HİLÂL-İ AHMER MECMÛʻALARI / CİLT 8

Türkiye Hilâl-i Ahmer Mecmû‘ası Sayı 74 3724 Ancak bunun kolayca tatbîkine imkân hâsıl olup olamayacağı cây-ı mülâhazadır. Mesʼele diğer bir nokta-i nazardan tedkîk edilecek olursa gürültünün sıhhati yerinde olanlar için de korkulacak bir düşman olduğuna şübhe edilemez. Fi'l-hakîka devâmlı gürültü ve patırtılar iş sâhibleri için zahmeti ve yorgunluğu mûcib ve dimâğ ve sinirlerin sabr u tahammülünü kırıcı bir hâldir. Son zamânlarda mikdârı her gün tezâyüd eden em- râz-ı asabiye için gürültüye mühim bir hisse tefrîk etmek lâzımdır. Hele şehirlerin gitdikçe kesâfet peydâ eden bazı semtlerinde gecelerimizi huzûr ve râhatla ge- çiremediğimizi düşünür isek müzʻic bu hâle nihâyet vererek cümle-i asabiyemizin normal bir hâlde îfâ-yı vazîfe edebilmesini arzu etmemek kâbil olamıyor. Hâlbuki gürültülerin kısm-ı aʻzamını bilâ-mahzûr refʻ u izâle etmek de mümkündür. Meselâ, otomobil borularının bilâ-lüzûm ötmesi, bazı semt ve mahallelere civâr olan fabrikala- rın muʻayyen sâʻatlerde ve ekseriyâ ale's-seher sâmiʻa-hırâş olan sirenleri, gramofon merâklılarının plaklarını herkese dinletmek için pencereleri fora ederek makinelerini işletmeleri vesâir buna mümâ- sil daha birçok misâller bulabiliriz. Bâ-husûs şehirlerimizde apartman hayâtı başlayalıdan beri gecenin herhangi geç bir sâʻatinde meskenlerine avdet edenler içinde hân ve apartman kapılarını büyük bir tarrâka ile kapayarak komşu- larının hâb u râhatını selb eden insânlara da nâdiren tesâdüf edilmemekdedir. Eğer biraz hukûk-ı diğere hürmet ediyor isek, bu husûsdaki kusûr ve günâhlarımızı hemen iʻ- tirâf etmeliyiz. Çünkü edeb ü terbiyenin, usûl-i muʻâşeretin kavâʻid-i esâsiyesinden birisi de sükût ve sükûnet olacağını unutmamalıyız. Memleketimizde gürültü ve şamatadan nefret eden birçok kimseler bulunacağından Mösyö Granville nâmında Paris'de mukîm bir Amerikalı'nın buna karşı bulduğu çâreleri aşağıya derc ediyo- ruz. Bu zât diyor ki: "-Gürültü ve patırtı kâbil-i izâledir. Bugünden iʻtibâren hemen işe başlayınız. Yazıhâneleri- nizde, [54] evlerinizde yapılacak bîhûde gürültülere müsâʻade etmeyiniz. Yüksek sesle konuşmağı, mâlâyaʻniyât kabîlinden mükâlemeleri, kapıların şiddetle açılıp kapanmasını menʻ ediniz. Bu hayâtî mesʼele hakkında efkâr-ı umûmiyeyi tahrîk ediniz. Bu basît fikrin kabûl edilmesi için delâil-i mukniʻa bulunuz ve bizzât bunu tatbîk ederek muhîtinizde cânlı bir misâl olunuz". Fi'l-hakîka Mösyö Granville'in vazʻ etdiği prensiplerin tecrübesi sehîlü'l-icrâ şeyler olduğundan lüzûmsuz gürültülere karşı girişilecek faʻâl mücâdele ile az çok maksadın husûlüne hizmet edilecek ve büyük şehirler ahâlîsinin sıhhati bunların tatbîki sâyesinde kurtarılmış olacakdır. _______________ HALKA BİRKAÇ NASÎHAT Bu serlevha altında Anvers Zâbıta-i Ahlâkiyesi tercemesini aşağıya derc etdiğimiz taʻmîmi neş- retmişdir: Ebeveyne: Çocuklarınızın vücûd-ı sıhhatleri kadar sıhhat-i ahlâkiyelerini de düşünmek vazîfenizdir. Oku- dukları şeylere yakından alâkadâr olunuz. Arkadâşlarının kimler olduğunu anlamağa gayret ediniz.