HİLÂL-İ AHMER MECMÛʻALARI / CİLT 9

Türkiye Hilâl-i Ahmer Mecmû‘ası Sayı 79 4053 Meclis-i umûmînin inʻikâdı vesîlesiyle reîsicumhûr hazretleriyle Başvekîl İsmet, Büyük Millet Meclisi Reîsi Kâzım Paşalar hazretlerine ve Merkez-i Umûmî Heyʼeti Reîsi Doktor Refik Beyefen- di'ye telgrafla arz-ı taʻzîmât ve hürmet olunmasına dâir verilen takrîr ittifâk-ı ârâ ile kabûl edilmişdir. Müteʻâkiben Heyʼet-i Merkeziye Kâtibi Celâl Sâhir Bey tarafından senelik icrâât ve muʻâmelâta dâir merkez heyʼetinin ihzâr etdiği rapor okunmuşdur. Rapor okundukdan sonra heyʼet-i umûmiyesi hakkında beyân-ı mütâlaʻa etmek üzere söz isteyen olup olmadığı makâm-ı riyâsetden sorulmuşdur. Doktor Tevfik Salim Paşa söz alarak fakîr çocukları iʻâşe husûsunda şimdiye kadar yapılan yardı- mın yeni teşekkül eden Maʻârif Cemʻiyeti tarafından yapılması ve bundan tasarruf olunacak paranın Hilâl-i Ahmer'in asıl vezâifini teşkîl eden diğer husûslara sarfı, meselâ veremlilere yapılan yardımın tevsîʻine tahsîsi münâsib olduğunu söyledi. Hilâl-i Ahmer'e yeni vârid[â]t tedârükü için vesâit-i nakliye ücretlerine küçük zam yapılması zımnında umûmî kongreye teklîf fikrini de münâsib bulmayarak bu tarz hareketin halk üzerine mun- zam bir vergi tarhı mâhiyetinde olup küçük sınıf ahâlîyi de mutazarrır edeceğini ve tramvay yolcula- rını yakında yayan yürümeğe mecbûr kılacağını ifâde ve Hilâl-i Ahmer'e bulunacak vâridâtın meselâ iskambil kâğıdları gibi ihtiyâcât-ı umûmiyeyi pahâlılaştırmayacak menbaʻlardan aramak daha doğru olacağını ilâve etdi. Doktor İbrahim Zati Bey tarafından verem salgınına karşı Hilâl-i Ahmer Cemʻiyeti'nin alâka gösterdiği senelik raporda zikredilmekde ise de bu yardımın esâslı bir yol taʻkîb etmediğinden bahisle bu mesʼele ile daha ciddî meşgûl olunarak memleketin münâsib bir veya iki noktasında derhâl bir verem hastahânesi açılması hakkındaki takrîr okundu. Doktor Orhan Tahsin Bey, Tevfik Salim Paşa'nın Maʻârif Cemʻiyeti'nden bahsetmesi vesîlesiy- le yapılacak yardımların her hâlde Hilâl-i Ahmer tarafından yapılması[nın] daha münâsib olacağını söyledi. Reîs Doktor Ali Paşa söz alarak ilk mekteblerdeki fakîr çocuklara yardım faʻâliyetinin târîh- çesini zikretdi ve bu yardımın Hilâl-i Ahmer tarafından yapılmasındaki en büyük fâide işin idâresi masârıfı olarak hiç para sarf edilmemesi ve bu sûretle bu maksad için ele geçen paranın tamâmen yardıma tahsîs olunabilmesi olduğunu ifâde etdi. Müteʻâkiben Tevfik Salim Paşa maksadını îzâh için söz alarak Hilâl-i Ahmer'in bu işe devâmı aleyhinde olmayıp ancak bununla uğraşacak daha çok ihtisâs dâhilinde bulunan bir teşekkül vücûd bulunca devrine tarafdâr olduğunu söyledi. Bundan sonra reîs müzâkerâtı hulâsa etdi. Rapora mülhak hesâbât ve büdce hakkında aʻzânın mütâlaʻaları olup olmadığını sordu. Bu esnâda Hilâl-i Ahmer'in muvazzaf meʼmûrları arasında fevkalâde hizmeti geçenlerin ik- râmiye ile diğerlerinin de şevk u gayretini tezyîd etmek üzere münâsib sûretde taltîfleri hakkında verilen takrîr okundu. Şemseddin Bey menâbiʻ-i vâridâtı halkın iʻânâtından ibâret olan müesseselerin meʼmûrlarına ikrâmiye vermenin münâsib olmayacağını ifâde etdi. [323] Celâl Sâhir Bey söz alarak 1928 senesi büdcesinde unutulan bir-iki mâddeyi tashîhen umûmî kongreye bir murahhas gideceği için murahhaslar tahsîsâtı olarak konulan dört yüz liranın iki yüz liraya indirildiğini ve tasarruf olunan bu mikdâra üç yüz lira daha zammıyla beş yüz lira demir- baş eşyâ sarfiyât-ı muhammenesi olarak konulduğunu ve bi'l-mukâbele vâridât kısmının teberruʻât mâddesine yedi yüz elli lira ilâve edildiğini bu sûretle vâridât ve masârıf hânesi yekûn-ı mütevâzini 104.682 lira olduğunu ifâde etdi ve büdce bu tashîhât ile kabûl olundu.