HİLÂL-İ AHMER MECMÛʻALARI / CİLT 9

Türkiye Hilâl-i Ahmer Mecmû‘ası Sayı 77 3940 Niğde'de Niğde'de Hilâl-i Ahmer'in ellinci yıldönümü merâsim-i mahsûsa ile îfâ ve umûm daʻvetlilere pasta, çay, sigara ikrâm edilmiş ve merkezimiz reîsi tarafından Hilâl-i Ahmer'in târîhçesi ile insânî hidemâtı hakkında bir nutuk söylenmiş ve buna vâlî vekîli mukâbelede bulundukdan sonra umûm hâzırûn tebrîkleri ve muzıkanın latîf terennümâtı ile merâsime nihâyet verilmişdir. _______________ Kastamonu'da Kastamonu merkezimiz tarafından Muʻallimler Birliği Salonu'na daʻvet olunan vâlî, belediye reîsi, ümerâ ve zâbitân ve meʼmûrîn-i mahalliye ve eşrâf-ı belde huzûruyla ellinci senenin merâsim-i tesʻîdiyesi îfâ edilmişdir. _______________ Sinop'da Sinop'da kabûl ve tesʻîd merâsimi Türk ve Hilâl-i Ahmer bayraklarıyla tezyîn edilen Türk Ocağı Sa [236] lonu'nda yapılmış ve medʻuvven vâlî, erkân-ı vilâyet, ümerâ-yı askeriye, rüesâ-yı meʼmûrîn ile Hilâl-i Ahmer aʻzâsı hanım ve beyler ve eşrâf-ı memleket ve cemʻiyât mümessilleri hâzır bulun- muşlardır. Merâsimde Sinop merkez reîsi tarafından cemʻiyetin târîhçesi îzâh edilmiş ve medʻuvvîn çay, bisküvi ve ayrıca içlerinde sûret-i mahsûsada ihzâr etdirilen hâtıra kartları konulmuş birer paket şeker tevzîʻi sûretiyle iʻzâz u ikrâm olunmuşlardır. Gecesi de Sinop'da ilk defa olarak âilevî bir tarzda tiyatro tertîb ve temsîl edilmişdir. Merâsim umûmun takdîr ve şükrânına mazhar olmuşdur. _______________ Hilâl-i Ahmer Menfaʻatine Balo Hilâl-i Ahmer Beyoğlu kazâ şuʻbesi tarafından her sene tertîb olunan kış balosu bu sene Hilâl-i Ahmer'in ellinci sene-i devriyesine musâdif 23 Kânûn-ı Evvel 1927 Cuma günü akşâmı Pera Palas salonlarında verilmişdir. Dâhiliye Vekîli Şükrü Kaya Beyefendi'nin riyâsetinde şehrimizde bulunan süferâ ve madamları ile zevât-ı âliyeden ve hanımefendilerden mürekkeb heyʼet-i tertîbiyenin himmetiyle bu balo emsâline fâik ve pek muhteşem olmuşdur. Hilâl-i Ahmer, daʻvetlilerine ve baloya iştirâk edenlere mükemmel bir büfe ihzâr etmiş ve medʻuvvînin istirâhatlerini teʼmîn için hiçbir fedâkârlıkdan kaçınmamışdır. Hilâl-i Ahmer Beyoğlu Kazâ Şuʻbesi'ni ve balo heyʼet-i şerefiye ve tertîbiyesini işbu muvaffa- kiyetlerinden dolayı tebrîk ederiz.