HİLÂL-İ AHMER MECMÛʻALARI / CİLT 8

Türkiye Hilâl-i Ahmer Mecmû‘ası Sayı 72 3647 Kadınların idâre etdiği diğer bazı müessesât da mektebe talebe kaydını teşvîk için bazı talebe- nin masârıfını derʻuhde etmekdedir. On sene sonra mevkiʻ-i tatbîke vazʻ edilmek üzere geçen sene kabûl olunan bir kânûna tevfîkan müessesât-ı sıhhiyede yalnız şehâdetnâmeli hastabakıcılar istihdâm edileceğinden bu kânûn İtalya'da mesleği yeni bir faʻâliyet sâhası açmışdır. Açık havâ kolonileri, dispanserler, sanatoryumlar, hastahâneler vesâir müessesât tarafından kânûnen muʻayyen olan şerâit dâhilinde yetişmiş hastabakıcılar taleb edilmekdedir. [530] Bari Hastabakıcı Mektebi'nin küşâdı İtalya'da bu mesleğin yeniden terakkî ve inkişâfına hizmet edecekdir. _______________ Küba Kansere Karşı Mücâdele Birliği 1925 senesinde teşekkül ederek Küba Salîb-i Ahmer Merkez-i Umûmîsi binâsında icrâ-yı faʻâ- liyet eden bu birlik her ay resmî bir risâle neşretmekdedir. Birliğin maksad-ı teşekkülü: 1-Kansere dâir bi'l-cümle maʻlûmâtı cemʻ, tevzîʻ ve taʻmîm etmek 2-Kanserin esbâbına müteʻallik tedkîkâtı teşvîk etmek 3-Ahâlînin fakîr tabakalarında kanserin tedâvîsini teshîl etmek _______________ Bulgar Sinema Filmi ile Yapılan Propagandalar Bulgar Salîb-i Ahmeri'nin umûmî ve çocuk hıfzıssıhhaları hakkında sinema filmleri ile Sof- ya'da ve eyâletlerde verdiği umûmî halk konferansları pek büyük rağbeti celb etmekdedir. Birçok kimselerin hâzır bulunduğu bu konferanslar hem hıfzıssıhha prensiplerinin neşr u taʻmî- minde propaganda vâsıtası olmakda ve hem de konferansın hitâmını müteʻâkib huzzârdan ekserîsinde Salîb-i Ahmer'e aʻzâ kaydolunmak şevk u hevesini uyandırmakdadır. Bulgar Salîb-i Ahmeri bu tarzdaki propaganda hudûdunu tevsîʻ etmek fikir ve niyetindedir. _______________ Felemenk Altmışıncı Devr-i Senevî Târîh-i teessüsünden 60'ıncı devr-i senevîsi münâsebetiyle Felemenk Salîb-i Ahmer Merkez-i Umûmîsi on seneden fazla cemʻiyetin hizmet-i fiʻliyesinde bulunup da el-yevm cemʻiyete arz-ı hiz- met eden aʻzâya birer madalya tevzîʻine karâr vermişdir.