HİLÂL-İ AHMER MECMÛʻALARI / CİLT 9

Türkiye Hilâl-i Ahmer Mecmû‘ası Sayı 77 3925 Moskova: "-Dostumuz Türk Cumhûriyeti Hilâl-i Ahmeri'nin ellinci yıldönümü münâsebetiyle en hâlis temenniyâtımızı arz ederiz. Hilâl-i Ahmer'in istiklâl mücâdelesi esnâsında gösterdiği muvaffakiyete bundan sonra da Türkiye nâil olacağına ve bu sûretle Türk milletine büyük hizmetler îfâ edeceğine kâniʻ bulunduğumuzu da ilâve eyleriz. Rus Sovyet Şûrâları İttihâdı ile Memâlik-i Ecnebiye Arasında Münâsebât-ı Harsiye Reîsesi Kameneva _______________ Merâkiz ve Şuʻabâtımızın Tebrîkâtı Vilâyet merkezlerimizle şuʻabâtımız tarafından Hilâl-i Ahmer'in ellinci yıldönümünün tesʻî- di münâsebetiyle merkez-i umûmî riyâset-i celîlesine arz-ı tebrîkâtı ve muvaffakiyet temenniyâtını mutazammın çekilen telgrafnâmelerle ızhâr olunan hissiyât-ı samîmâneye riyâset-i müşârunileyhâ tarafından telgrafla beyân-ı teşekkür edilmişdir. İstanbul'da Hilâl-i Ahmer'in ellinci sene-i devriye-i teessüsü dârülfünûn salonunda binden fazla zevât hâzır olduğu hâlde merâsim-i mahsûsa ile tesʻîd edilmişdir. Bu tesʻîd merâsimine Şükrü Naili, Naci, Şeyhületıbbâ Nafiz, Doktor Besim Ömer Paşalar, Bey- nelmilel Cenevre Merkez Komitesi Murahhas-ı Umûmîsi Mösyö Raymond Schlemmer, Şehremîni Muhyiddin, Sivas Mebʻûsu Şemseddin, Tayyâre Cemʻiyeti Reîsi Fuad, Sıhhiye Müdürü Ali Rıza Beyler, Alman Sefîri Herr Nadolny, İtalyan Sefâreti erkânından bir zât, Müftü Mehmed Fehmi Efen- di, Nakiye ve Nezihe Hanımefendiler, Evkâf Müzesi Müdürü İbnülemin Mahmud Kemal, Hilâl-i Ahmer Merkez-i Umûmî aʻzâ-yı sâbıkasından bazı zevât, İstanbul Hilâl-i Ahmeri merkez ve şuʻabâtı aʻzâsı ve Hastabakıcı Mektebi umûm tâlibâtı iştirâk etmişdir. On dördü çâryek geçe bahriye muzıkası tarafından çalınan İstiklâl Marşı kâimen istimâʻ edilmiş ve müteʻâkiben İstanbul Hilâl-i Ahmer Heyʼet-i Merkeziyesi Reîsi Doktor Ali Paşa kürsî-i hitâbete geçerek âtîdeki nutku îrâd etmişdir: İstanbul Hilâl-i Ahmer Merkezi Reîsi Doktor Ali Paşa'nın Nutku "-Medeniyet-i hâzıra âsâr-ı tekâmülüyesinin numûne-i mümtâzı ve memleketimizdeki haber müesseselerinin en feyyâzı olan Hilâl-i Ahmer'in ellinci yıldönümünü tesʻîde iştirâk buyuran heyʼet-i müşfikanızı kemâl-i minnet ü şükrân ile selâmlar ve tavtıʼe nevʻinden birkaç sözle hisse-i mübâhâtımı iʻlân etmek isterim. Gerek ferdî ve gerek ictimâʻî mefâhirine pâyân olmayan on dokuzuncu asrın nasîbedâr olduğu- muz tekâmülî mazhariyetleri arasında nefʻ-i âm olmak iʻtibârıyla en müşfiği, en müfidi, en muʻallâsı bugün memleketimizin her vilâyetinde tesʻîd ve tebrîk edilen bu mübârek teşkîlâtdır.