HİLÂL-İ AHMER MECMÛʻALARI / CİLT 9

Türkiye Hilâl-i Ahmer Mecmû‘ası Sayı 77 3927 şefkat telkîh için olduğunu düşünmeliyiz. Binâenaleyh her şeyden evvel şimdiki zamânın kıymet ve ehemmiyeti anlaşılmış büyük bir ihtiyâcı olduğunu gördüğümüz Hilâl-i Ahmer'in memleketimizde elli seneden beri faʻâliyeti takdîr edildiğinden dolayı sevinip iftihâr ederken bu mevcûd teʼsîsât ve teşkîlâtı her gün daha yüksek, daha faʻâl, daha asrî, daha feyyâz bir hâle koymak husûsundaki millî vazîfe ve mecbûriyetimizi de sevine sevine kabûl ve teslîm etmeliyiz. Yaralı ve hasta askere, muhâ- cir ve düşküne, musîbet ve felâket görmüşlere, dul kadına, kimsesiz çocuğa, aça, muhtâca bugünkü keskin ve şedîd hayâtın yorduğu, tâkatsiz düşürdüğü her ferde yardım için Hilâl-i Ahmer'i en muʻâsır ve en mükemmel fikirlere göre tensîk u tanzîm ve her ihtimâle karşı ihzâr ve techîz etmeğe müsâraʻat etmeliyiz. Bu sevinç ve tesʻîd gününden alacağımız en mesʻûd ve en müessir gayret ve intibâh bu olmalı- dır. Büyük Gâzî'nin büyük ilhâmâtından muktebes olan bu maksad, sizin de, benim de, herkesin de, hattâ bütün milletin de gâye-i âmâli olmalı. Hilâl-i Ahmer'in ellinci yıldönümünü kutlularken yüksek hâmîsinin, sevgili millî rehberin nâm-ı bülendini fart-ı hürmet ve şükrân ile yâd eder ve hepinizi o muʻazzez şahsiyete arz-ı taʻzîme daʻvet ederim. Teşkîlâtımızın muhterem reîsi Doktor Refik Beyefendi ve rüfekâ-yı muhtereme-i mesâʻîsinin Hilâl-i Ahmer'i yükseltmek ve büyütmek husûsundaki meşkûr himmetlerini de tebcîl ile yâd ederim. Yaşasın Hilâl-i Ahmer ve mübeccel hâmîsi büyük Gâzî!" Ali Paşa'yı müteʻâkib Doktor Besim Ömer Paşa kürsüye çıkarak bir buçuk sâʻat devâm eden uzun nutkuyla Hilâl-i Ahmer'in mükemmel bir târîhçesini yapdıkdan sonra Şehremîni Muhyiddin Bey'e tevcîh-i hitâb ederek: "-Şehremîni bey Hilâl-i Ahmer Cemʻiyeti'ne muʻâvenete her vakit hâzırdırlar. Her memleketde mühim şehirlerde bir Hilâl-i Ahmer veya Salîb-i Ahmer Sokağı vardır. Bendeniz şunu ricâ ediyorum. Meselâ Yerebatan Câddesi diyoruz. Niçin batsın? Bu câddede mâdemki Hilâl-i Ahmer binâsı bulunu- yor. Binâenaleyh cemʻiyet-i umûmiye-i belediye, meclis-i umûmî-i vilâyet aʻzâsı bu câddenin ismini neden Hilâl-i Ahmer Câddesi koymasın?" Sürekli alkışlar… Şehremîni Bey: "-Muvâfıkdır" dedi. *** Besim Paşa'dan sonra Beynelmilel Cenevre Salîb-i Ahmer Merkez Komitesi Umûmî Murahha- sı Mösyö Schlemmer îrâd etdiği Fransızca nutukda Türkiye Hilâl-i Ahmeri'nin ellinci devr-i senevîsi münâsebetiyle icrâ kılınan bu merâsimde Beynelmilel Cenevre Merkez Komitesi'ni temsîl etmek kendisi için büyük bir şeref ve hakîkî bir meserret olduğunu ve bugün ilk yarım asırlık mevcûdiyet ve faʻâliyetini [225] tesʻîd eden bu şefkat müessesesine muhterem reîsleri Mösyö Gustave Ador ge- rek kendi ve gerek Beynelmilel Komite nâmına en hâr tebrîkâtını, en samîmî temenniyâtını heyʼet huzûrunda arz u takdîme kendisini meʼmûr etdiğini, bu mevcûdiyet ve faʻâliyetin hakîkat-i târîhiye- sini biraz evvel bir muhibb-i insâniyet olan Müderris Doktor Besim Ömer Paşa hâzırûna hâtırlatmış bulunduğunu beyân etdikden sonra nutkuna şu sûretle devâm etmişdir: "-Harb-i Umûmî'nin elem ü ıztırâb senelerine ve bu harbin tevlîd etdiği felâketli avâkıba ircâʻ-ı