HİLÂL-İ AHMER MECMÛʻALARI / CİLT 9

Türkiye Hilâl-i Ahmer Mecmû‘ası Sayı 77 3938 Bursa'da Hilâl-i Ahmer'in ellinci yıldönümü Bursa'da belediye salonunda merâsimle tesʻîd edilmişdir. Muzıkanın İstiklâl Marşı'ndan sonra Bursa merkezimiz reîsi Doktor Rıza Tahir Bey tarafından bir nutuk îrâd edilmiş ve Hilâl-i Ahmer'in bir târîhçesi yapılmışdır. Merâsime bütün müessesât müdîrânı ile erkân-ı hükûmet iştirâk etmiş ve geç vakte kadar samîmî tezâhürâtda bulunularak daʻvetlilere çay ve pasta ikrâm edilmişdir. Gece belediye salonlarında bir balo verilerek müstesnâ bir gece yaşanmışdır. _______________ Aksaray Vilâyet Merkezi'nde Memleketimizin her tarafında olduğu gibi Aksaray vilâyeti merkezinde de yapılan devr-i senevî merâsimi pek parlak olmuşdur. Vilâyet Millî Kütübhânesi'ne daʻvet edilen umûm meʼmûrîn ve halk kütübhânenin vâsiʻ mütâ- laʻa salonunu tamâmen doldurmuşdur. Daʻvetliler evvelâ çay ve kurâbiye ile iʻzâz edilmiş ve müteʻâkiben Hilâl-i Ahmer Cemʻiyeti Aksaray Merkezi Reîs-i Sânîsi Vâsıf Bey mevkiʻ-i hitâbete gelerek hâzırladığı târîhçe ile nutkunu büyük bir belâgat ile kırâat etmiş ve sürekli alkışlarla karşılanmışdır. Vâsıf Bey'den sonra kürsî-i hitâbeti Orta Mekteb Müdürü Hüsnü Bey işgâl etmiş ve Hilâl-i Ahmer'imizde mukayyed aʻzânın pek az olduğuna ve Türkiye'mizin on dört milyona bâliğ olan nüfû- suyla mütenâsib olmasını teʼmînen aʻzâ kaydı için teşvîkâtda bulunulmasına ve hâssaten bu cihetin halka anlatılması [234] lâzım geldiğine ehemmiyetle işâret etmiş ve Hilâl-i Ahmer'in İstiklâl Harbi'n- de Adana cebhesine ve Konya'ya gönderdiği imdâd-ı sıhhî heyʼetlerinden ve açdığı hastahânelerden ve yapdığı fedâkârlık ve muʻâvenetlerden bahsetmiş ve sene-i devriyeyi umûm medʻuvvîn nâmına tebrîk etmiş ve alkışlanmışdır. Bu nutuklardan sonra muktedir bir kemanist tarafından İstiklâl Marşı çalınmış ve kâimen din- lenen marşımız alkışlarla nihâyet bulmuşdur. Baʻdehû daʻvetlilere tekrâr çay ve kurâbiye tevzîʻ edilmiş ve ara sıra kemanla muhtelif güzel parçalar çalınmışdır. İyi bir vakit geçiren halk çok tatlı intibâʻlarla dağılmışlardır. Gece Hilâl-i Ahmer menfaʻatine Orta Mekteb'de güzel bir müsâmere verilmişdir. _______________ Burdur'[da] Yarım asırlık hayâtını muvaffakiyet-i tâmme ile ikmâl eden Hilâl-i Ahmer'in ellinci sene-i dev- riyesinin yevm-i tesʻîdinde belediye heyʼeti, erkân ve meʼmûrîn-i vilâyet, askerî kumandanlar, Türk Ocağı heyʼetleri, eşrâf-ı memleket ve Hilâl-i Ahmer aʻzâsı Gâzî Mustafa Kemal Paşa Mektebi Salo- nu'na daʻvet olunarak merâsim-i tesʻîdiye icrâ ve Hilâl-i Ahmer'in teşekkülüne ve yapdığı hizmetlere dâir nutuklar îrâd edilmiş ve şekerleme ve çay verilmek sûretiyle medʻuvvîn iʻzâz kılınmışdır. _______________ Trabzon'da 23 Kânûn-ı Evvel'e musâdif Cuma günü bi'l-umûm meʼmûrîn-i hükûmet, askerî kumandanı, belediye, Tayyâre, Himâye-i Etfâl, Türk Ocağı rüesâ ve aʻzâsı ve spor kulüplerinden birer heyʼet,