaşılmağla bu bâbdaki temenniyât ve mütâlaʻâtımızla birlikde heyʼet-i muh- teremenin huzûr-ı tasvîbine arz olunur.