HİLÂL-İ AHMER MECMÛʻALARI / CİLT 8

Türkiye Hilâl-i Ahmer Mecmû‘ası Sayı 72 3604 Gerek sıcak ve gerek soğuk suyu ayrı borularda cârî olan ve bir kişilik olmak üzere yapılan bu banyolarda şahsî hıfzıssıhha daha hüsn-i sûretle teʼmîn edilmiş idi. Bundan mâʻadâ yıkananlar sevdiği derece-i harâretde suyu kolaylıkla teʼmîn edebili[yo]rlar ve istedikleri takdîrde vücûdlarını kâmilen suya daldırıyorlar veya sâdece sabun ile yıkanıp çıkıyorlardı. Birçokları banyonun tepesine takılan husûsî bir âletle "duş" nâmı verilen serpinişli bir yıkanmayı tercîh ederlerdi. Garblılar hemen bütün ev ve otellerde, mekâtib ve müessesât-ı ictimâʻiyede banyo usûlünü kabûl etmişlerdir. Bu banyoların inşâsı ale'l-ekser standard olarak yeknesak olup ancak inşâda kullanılan mal- zeme herkesin servetine göre tehâlüf etmekdedir. Fevkalâde nefîs beyâz çiniden maʻmûl olanları da vardır. Garbda Türk hammâmları ancak büyük ve meşhûr şehirlerde inşâ olunmakda ve daha ziyâde merâklıları, heveslileri celb etmekdedir. Amerika'nın hemen büyük otellerinde ve arş-ı aʻlâya çıkmış en yüksek katlarında bu nevʻ hammâmlar otel sâkinlerine gâyet eğlenceli sâʻatler geçirmekdedir. Tabîʻatı ile şarkda ve garbda ayrı sûretde teessüs eden istihmâm usûlleri gitdikçe şiddet ve şeʼniyetini gâib etmekde ve bugün şarkda banyo usûlleri taʻammüm etmekle berâber garbda Türk hammâmlarından müstağnî kalamamışdır. Son senelerde yüzmenin de pek lâzım ve mühim bir spor olduğu tezâhür etdikden sonra yı- kanmak ve temizlikle berâber yüzmeye müsâʻid sûretde havuzlar inşâ olunmağa başlandı. Burada yüzmek öğrenenler cân kurtarmak tecrübeleri de yaparak cân pahâsına olan muʻâvenetlere de vâkıf oldular. Bu husûsda fevkalâde mücerreb ve vukûflu yüzme hocaları hemen her gün yüzücü ordusuna kıymetli eşhâs ve nâsıyeler ilâve etdi. Bu sûretle yüzücü ordusunun efrâdı her gün tezâyüd etmekde ve bu ordu efrâdında şahsî iʻ- timâd, âhara muʻâvenet, cân kurtarmak seciyeleri tebârüz etmekdedir. Zengin eşhâs ve müesseseler tarafından ara sıra yapılagelen muʻâvenet-i nakdiye ve mükâfât bu ordu efrâdını gün geçdikçe daha ziyâde himâye ve rekâbete arz etmekdedir. Yüzme havuzları gerek dâhil ve gerekse hâricden olsun muʻayyen ve muvâfık bir derece-i harâretde olmaları îcâb eder. Pek sıcak ılıca ve kaynakçalardaki havuzlarda yüzmek, harekât-ı ânife yapmak hiçbir sûretle muvâfık değildir. Pek soğuk sularda uzun müddet kalarak yüzmeğe çabalamak- da muzır olabilir. Denilebilir ki, bugün yüzme havuzları medenî memleketlerde Maʻârif ve Sıhhiye Dâirelerinin başlıca meşgalesi olmuşdur. Bundan mâʻadâ şehir ve belediye dâirelerinde teʼsîs edilen eğlence şuʻbeleri de bu gibi mesâil ile meşgûl olmakdadır. Her şehir ve kasabada gün geçdikçe bu ha- vuzların adedi tezâyüd etmekde ve her yeni yapılan mekteb ve irfân müesseselerinde de bu havuzlar esâs mâdde olarak ehemmiyete alınmakdadır. Yüzme havuzları hemen her memleketde bir standard olarak inşâ edilmekdedir. Tarz-ı inşâ ve miʻmârî yekdiğerinin aynı ise de tezyînât ve tertîbât cihetiyle fevkalâde lüks ve şaʻşaʻalı olan havuz- lar [495] bilhâssa zengin millet ve memleketlerde gitdikçe çoğalmakdadır. Yüzme havuzları ale'l-umûm dâhilî ve hâricî olmak üzere iki kısımdır. Bi'l-umûm dârülfünûn ve kolejlerde, mekâtib-i resmiye ve husûsiyede, yat kulüblerinde, devr-i âlem seyyâh gemilerinde, hastabakıcı yurdlarında ve diğer müessesât-ı husûsiyede inşâ olunan havuzlar dâhilîden maʻdûddur. Bu gibi havuzlar yüzmek ve yıkanmak husûsunda yaz ve kış istiʻmâl olunabilir. Bunların ebʻâd ve eşkâli pek az tehâlüf etmek üzere birbirinin hemen aynı olup ekseriyâ beyâz, mavimtırak, dört köşeli çini taşlarıyla döşenirler. Temiz ve berrâk bir suyun vereceği mavimtırak