HİLÂL-İ AHMER MECMÛʻALARI / CİLT 8

Türkiye Hilâl-i Ahmer Mecmû‘ası Sayı 68 3376 On millî cemʻiyet veyâhûd Beynelmilel Komite ile beş cemʻiyet veyâhûd Salîb-i Ahmerler ligi komitesi ile berâber beş cemʻiyet tarafından taleb vukûʻunda fevkalâde olarak ictimâʻa daʻvet olunabilir. Daʻvet, meclis vâsıtasıyla vukûʻa gelir. Reʼy sâhibi olanlar: 1-İkinci mâddenin a fıkrasında mezkûr murahhaslar, memleket başına bir reʼy sâhibi, 2-Aynı mâddenin b fıkrasında mezkûr rüesâ, 3-Cenevre Mukâvelenâmesi'ne vâzıʻu'l-imzâ veya ona iltihâk eden devletler murahhasları, 4-Konferansın diğer bütün aʻzâsı reʼy-i istişârîyi hâizdir. Meclis zevât-ı âtiyeden müteşekkildir: 1-Muhtelif memleketlerin millî cemʻiyetlerine mensûb olmak üzere beş aʻzâ ve bir o kadar mülâzım aʻzâ 2-Beynelmilel Komite'ye mensûb ve onun tarafından müntehab iki aʻzâ ve o kadar aʻzâ mülâzımı 3-Salîb-i Ahmer Cemʻiyetleri ligi komitesine ve onun tarafından müntehab iki aʻzâ ve iki aʻzâ mülâzımı. 1 numarada mezkûr beş aʻzâ konferans [312] tarafından üç sene için intihâb olunur. Bunların tekrâr intihâbı câizdir. Bunlar seyr u sefer için bir ücret alırlar. Meclis bizzât bir reîs bir reîs vekîli ve bir kâtib taʻyîn eder. Kâtibe ücret verilebilir. Reʼylerin inkısâmı hâlinde reîsin reʼyi nâfizdir. Eğer reʼye iştirâk eden aʻzânın mikdârı mülâzım aʻzâ ile itmâm edilemezse meclis daha az aʻzâ ile karâr ittihâz edebilir. Meşrût aded ekal dörtdür. Meclis gerek Cenevre'de ve gerek reîsin taʻyîn edeceği herhangi bir mahalde ictimâʻ eder. Reîs ile aʻzâsından üçünün lüzûm gördüğü her vakit toplanır. Meclis konferans tarafından taʻyîn olunacak kavâʻide tevfîkan ittihâda mahsûs iʻânât, muʻâ- venât-ı seneviyeyi hibe ve vasiyet olunan mebâliği tevzîʻ eder, ittihâdın büdcesini hâzırlar, konferan- sa tevdîʻ eder ve ittihâdlara âid mebâliğin sûret-i istiʻmâlini murâkabe eder. Meclis ittihâda teveccüh eden vezâifini Beynelmilel Komite ile Salîb-i Ahmer Cemʻiyetleri Komitesi arasında husûsî konferansın 1 numaralı karârının dördüncü fıkrası ahkâmını nazar-ı iʻtibâra alarak tevzîʻ eyler. Cenevre ve Lahey Mukâvelelerine muhâlif harekât hakkındaki müddeʻayât ve şikâyât ile sû- ret-i umûmiyede bî-taraf bir uzuv tarafından tedkîki îcâb eden mevâddın tedkîki münhasıran Beynel- milel Komite'ye âiddir. 4-Beynelmilel Salîb-i Ahmer Komitesi husûsî konferansın mukarrerâtını nazar-ı iʻtibâra alarak kendi statü ve nizâmnâmesini tanzîm eder. Beynelmilel Komite hâssaten; a) Yeni cemʻiyât-ı milliyenin muntazam bir sûretde teşekkül ve hükûmetleri cânibinden tasdîk olunup olunmadığının tahkîki b) Salîb-i Ahmer Cemʻiyetleri Beynelmilel Bülteni 'nin neşrine devâm c) Alâkadâr memleketlerin cemʻiyât-ı milliyesi arzusuna muhâlif olmamak şartıyla hâl-i harb veya harb-i dâhilî veya iğtişâş gibi cemʻiyât-ı mezkûreden bir veya birkaçının hâl-i tabîʻîde îfâ-yı vazîfe edemediği mahallerde Salîb-i Ahmer faʻâliyetine âid hidemât teʼsîsi husûslarıyla muvazzafdır. Bu bâbda îcâb-ı hâlinde meclis dahi Beynelmilel Komite'ye maʻnevî ve mâlî muʻâvenetde bulunur. Beynelmilel Komite kendisine konferans tarafından tevcîh olunan vezâifi de icrâ eder. Bey-