HİLÂL-İ AHMER MECMÛʻALARI / CİLT 9

4041 Yedinci Sene 22 Ramazân sene 1346 / 15 Mart 1928 Numara 79 Makâlât ve İʻlânât, Mecmûʻa Müdüriyeti'ne Gönderilmelidir. TÜRKİYE HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Her Ayın On Beşinde Neşrolunur. Senelik abonesi bir liradır. Merciʻi: Yerebatan Câddesi'nde Hilâl-i Ahmer Merkezi. Telefon: İstanbul 2653 Mündericât: Hilâl-i Ahmer Câmiʻ ve Bayram Günleri – İctimâʻî Hıfzıssıhha – Hayât ve Ölüm Nedir? – Tütüne Dâir – Gebe Kadınlara Yardım – Hilâl-i Ahmer Havâdisi – Salîb-i Ahmer Havâdisi – Fransızca Kısmı – İngilizce Kısmı HİLÂL-İ AHMER'İN CÂMİʻ VE BAYRAM GÜNLERİ Bütün müessesât-ı hayriye gibi Hilâl-i Ahmer de erbâb-ı hayr u hasenâtın muʻâvenât-ı mâddiye ve maʻneviyesiyle yaşar ve inkişâf eder. Harb-i Umûmî esnâsında teʻâvün kuvvetlerini pek ziyâde yükselten Salîb-i Ahmerler vâridât menâbiʻi bulmak için muhtelif vâsıtalara mürâcaʻat etmişlerdi. Bu vâsıtalardan biri de Cemâhîr-i Müttefika-i Amerika'da ve İngiltere'de "Church Day", yani "Kilise Günü" taʻbîr olunandır. Bu iki memleketin Salîb-i Ahmer Cemʻiyetleri, senenin birkaç muʻayyen gününde bütün kiliselerde para toplamak usûlünü tatbîk eylemek sûretiyle pek parlak muvaffakiyetler elde etmişlerdir. Amerika ve İngiliz Salîb-i Ahmerlerinin vâridât fasıllarından en mühimmini teşkîl eden Kilise Günü, bu iki cemʻiyete mühim vâridât teʼmîn ediyor. Hilâl-i Ahmer de "Câmiʻ ve Bayram Günleri"ni ihdâs etmişdir. Maʻlûmdur ki, İstanbul'da Ra- mazân Bayramı'nın ilk günü, Hilâl-i Ahmer'in Çiçek Günü'dür. Bu âdet bâki kalmakla berâber Ra- mazân ve Kurbân Bayramlarının ilk günleri Câmiʻ Günleri ittihâz ediliyor. Bu iki mübârek günde bayram namâzına giden her müslümân câmiʻ-i şerîfe konacak bir kutu veya tepsiye, gönülden ne ko- parsa atar. Bu âdet, Türkiye Cumhûriyeti'nin en küçük köylerindeki câmiʻlere kadar teşmîl edilebilir. Bu sûretle Ramazân ve Kurbân Bayramlarının ilk günlerinde, bayram namâzının edâsından sonra bütün millet Hilâl-i Ahmer'i yani bütün eytâm, erâmil ve fukarâyı düşünmek fırsatını elde etmiş olur. Bütün memâlik-i İslâmiye'deki câmiʻlerden de aynı himmet ve mürüvvetin dirîğ edilmeyece- ğine intizâr olunur. Câmiʻ ve bayram günlerinin hâsılâtı, ber-muʻtâd mecmûʻamızda neşredilecekdir. Bir Ricâ: Türkçe gazetelerin ve muhtelif lisânlarda neşrolunan cerâid-i İslâmiye'nin bu küçük beyânnâmeyi sütûnlarına derc eylemelerini hakkımızdaki dâimî lütuf ve teveccühlerinden ricâ ve niyâz eyleriz. Hilâl-i Ahmer Mecmûʻası