HİLÂL-İ AHMER MECMÛʻALARI / CİLT 8

Türkiye Hilâl-i Ahmer Mecmû‘ası Sayı 68 3399 Hilâl-i Ahmer, bu şefkatli müessese nasıl harb senelerinde gözyaşlarımızı dindirmeye, yaramızı sarmaya koşuyorsa sulh senelerinde de bize elini uzatmakdan geri durmuyor. Gazetemizin iç sütûnla- rındaki ajans havâdisleri arasında şu satırları teessürle okuyoruz: Hilâl-i Ahmer, Sinob havâlîsinde kışdan ve mahsûlün azlığından müteessir olan muhtâcîn için elli bin okka un göndermeğe karâr vermişdir. Hilâl-i Ahmer, gökden inmiş bir müessese değildir. Bizim şefkatimizden, bizim hamiyet ve fe- dâkârlığımızdan doğma, yine bizim refâh u saʻâdetimize, vatandâşlarımızın âlâm u ekdârını tehvîne koşan bir müessesedir. Tabîʻatın harbden daha müdhiş öyle âfet ve musîbetleri vardır ki, buna karşı koyacak yine bizim vücûda getireceğimiz hayırkâr teşekküllerdir. Bir zelzele vatanın bir parçasını alt üst eder. Azgın bir sel bir köyü bir an içinde yok eder. Bir yangın binlerce hânmânı bir dakîka içinde bir kül harâbesi hâline getirir. Bir salgın milletdâşlarımızın bir kısmını pençesi altında inletir. Kars'da ayağı tökezleyen, Kırklareli'nde burnu kanayan herhangi bir vatandâşımızın ıztırâbından bütün Türk- lerin azâb duyacağında şübhe yokdur. İşte o felâketzede kardeşimize, bizim teessürümüzü iblâğ ede- cek el ancak Hilâl-i Ahmer'dir. Kırşehir'imizde de çokdan beri teessüs etmiş bulunan Hilâl-i Ahmer Cemʻiyeti yarın büyük kongresini Ticâret Odası'nda akdediyor. Hilâl-i Ahmer'in ulvî maksadıyla mütenâsib işler müzâkere edeceği, bir program vücûda getireceği tabîʻîdir. Bize düşen vazîfe, her husûsda bize rehberlik eden, doğru yolu gösteren büyük halâskârımızın bir nutkunda îrâd buyurdukları gibi 'Hilâl-i Ahmer aʻzâ adedinin milletin rüşd-i ictimâʻîsiyle mütenâsib olmasını ve milletin bu tenâsübü teʼmîn ve muhâfaza eylemesini' bütün cihâna karşı isbât için Hilâl-i Ahmer'e aʻzâ kaydolunarak aʻzamî fedâkârlıkla ça- lışmakdır. Cevad Hakkı " _______________ [332] Bursa'da intişâr eden Yeşil Yurd refîkimizden: "-Hilâl-i Ahmer'imiz Beynelmilel bir hayır ve insâniyet müessesesi olan Hilâl-i Ahmer'imizin emsâli Salîb-i Ahmer Cemʻiyetleri arasındaki mevkiʻi dâimî aʻzâ adedinin çokluğu ile ölçüleceğine nazaran halkımızın muzâhereti bir vazîfe-i insâniye olmağla berâber bir vazîfe-i vataniyedir. İstihbârâtımıza nazaran maʻalesef muhterem yeni heyʼet-i idâresinin faʻâliyeti başladığı anda yalnız 130 mevcûdu olması elli bin nüfûsa yaklaşan Bursa'mız için bir noksânlıkdır. Muhterem hemşehrilerimizi hemen Hilâl-i Ahmer'imize aʻzâ kaydolunmakla bu boşluğu telâfî- ye daʻvet ederiz. Her ferd senevî bir lira vermekle Hilâl-i Ahmer'in aʻzâ-yı dâimîsi olabilir. Bu bayram bütün yokluk içerisinde hummâlı bir faʻâliyetle çalışan ve bu saʻyin meşkûr âsârı meşhûd olan yeni heyʼet-i idârenin Himâye-i Etfâl'e olan muʻâvenetini de bir lisân-ı şükrân ile yâd etmeği bir vecîbe biliriz". Müdür-i Mesʼûl: Arif Süleyman