HİLÂL-İ AHMER MECMÛʻALARI / CİLT 8

Türkiye Hilâl-i Ahmer Mecmû‘ası Sayı 71 3561 Refik Bey (Konya): "-Biraz evvel heyʼet-i muhteremenin kabûlüne iktirân eden raporlar üze- rine artık tekrâr mütâlaʻa dermeyânına imkân yok ise de arkadâşlarımızı bir defa daha tatmîn etmek için arz u îzâha mecbûr oldum. Fi'l-hakîka arzu etdikleri maksad çok kıymetlidir. İstanbul şuʻbesi ga- zetenin görülen nevâkısı ikmâl ederek daha ziyâde satış yapmasını istiyor. Bayram günlerinde gaze- tenin intişârı hakkında raporda bunun cevâbını ber-tafsîl arz etmişdik. Bir defa İstanbul şuʻbesi kendi tarafından neşrolunacak gazeteleri diğer şuʻabâta göndermekde dûçâr-ı müşkilât olacakdır. Zannede- rim bunu kendileri de kabûl edeceklerdir. Çünkü heyʼet-i muhteremelerince maʻlûm olduğuna göre Hilâl-i Ahmer'in dört yüze yakın şuʻbeleri vardır. O şuʻbeler vâsıtasıyla bayramlarda neşredilen ga- zetelerin revâcı teʼmîn edilmekdedir. İstanbul şuʻbesi gazeteleri şuʻbelere göndermekde ve abone teʼmînine hiç şübhesiz merkez-i umûmî kadar şuʻbelere karşı hâiz-i teʼsîr olamayacakdır. Esâsen gazetenin imtiyâzının doğrudan doğruya merkez-i umûmî nâmına alınması dolayısıyla bu yola gi- dilmesinin imkân-ı kânûnîsi yokdur. Arkadâşlarımızın propaganda husûsundaki düşünceleri dâimâ ellerindedir. Şimdiye kadar İstanbul şuʻbesinin faʻâliyetini merkez-i umûmîniz ân be-ân taʻkîbden fâriğ değildir. Kendilerinden çok ricâ ederiz ki, muhakkak olarak dermeyân etdikleri bu faʻâliyeti bu sâhada ve her sâhada şimdiye kadar olduğu gibi bundan böyle de daha mütezâyid bir sûretde yapsın- lar. İstanbul yevmî matbûʻâtı her vakit Hilâl-i Ahmer'e lâzım gelen muʻâveneti kemâl-i memnûniyet ve şerefle yapmakdadırlar. Bu vesîle ile o arkadâşlara buradan teşekkürü vecîbe addediyorum. Hilâl-i Ahmer Cemʻiyeti'nden maksad cemʻiyetin makâsıdını dâimâ mazhar-ı muzâhereti olduğumuz halka tanıtmakdan ibâret oldukdan sonra İstanbul'da yevmî olarak intişâr eden gazetelerin muzâheretinden her vakit istifâde imkânı vardır. Şu hâlde propaganda maksadıyla yalnız bayramlarda çıkacak gaze- tenin muʻayyen arzusunu tatmîn etmek için muʻayyen günler üzerinde kâfi derecede tatmîn edilmiş olmayacağı zannederim ki, kendiliğinden anlaşılmış olur. İstanbul şuʻbesi gazetenin neşri kendilerine intikâl etdiği takdirde daha muntazam bir sûretde ve daha müfîd olacağını verdikleri takrîrde îzâh buyuruyorlar. Eğer şimdiye kadar çıkan gazetelerde bazı noksânlar varsa o da kendileri de teslîm edecekleri vechile merkez-i umûmî Ankara'ya intikâl etdikden sonra -ki bir buçuk sene vakit geçmiş demek oluyor- bu müddet zarfında [461] teşkîlâtı bizim de arzu etdiğimiz tarza getirmek için lâzım olan vesâiti henüz teʼmîn edememiş olmakdan ileri gelmişdir. Eğer Ankara'da bizim maksadımı- zı tamâmıyla teʼmîn edecek matbaʻa olsa idi zâten merkez-i umûmî nâmına imtiyâzı alınmış olan Hilâl-i Ahmer gazetesi bayram günlerinde de doğrudan doğruya Ankara'da çıkarılacak ve bu sûretle de tevzîʻ vazîfesi îfâ edilecekdi. Arkadâşlarımızın cemʻiyetin maksadını daha ziyâde tevsîʻ ve daha ziyâde halka tanıtmak husûsundaki arzularını kemâl-i hürmetle kabûl ederiz ve yalnız çok ricâ ederiz, mesâʻîlerini diğer husûsâta teksîf ederek zâten imkân-ı kânûnî olmayan bu gazetenin neşri talebinden sarf-ı nazar buyursunlar. Şefkat pulları mesʼelesine gelince; esâsen gerek raporumuzda ve gerek raporumuzun esbâb-ı mûcibesini kabûl sadedindeki takrîrlerinden söylendiği vechile şefkat pullarının muʻayyen olan dînî ve millî bayramlardaki hâsılâtının şuʻbelere ve bilhâssa İstanbul şuʻbesine verilmesine imkân-ı kânûnî yokdur. Bu husûsdaki kânûnun mâddesi sarîhdir. Bundan hâsıl olacak vâridât doğrudan doğ- ruya Posta Müdüriyet-i Umûmiyesi tarafından merkez-i umûmîye devrolunacakdır. Şu hâlde böyle bir tertîbe meclis-i umûmînin gitmesine imkân yokdur. Kânûnen muʻayyen olan günlerden yani dînî ve millî bayram günlerinden mâʻadâ husûsâtda şefkat pullarının sarfiyâtında kendilerinin serbest kal- masını arzu ediyorlar. Bunu merkez-i umûmîniz memnûniyetle karşılar ve çok temennî ederiz ki, ar- kadâşlarınız merkez-i umûmînizi memnûn edecek şekilde şefkat pulları üzerinde vâridâtı daha ziyâde tezyîd etmek için hasr-ı mesâʻî buyursunlar. Esâsen her vesîleden bi'l-istifâde gerek İstanbul ve gerek diğer şuʻbelerimizden şefkat pullarının sarfiyâtının tezyîdi husûsundaki gayretlerini ricâ etmekdeyiz.