HİLÂL-İ AHMER MECMÛʻALARI / CİLT 8

Türkiye Hilâl-i Ahmer Mecmû‘ası Sayı 70 3516 yaşayan insânlardaki hayır-perverlik rûhunun kudretini ifâde eden bu rakamlar önünde büyük bir intibâha vâsıl olmamız lâzımdır. Küçük Avrupa milletlerinin bu sâhada gösterdikleri hassâsiyet çok câlib-i dikkatdir. Bin bir dağdağa ve hâile içinde geçen son yirmi senenin hâdisâtından alınan tecrübe ve intibâʻlar bizi de Hilâl-i Ahmer teşkîlâtında bir Avrupa milletinin gösterdiği fedâkârlığa ve idrâk etdiği tekemmüle sevk edebilecek kuvveti hâizdir. Bilhâssa çok mühim siyâsî ve iktisâdî safhalar irâe eden büyük inkılâbın işâret etdiği vezâif-i ictimâʻiye arasında Hilâl-i Ahmer'e daha vâsiʻ bir kâbili- yet teʼmîn etmek ve mesâʻî-i insâniyesinin inkişâfı için çalışmak ve fedâkârlık göstermek mesʼelesi mündemicdir. Hilâl-i Ahmer yalnız harb senelerinin taleb etdiği şefkat ve muʻâvenete cevâb veren bir teşkîlât değildir. Zelzelenin, yangının, seylâbın nihâyetsiz hüsrân ve elemlerine karşı en yüksek bir [423] hiss-i insânî ile harekete gelen kudsî bir teşekküldür. Binâenaleyh hayır-perver halkımızın aʻzâ kaydedilmek sûretiyle ve diğer muhtelif şekillerle Hilâl-i Ahmer'e yardım etmesini millî inkılâbın büyük kahramânının arzusunu isʻâf noktasında da temennîye şâyeste bulmakdayız". _______________ Varlık refîkimizden: " -Hilâl-i Ahmer Vatanî duygularımızın en başında muhâfaza-i vatan gelir. Her Türk bâkir vatanının bu müstesnâ güzelliği karşısında kalbî bir meclûbiyet duyarak onu hâin düşmanlarına teslîm etmemek için göğsü- nü siper yapmakdan çekinmez. Harbin bu fecîʻ günlerinde yaralılarımız, bedbahtlarımıza dest-i muʻâ- venetini uzatarak, bizi insânî muʻâmeleleriyle kendisine bağlayan biricik bir müessesemiz vardır. O müessese ki bize en sıkışık bir zamânımızda bile yardım ve muʻâvenet ile mahmûl ellerini uzatmış, bizi tesellî etmiş, kanayan bağrımızı sargılarıyla sarmış, açlarımıza yardım etmiş ve memleketde mü- tevâzıʻ faʻâliyetiyle tanınmış Hilâl-i Ahmer'dir. Ben bu müesseseyi takdîr için hiçbir söz bulamıyorum. Onun yapdığı iyiliklerin hangi birisini sayayım? En tenhâ vatan köşelerine kadar giderek felâketzedelere muʻâvenet etmiş, sevindirmişdir. Meclisin bu sene küşâdında memleketimizin gözbebeği reîsicumhûrumuz Gâzî Paşa hazretleri dahi küşâd merâsimindeki nutuklarında beyân buyurmuş oldukları vechile 'târîh-i harb-i sıhhîde ve memleketde muʻâvenet-i ictimâʻiye târîhinde bir mevkiʻ-i mahsûs ihrâz etmiş ve Türkiye'de elli se- nelik bir kıdem-i teessüse mâlik bulunmuş olan Hilâl-i Ahmer Cemʻiyeti' gibi sitâyişkâr sözlerle bu müesseseyi tebrîk ve takdîr buyurmuşlardır. Hilâl-i Ahmer'e yardım vatanî bir borçdur. Her Türk, vatan vazîfelerinde yekdiğeriyle müsâba- ka etmekden bir zevk, bir aşk alır. İşte bunun için memleketde her açılan şefkat yuvaları iyi bir zemîn bularak inkişâf etmiş ve herkesi de netîce iʻtibârıyla memnûn ve mesrûr etmişdir. Memleketimizde bilhâssa Hilâl-i Ahmer Cemʻiyeti'nin aʻzâsı olarak yardım edenler belki milyonlara bâliğ oluyorsa da Hilâl-i Ahmer'in bütün milletden müteşekkil bir kitle hâlinde aʻzâsı olmalıdır. Her sene vereceğimiz bir lira gibi cüzʼî bir meblağ ile sıkıntılı günlerde yine bizlere dest-i muʻâvenetini uzatacak olan bu müesseseyi şimdiden hâzırlamak îcâb eder. Her Türk Hilâl-i Ahmer'e aʻzâ yazılmak için müsâbaka etmelidir. Bu, bugünün ve âtînin en büyük bir işidir. Unutmayalım! Rıza Süleyman " _______________