HİLÂL-İ AHMER MECMÛʻALARI / CİLT 8

Türkiye Hilâl-i Ahmer Mecmû‘ası Sayı 73 3701 1926 senesine âid umûmî raporun mütâlaʻasından bu cemʻiyet aʻzâsının adedi 684.000'den 772.840'e bâliğ olduğu anlaşılıyor. Alman Salîb-i Ahmeri Kadınlar Cemʻiyeti 2.505'e bâliğ olan tekmîl şuʻabâtıyla Almanya'nın en mühim, en muʻazzam bir kadın teşkîlâtıdır. Cemʻiyet şuʻabâtının himmet ve mesâʻî-i dâimesi sâyesinde 2.388 vilâdethâne ve himâye-i etfâl merkezi, 140 verem mücâdele merkezi, 1.853 hasta tedâvîsine mahsûs müessesâtı teşekkül etmiş ve Colonia'da en asrî malzeme ile mücehhez yeni bir güneş tedâvî yurdu teʼsîs ve küşâd edilmişdir. Cemʻiyetin reîsesi Kontes Greben, ittifâk-ı ârâ ile tekrâr riyâsete intihâb olunmuşdur. _______________ Japon Meclis-i Umûmî İctimâʻı Japon Salîb-i Ahmer Meclis-i Umûmîsi otuzuncu devre-i seneviyesi ictimâʻını 5 Mayıs'da Tok- yo'da akdetmişdir. Bu ictimâʻda 5.000'den fazla murahhas [35] ve 2.000 kadar Salîb-i Ahmer'le alâkadâr zevât hâzır bulunmuşdur. Cemʻiyet reîsi Baron Hirayama tarafından meclis-i umûmîye takdîm edilen ra- porlarda Gençlik Salîb-i Ahmeri hâric olmak üzere senenin bidâyetinde iki buçuk milyona bâliğ olan cemʻiyet aʻzâsının adedi günden güne tezâyüd etdiği zikrolunmakdadır. _______________ İsveç 1926 Senesi Raporu İsveç Salîb-i Ahmeri'nin ahîren neşretdiği 1926 senesine âid raporda merkez ve şuʻbelerin ade- di 154'e ve aʻzâ adedi 6.427'si Gençlik Salîb-i Ahmeri'ne âid olmak üzere 71.630'a bâliğ olduğu görülmekdedir. Raporun sulh faʻâliyetine tahsîs etdiği kısmında hastabakıcılar teşkîlâtından, Salîb-i Ahmer has- tahânesinin faʻâliyetinden, ziyâretçi bakıcılardan, service social nâmını alan vezâif-i ictimâʻiyeden, fakîr çocuklara mahsûs halk matbahlarından, Samariten teşkîlâtından, vilâdethânelerden, çocuk ko- lonilerinden, nekâhathânelerden, taʻtîl kolonilerinden, meccânî hammâmlardan, diş muʻâyenehâne- lerinden, sıhhiye ve hasta nakline mahsûs tayyârelerden, Salîb-i Ahmer anbârlarından, emrâz-ı sâriye mücâdelelerinden vesâireden bahsedilmekdedir. Beynelmilel sâhaya âid icrââtdan Bulgar muhâcirleri için iʻzâm kılınan heyʼet-i imdâdiyenin muʻâvenet faʻâliyeti mezkûrdur. _______________ İzlanda Adası Salîb-i Ahmeri Maʻlûm olduğu üzere İzlanda, Bahr-ı Muhît-i Şimâlî'de muhtâriyet-i idâreyi hâiz ve 75 bin nüfûsa mâlik balıkçılığıyla meşhûr bir adadır. İzlanda Salîb-i Ahmeri'nin 1926 senesi raporunda aʻzâ mikdârı 1.368 gösterilmişdir. Cemʻiyet, balıkçılara oldukça mühim sıhhî muʻâvenetler îfâ etmekdedir. Müdür-i Mesʼûl: Arif Süleyman