HİLÂL-İ AHMER MECMÛʻALARI / CİLT 8

Türkiye Hilâl-i Ahmer Mecmû‘ası Sayı 74 3737 Türkiye Hilâl-i Ahmer Cemʻiyeti'nin bu sene umûmî kongresinde ittifâk ile karâr verildiği vec- hile İstanbul merkezi bu sâhada çok esâslı ve hayırlı tedrîsâta pek yakında başlayacakdır. Bu dersler hem hanımlarımızın ev hıfzıssıhhasına vukûf ile âile hayâtlarında tatbîk etmelerini hem de harb vukûʻunda gönüllü hastabakıcı olacakların bu işde maʻlûmât sâhibi olmalarını teʼmîn etmek sûretiyle iki kat fâideli olacakdır. Tedrîsâtın ehemmiyetini burada tafsîl ve îzâh tamâmen mümkün değildir. Yalnız umûmî bir şekilde taʻrîfi bu teşebbüsün yüksek ehemmiyetini isbât edecekdir. Bu dersler üç ay devâm edecekdir. Okumak, yazmak bilen her Türk hanımı kurslara iştirâk edebilir. Bu kurslar bittabʻ meccânîdir. Tedrîsât başlıca dört kısmı ihtivâ etmekdedir: 1-Hıfzıssıhha kısmı olup havâ, su, temizlik, telebbüs, tegaddî, haşerât, spor bahislerini hâvîdir. [66] 2-İntânî ve sârî hastalıkların sûret-i sirâyetleri ve bunlardan korunma tedbîrleri, bakımları ve çâreleri îzâh olunacakdır. 3-Çocuk bakımı: Yeni doğan çocuğa ihtimâm, yatağı, tagdiyesi ve hastalıkları ve bunlardan korunma çâreleri 4-İlk yardım: Sargılar, nezfler (kan akmaması), tesemmüm, yanıklar, boğulma ve bunlara karşı çâreler. Şurasını da sûret-i mahsûsada kayıd ve işâret ederiz ki, mahzâ hanımlarımıza vesâit-i nakliye iʻtibârıyla bir kolaylık olmak üzere bu tedrîsât Cağaloğlu'nda Hilâl-i Ahmer Merkezi binâsında bü- yük bir iʻtinâ ve ihtimâm ile ve her türlü vesâit-i tedrîsiye ile ihzâr edilen salonda olacakdır. Tedrîsât Gurebâ Hastahânesi Sertabîbi Doktor Ömer Lütfi Bey'in nezâreti altında ve Hilâl-i Ahmer Hastaba- kıcı Mektebi için Almanya'dan sûret-i mahsûsada celb edilen başhemşîre tarafından îfâ edilecekdir. Tedrîsâta 15 Teşrîn-i Evvel'de başlanacakdır ve haftada iki gün olacakdır. Ders adedi yirmi yedidir. Tedrîsât hitâmında muvaffak olan hanımlara Hilâl-i Ahmer Cemʻiyeti tarafından ayrıca tasdîknâme verilecekdir. Bu dersler bütün Türk hanımlarına çok lâzımdır. Tedrîsâta iştirâk arzusunda bulunan hanımlarımız şimdiden Hilâl-i Ahmer Merkezi'ne mürâcaʻatla Tahrîrât Kalemi'ne isimlerini kaydet- direbilirler. _______________ Hilâl-i Ahmer Hastabakıcı Mektebi Meʼzûneleri Hilâl-i Ahmer Hastabakıcı Mektebi'nin yetiştirdiği güzîde ve hamiyetli hastabakıcı hemşîreler- den Nimet Halil Hanım Zonguldak ve Fatma Abdurrahman Hanım Samsun Memleket Hastahânesi Başhemşîreliklerine taʻyîn edilmişlerdir. Her iki hemşîreye yeni vazîfelerinde muvaffakiyetler dileriz. _______________ Sarıkamış'da Hilâl-i Ahmer Teşkîlâtı Sarıkamış'da bazı münevver zevâtın ve bilhâssa Kolordu Kumandanı Asım Paşa'nın himmet ve teşebbüsleri ile bir kazâ şuʻbesi teşekkül etmişdir.