HİLÂL-İ AHMER MECMÛʻALARI / CİLT 8

Türkiye Hilâl-i Ahmer Mecmû‘ası Sayı 71 3538 Bundan dolayı evvel emirde halkın her sınıfı arasında sineklerin imhâsı için vâsiʻ mikyâsda mücâdele propagandası teşkîl ve sirâyet-i emrâza vâsıta olan bu tufeylîden tahaffuz çârelerini teʼmîn etmek lâzımdır. Sineklerle mücâdeleye en müsâʻid mevsim şübhesiz ilkbahârdır. Bu mevsimde sinekler yu- murtlamağa başlar. Her yumurtadan sıcak mevsimde birçok ensâl yetişir. Bu sûretle bir sinekden milyonlarca sinek hâsıl olacağından Nisan'da bir sineği öldürmek Eylül'de milyonlarca sineği itlâf etmeğe muʻâdildir der isek, aslâ mübâlağa etmemiş oluruz. Maʻamâfîh sonbahârla kış arasında yapı- lacak mücâdele dahi muvaffakiyet teʼmîn etmekdedir. Bu mevsimlerde lokantalarda, matbahlarda, serlerde, ahırlarda hulâsa yaz mevsimine intizâren ilticâ edebilecekleri mahallerde sinekler imhâ edilmelidir. Bu îzâhâtı verdikden sonra yapılacak mücâdele planını da âtîye derc ediyoruz: 1-Halkın terbiyesi 2-Yumurta ve sürfelerin imhâsı 3-Sineklerin meskenlere dühûlünün menʻi 4-Girmiş olanlarının itlâfı 5-Meʼkûlât ve meşrûbâtımızın sineklerden muhâfazası 1-Halkın Terbiyesi Memâlik-i müterakkiyede mücâdele planı ve mücâdelede istihdâf olunan gâye afişler, program, sinema, [438] konferans, telsiz telefon musâhabeleri ve gazete makâlâtıyla neşr u taʻmîm edilmekde- dir. Bunlardan risâle ve afişler mahallin sıhhiye dâiresi veya Salîb ve Hilâl-i Ahmer şuʻbesi tarafından derʻuhde ve tevzîʻ edilir. Sıhhiye müfettiş veya etıbbâsı radyo ile konferans ve musâhabeler verir. Matbûʻâtın mücâdeleyi yakından taʻkîb etmesine fevkalâde ehemmiyet verildiğinden propa- ganda mâhiyetinde yazılacak makâlât ile mücâdelenin seyir ve inkişâfına ve elde edilen netâyice âid hulâsalar neşrolunmak üzere gazetelere teblîğ ve bilhâssa genç mekteblilerin mücâdeleye dikkat ve merâkı celb edilir. Mekteblerde mücâdelenin muʻallimler ve mekteb tabîbi ve Gençlik Salîb-i Ahmeri tarafından idâresi şâyân-ı tavsiyedir. Propagandaya vâsıta olacak afişler müsâbaka ile intihâb edilir. 2-Yumurta ve Sürfelerin İmhâsı Yumurta ve sürfelerin imhâsında en müessir usûl sürfelerin yumurtadan çıkmalarına mâniʻ ol- makdır. Mayalanmış, tahammür etmiş gübreler yumurtaların inkişâfına müsâʻid olmadığından eski güb- reler tazyîk edilmeli ve bastırılmalıdır. Sık sık istiʻmâl edilen kireç kaymağının sürfelerin imhâsında hiçbir teʼsîri yokdur. Tâze gübre kurumuş ise sulandırdıkdan sonra kürekle karıştırarak top ve yığın hâline getirilmeli ve kenârlarına 30 derecelik bir vazʻiyet-i mâile verilmelidir. Alt üst edilen gübrenin üst sathı katı ve düz kalmalıdır ki, bu sûretle gübrenin tahammüründen hâsıl olacak yüksek derece-i harâret sürfeleri mahv edebilsin. Yeniden istif edilecek gübreler kürek- lerle iyice sıkıştırılacak ve havâ kurak gidiyor ise sulandırılacakdır. Gübrenin istif edildiği gün ile müteʻâkib iki gün esnâsında gübrenin heyʼet-i umûmiyesi kürek- lenerek üst tabaka alta getirilmek sûretiyle sürfeler harâretin teʼsîrât-ı muhribesine ve alt tabakalarda ihtimârdan hâsıl olacak gazlara terk edilecekdir. Sineklerin çoğalmasına mâniʻ olmak üzere yumurtaları hâvî bârgîr gübresini gömmekden hiç- bir fâide hâsıl olmaz. Meskenlerde toplanan süprüntülere mahsûs kaplar sineklerin girmesine müsâʻid olmayacak tarzda kapalı tutulacakdır.