HİLÂL-İ AHMER MECMÛʻALARI / CİLT 8

Türkiye Hilâl-i Ahmer Mecmû‘ası Sayı 70 3498 Edhem Pertev Bey memleketimizde eczâcılığın inkişâfına vakf-ı vücûd eden ve birçok müstah- zarât-ı tıbbiye âmili ve müstahzırı olan kıymetli bir eczâcı üstâdı idi. Edhem Pertev Bey'in vefâtıyla Hilâl-i Ahmer Cemʻiyeti erkân-ı âilesinden mühim bir uzvunu gâib etmiş oluyor. Âile-i keder-dîdesine hissiyât-ı taʻziyetkârânemizi takdîm ederiz. _______________ Üserâya Muʻâvenet Rusya'da kalan 237 nefer esîrin celbleri için mukaddemâ Hilâl-i Ahmer Merkez-i Umûmîsin- ce on bir bin beş yüz lira tahsîs edilerek bu husûsa sarf edilmek üzere Moskova Sefâreti emrine gönderildiğini mukaddemâ yazmışdık. Rusya'da kalan üserâdan mâʻadâ Irak, Suriye, Filistin vesâir mahallerde esbâb-ı muhtelife dolayısıyla müteferrik sûretde kalan ve parasızlıkları yüzünden hâlen avdet edemeyen esîrlerimizin avdetlerinin teʼmîni için Hilâl-i Ahmer Cemʻiyetince yeniden on bin lira tahsîs kılınmışdır. _______________ Hilâl-i Ahmer'e aʻzâ kaydolunan her vatandâş vatanına karşı büyük bir vazîfe-i medeniyeyi îfâ etmiş olur. _______________ Bir Esîrimizin Celbi Haleb civârında Raco nâhiyesinde kaldığı anlaşılan Herekeli Ali bin Süleyman nâmında bir esîrimizin masârıf-ı seferiyesinin Hilâl-i Ahmer Cemʻiyetince tesviyesiyle celbine teşebbüs olunmuş ve mûmâileyhin buldurularak sevki Haleb Şehbenderliği'nden ricâ edilmişdir. _______________ Hayırlı Bir Bahis Dolayısıyla Hilâl-i Ahmer'e Yapılan Yardım İstanbul Meydancık'da Vlora Hânı'nda 5 ve 7 numaralarda Afyon Tüccârı Kahvecizâde Hacı Abdurrahim Efendi ile İzmir'de Afyon Tüccârı Mösyö Davimann arasında 1925 senesi afyon mah- sûlü hakkında yapılan bahisde mahsûlün tahmînden eksik zuhûr etmesine nazaran bahsi gâib eden Davimann Efendi tarafından mûmâileyh Hacı Abdurrahim Efendi vâsıtasıyla Hilâl-i Ahmer'e teberruʻ olunan yirmi bin kuruş İstanbul merkezi veznesince ahz edilmişdir. Hilâl-i Ahmer'e yardım maksadıyla işbu bahis müteşebbisleri olan her iki zâta teşekkürâtımızı takdîm ederiz. _______________