HİLÂL-İ AHMER MECMÛʻALARI / CİLT 9

Türkiye Hilâl-i Ahmer Mecmû‘ası Sayı 77 3933 Dâimâ o kırmızı hilâl Etmişdir hakkımızı helâl Hilâl-i Ahmer alır Türk'ün parasını Fakat kapatır askerin yarasını Geçen gün bir vatandâşın evi yandı Hemen Hilâl-i Ahmer'e gitdi dayandı Öbür gün seylâb evinden ayırdı Hemen Hilâl-i Ahmer onu kayırdı Bir gece zelzeleden evi yıkıldı Hilâl'in yardımı onu bahtiyâr kıldı Bir günde hastalandı kaldı gıdâsız, karnı aç Hilâl-i Ahmer hem yemek verdi ve hem de ilâc Ey Türk vatandâş, yardım et Hilâl-i Ahmer'e! Çünkü sen hamiyet gösterdin bir değil bin kere Ey vatandâş, büyük Gâzî'nin emrine itâʻat edelim! Hilâl-i Ahmer'e aʻzâ kaydolmağa gidelim". *** Keresteciyan Efendi'den sonra Şükrü Nailî Paşa kürsüye çıkmış ve ber-vech-i âtî nutku îrâd etmişdir: "-Hanımefendiler ve Beyefendiler! Ellinci sene-i devriyesini tesʻîden toplanan Hilâl-i Ahmer aʻzâsını hürmetle selâmlarım. Mem- leketimizde insânî, iktisadî maksadlarla teşekkül etmiş cemʻiyet içinde gâyesine muvaffak olmuş yegâne müessese Hilâl-i Ahmer'dir. İnkılâbın bütün safahâtında büyük bir kuvvetle çalışmış, elîm ve ıztırâblı zamânlarda varlığını göstermişdir. Asker olmaklığım dolayısıyla hayâtımın birçok seneleri cebhede geçmişdir. İşte bu zamânlarda vatanı kurtarmak için bu cemʻiyetin ne kadar gayret, himmet sarf etdiğini gördüm. Dokuz sene devâm eden mütevâlî harblerde Hilâl-i Ahmer bütün menâtık-ı har- biyeye gitmiş, cebhe gerilerinde de Türk yavrularını iʻâşe ve ibâte etmiş, yaralı olarak geri gönderilen askerleri tedâvî ve tekrâr cebheye iʻâde etmek sûretiyle [230] büyük fedâkârlıklar göstermişdir. Bu mukaddes cemʻiyetin büyük yararlıklarını kemâl-i hürmetle yâd ve aʻzâ-yı muhteremesini bir defa daha hürmetle selâmlamayı bir vecîbe addederim". Şükrü Naili Paşa alkışlar içinde kürsüden indikden sonra Heyʼet-i Merkeziye Reîsi Ali Paşa tekrâr kürsüye çıkarak daʻvete icâbetlerinden dolayı hâzırûna teşekkür etmiş ve bu merâsim münâse- betiyle Gazî hazretlerine ve Büyük Millet Meclisi'ne arz-ı taʻzîmât için bir telgraf çekilmesini teklîf etmiş ve teklîf müttefikan kabûl edildikden sonra sâʻat on yedide merâsime nihâyet verilmiş ve Hacı Bekir Şeker Ticârethânesi'nde sûret-i mahsûsada zarîf kutular içinde yaptırılan şekerler hâtıra olarak medʻuvvîne çıkar iken tevzîʻ edilmişdir. _______________